PACO名人會
PACO名人會
PACO名人會

《真PK》節目破格出位 火火:睇怕返唔到轉頭!

2016/06/13 08:42:09 網誌分類: 生活
13 Jun

        玩破格的Viu TV開播以來,一直深受觀眾歡迎,真人騷備受追捧,就連深宵節目《晚吹——真PK》亦贏盡喝采,全因《老笠》導演李家榮(火火)和Kevin Boy(KB)在鏡頭前玩得夠癲,PK賽輸家要被罰舔大隻佬胳肋底、含林雪臭襪、飲老鼠酒等,極重口味,玩得愈癲觀眾愈鍾意,火火說:「好多人以為那些大懲罰係一早夾定,但其實真係無,而且我開始覺得玩大咗,這season快完結,大家開始見到懲罰去到極致,原定season 2齋同KB講音樂,但睇怕都係返唔到轉頭。」

        做節目要大膽創新才吸引,這個《真PK》節目絕對是把觀眾的快樂建築在兩位主持人身上,PK賽的大懲罰備受爭議,生吞老鼠仔一幕直頭毛管戙,火火說:「真係要食老鼠,起初都猶豫係咪只需飲酒,但監製話要成隻食,嘩,隻老鼠仔手指公咁大隻,有爪有鬚又凍凍地,要攞杯酒直啪落去,那種感覺真係攞命。」看到火火和KB如此賣命,作為觀眾的我也感激流涕、笑到標淚。

        大懲罰任魚肉

        這場PK賽玩法是要兩位主持引導嘉賓答中暗題,失敗一方要接受懲罰,過去一連九集節目中,對一連串讓人膽怯的大懲罰,火火坦言事前毫不知情,「好多人到今日都話我哋兩兄弟自己度橋自己玩,但其實真係要去到大懲罰先知玩乜,試過埋位前被叫除底衫,點知到大懲罰就攞一大樽曱甴出嚟,唔係話一兩隻曱甴灑上身,係一大樽喎,平時節目都非常多『嘟嘟』聲音,那次我哋『嘟』咗半個鐘,KB直頭嗌到聲沙,可能監製導演見我哋玩得,不斷將懲罰升級,又成日試探我哋仲可以去到幾盡。」說到嘉賓當中,只有曾國祥有份接受大懲罰,火火忍不住笑說:「係Derek先咁白癡陪我哋死,先食隻老鼠再食四腳蛇壽司,一集內吞了兩隻生物。」

        節目流露真性情

        KB首次做節目主持便要跟火火玩PK賽,難免要屢受懲罰,KB說:「坦白講,每個懲罰我都接受到,反而最大挑戰係做主持,始終第一次,有好多事要兼顧,有時記漏對白又會出現dead air,好在有火少幫我接。」火火聞言即大爆KB累他被網民指責,他說:「KB班Fans成日鬧我蝦佢,但大家又唔知KB喺現場記唔到對白,訪問時結巴巴,到我一問到暗題要點就搭嘴搶問,次次都攝埋嚟話自己問到,所以我先發脾氣鬧佢,導演就將我發脾氣的畫面剪出來,結果班網民就揶揄我話『阿火唔輸得啦!』又或『十個懲罰九個都係Kevin仔受,阿火擺明恰人!』,唉,你想我點呢,俾KB發揮,佢又唔講嘢。」主持節目考急才,火火坦言事前零準備,「節目係freestyle,我唔想好似中午婦女節目咁,你有戲上就來分享新戲內容,這好容易被對方知道那些是暗題。」

        KB新歌夠地道

        事實上,KB一直深受網民熱捧,說到新作《我最喜愛的香港人》MV題材夠地道,KB解釋說:「這首歌是向香港基層致敬,故事都是大家日常生活見到的畫面,MV找了很多朋友一齊玩,有火火、Super Girl的Cheronna(吳嘉熙)和我好喜歡又好好戲的侏儒朋友小B,還有我媽媽和填詞的梁栢堅都有來客串,真係要多謝網民支持。」講音樂,點都要向大家推介火火為劉浩龍(師兄)填詞的《520》,歌詞靈感來自一個真實故事,火火說:「是師兄的朋友,一對夫婦的愛情故事,因太太有病可能會離開人世,醫生要這兩口子把想做的事盡快完成,我聽完後好心噏,幻想若然有一日我或我太太有病,醫生話時日無多,那我的世界會怎樣?於是把這感覺寫成歌,這種事可能每個人都會遇到,但往往發生在日日為口奔馳的小巿民身上,希望這首歌可以永遠記錄他們的故事。」火火筆下那句「我記得醫生說,將寶貴事情能盡快處理都處理」相信每個有家室的人聽到也會感動落淚。

        火火成cult王

        憑《老笠》開拓新血路的火火,最近忙為新片《女仕復仇》趕工,說到今年電影大計,他興奮地說:「要多謝Paco,沒有Paco係開不成《老笠》這部咁癲的戲,亦開拓我的cult片血路,《女仕》係女人cult片,拍攝都算幾順利,現在個心好紅,好想盡快拍完,因我早已答允Paco盡快開一部更黐線的戲,詳情唔透露住,只能話係非常黐線。」有份拍攝的KB亦說跟火火合作,得着很大,「我始終係一個鼓佬,埋位拍戲會好緊張,火火事前給我很多指導,但還是新演員的我對角色會有好多意見,當然火火唔理我,佢會好清晰教我點演,真係塞錢入我袋,令我學到好多。」說實在,我很支持火火,希望他能繼續保持獨有的風格,公司將會投放更多資源在電影製作上,計劃讓他的電影作全中國發行,讓更多人可以看到他的作品。
 
■首次做主持的KB坦言得着很大,亦願意接受任何大懲罰。
■首次做主持的KB坦言得着很大,亦願意接受任何大懲罰。
■節目受歡迎,當然要來個part 2,火火坦言再玩只會愈來愈激。
■節目受歡迎,當然要來個part 2,火火坦言再玩只會愈來愈激。
■KB被懲罰的環節幕幕驚心,要舔大隻佬腳趾又要被大隻佬糟質,堅慘。
■KB被懲罰的環節幕幕驚心,要舔大隻佬腳趾又要被大隻佬糟質,堅慘。
 
 
■火火和KB大讚曾國祥有義氣,陪他們一起飲老鼠酒和食四腳蛇壽司。
■火火和KB大讚曾國祥有義氣,陪他們一起飲老鼠酒和食四腳蛇壽司。
■KB新歌MV找來侏儒演員客串演出。
■KB新歌MV找來侏儒演員客串演出。
 
■火火憑cult片殺出血路,新戲《女仕復仇》拍得如火如荼。
■火火憑cult片殺出血路,新戲《女仕復仇》拍得如火如荼。
■《真PK》節目大膽創新,看到火火和KB如此賣命演出,作為觀眾的我也不禁笑到標淚。
■《真PK》節目大膽創新,看到火火和KB如此賣命演出,作為觀眾的我也不禁笑到標淚。
回應 (0)
我要發表
user