我一直支持本地創作的香港電影，像剛上映的新片《此情此刻》，由《選戰》導演黃國輝執導，找來林家棟、潘燦良、吳耀漢等頂班演員助陣，透過四個故事來喚醒大家做人要活在當下。跟導演識於微時的林家棟第一個舉手埋位，他坦言是被劇本吸引，「近年少有這類題材，講兩個中年男人二十年無見，重遇後所面對的矛盾與衝突，我覺部戲能顧及到不同年齡層的人，你喺戲入面可能會搵到一個自己出嚟。」 Costume：PaulSmith
Makeup：NicholChau@elf
Hair：AlexChan@projetz4/J.A.C.KTimeless
或許大家對黃國輝的名字感到陌生，但說起前年熱爆全城的電視劇《選戰》又或是無綫經典劇集《季節》、《難兄難弟》、《古靈精探》等，相信無人不識，首執導演筒的黃國輝坦言要多謝老闆支持，他說：「《此情此刻》是我第一次執導的電影，想好題材便開始創作，這是一個很有情懷的故事，後來得到老闆賞識和支持，加上香港電影發展基金撥款，終於有我自己第一部電影。」電影以四個故事串連而成，不同的人物故事牽引出不同的情感瓜葛，導演借電影來勸勉大家，若只對過去懷緬、為將來徬徨，那不如學習活在當下，林家棟補充說：「我覺得喺戲入面你會搵到一個自己出嚟。」
跟潘燦良有火花
黃國輝坦言林家棟這次戲裏戲外都幫了很多，從劇本睇法至拍攝過程都給予很多寶貴意見，讓他這個新導演能拍得更流暢，家棟說：「我覺得個故事幾吸引，兩個中年男人性格南轅北轍，二十年無見但突然撞返會點呢？可能會有好多衝突和矛盾發生。」說到這次夥拍同是演技出眾的潘燦良，家棟坦言第一次合作已很有火花，他說：「我哋去到現場沒刻意交流，因角色本身就係咁，無見二十年唔知對方變成點，我又固執佢又不斷吹水，現場早已醞釀那股氣氛和態度，結果埋位一撞效果就好自然。」黃國輝亦大讚潘燦良那獨有的形態演技，「我就係要一個好沉鬱嘅影相佬同一個好多嘢講嘅地產經紀，阿燦演舞台劇出身，每個反應都能表演到那種形態動作，絕對能handle角色所需。」
吳耀漢帶住入戲
這次選角方面亦甚有驚喜，找來老前輩吳耀漢跟林家棟飾演父子，家棟興奮笑說：「佢就好似你杯酒咁醇，佢喺隔籬啲氣塲就喺度，成件事係好舒服，佢又唔使刻意講多但又會畀晒你，其實你跟住佢行就無問題。」黃國輝亦說：「記得一開始我哋沒想太多detail，只預咗一個uncle造型畀佢，到埋位拍嗰日，佢自己帶咗條絲巾嚟綁喺頸，然後話『我着恤衫唔扣衫鈕，我有底衫，着件恤衫喺面就得，我後生就係咁樣，幾十年都無變過，我都以為自己好有型，但其實已經有個肚腩。』又係喎，幾十年都係同一造型，只係個肚腩大咗，佢可以連一啲咁細嘅位都有諗，係好幫到件事嘅演員。」
爆Eric尷尬錫老婆
說到其他三條故事線，黃國輝逐一解說：「其實每條線都有獨立故仔，唯一串連係戲中主題——照片，如DaDa留低一張相喺家棟間影樓，張相牽連出一啲回憶。DaDa同關楚耀拍都幾開心，但要佢哋含情默默互望，DaDa就會笑得好尷尬，成日要????佢哋乖乖地親熱；孫耀威就飾演愛蒲中年男士，喺夜場遇到一個19歲小妹妹江嘉敏，一個中年男士跟一個小妹妹之間會有啲幾有趣嘅事發生；EricKowk同Grace就完全係大膽撞返嚟的，開頭想搵一個有婚前恐懼症嘅女仔，我覺得佢男朋友要好有型，即那種應該係要結婚、評分又幾高嘅人，Eric鬼鬼地又IronMan咁真係幾啱個角色，有個老公自然就諗佢老婆應該係邊個？突然有人提議試吓搵Grace，可能你會覺得我只係想搞啲gimmick，這可能係一啲潛藏因素，但大家講講吓不如真係試吓問，問吓又無妨嘅，唔得咪算囉，結果搵佢哋兩公婆嚟演一對熱戀中男女，感覺又幾得意，有場kiss戲Eric更顯得好尷尬。」 | 
