我武維揚（十）

所謂文無第一, 武無第二ｏ學武之人最鍾意係認叻, 試過有個師傅（唔係黄SIR師傅ｏ）在拳館大吹大擂, 話自已練咗氣硬功, 任打都冇事！

即塲紥定個疴屎馬（四平馬）, 叫學生兜心口打佢一拳, 只見他一嘢就倒地, 口吐白沬, 立刻送上急症室, 已返魂無術！（事見港聞版！塲地是一間體育會, 年份係七十年代ｏ）

有時做師傅, 又唔到你唔吹, 如果冇料, D學生就會走晒ｏ所以上人地拳館踢盤, 真係咪鬼制, 你估人會同你友誼第一, 比賽第二乎？點到即止？事關飯碗, 唔同你死過就有鬼矣！

詠春D師兄周不時去四圍踢盤試招, 好多時都面腫口腫返泥, 不過據佢地講, 對方仲傷！（我信至奇！）你叫我去睇熱鬧都費事！容乜易連我都打埋嫁！唏！我冇咁儍！

有D詠春師兄, 同人打架, 周𣎴時打斷手, 師傅就包医跌打, 我成日見D師兄幫襯！你打人十拳, 人打番你一拳都死啦！打交真係咪鬼制也！

有時就算自已師兄弟講手, 講明玩吓, 點到即止, 都咪鬼制, 因為人人好勝心強, 打得两打, 已忘了點到即止, 我眼見好多師兄弟, 打到反晒面都經常有！黃SIR就一次都冇玩過！