今個聖誕節,鄧麗欣(Stephy)又再演繹葉念琛愛情小品《失戀日》的女主角阿寶,今次對手由方力申換上劉浩龍(師兄),新情侶組合為扮演中女中佬,不惜認真谷肥埋位。Stephy與好戲之人金燕玲飾演母女,「惹火母女」一埋位就嗌交,其中一場金燕玲爆Seed打到阿女呼天搶地,大賣悲情,首次與金燕玲合作的Stephy大讚前輩:「佢太犀利,每次摑我都唔留手,有一次打到我暈暈哋!」而師兄又爆將熒幕初吻獻給Stephy,二人感人賣力的新片,12月22日豈能錯過!
主持:黃柏高 統籌:林永匡 攝影:謝民光 協力:林書鉉、袁東亮 場地:海鮮房(銅鑼灣謝斐道Tower53526樓) 鄧麗欣化妝:CyrusLee 髮型:VincePang@ILCOLPOPlatinum 服裝:Topshop
今年初,導演葉念琛搵御用女角鄧麗欣拍《失戀日》時,撞正女神和方力申分手的尷尬期,加上新片名字,Stephy坦言怕記者會炒作新聞,幾經考慮才接拍,皆因葉導鏡頭下的「阿寶」,就好像是與Stephy一同成長,系列由單身、熱戀、紀念到分開,彷彿是度身訂做的一個戀愛寫照。33歲的Stephy在新片中扮演一名貼地的三字頭女生,面對愛情、事業和生活都需要種種抉擇。
谷肥演出
Stephy說:「今次個『阿寶』同以前好唔同,無論造型和性格都差好遠,戲中的阿寶有個拍拖七年的男友,每日重複步伐,想跳出框框。於是拍之前,狂食兩星期,增肥3kg,去演繹呢個外表蠢鈍的中女角色。」無獨有偶,拍檔劉浩龍亦刻意谷肥,師兄說:「我個角色由原本一個當紅男歌手,到事業跌落谷底,中年發福去做個傳銷員。」首度同Stephy演情侶,師兄仲獻出他的第一次說:「好多謝Stephy可以帶動到我,又相信我,令大家好自然咁去錫。」
摑到飛甩眼鏡
Stephy和師兄的嶄新組合令人有驚喜,而另一位同「阿寶」有好多對手戲的金燕玲,亦令她讚不絕口。她說:「好記得第一日同金燕玲姐姐對戲時,佢話『我唔會試戲,因為我係100%投入』,我覺得好犀利,令我一刻都唔夠膽放鬆,要比平日更認真更落力,出到嚟幾場戲都非常好睇,好有張力,我覺得佢可以激發到我嘅潛能出嚟。」最深刻的幾場母女爭吵戲,兩人七情上面,阿媽仲激動掌摑女兒,Stephy記憶猶新說:「有次打到飛甩眼鏡;有次就打到我暈暈哋,嗰種慘痛,係真實反應嚟!」
同葉導無傾偈
葉念琛和御用女主角Stephy合作過逾九部電影,但師兄發現Stephy和導演無乜交流,誤以為兩人不熟,Stephy解釋謂:「其實係我倆太信任,拍攝時,我係唯一一個角色事前有劇本,其他人去到現場先有,我一早知道晒故仔,大家有晒默契,在片場唔需要講嘢,已經知對方要乜。導演畀我好大空間去發揮,每次都希望將不一樣的Stephy呈現出來。」預告片特別剪輯金燕玲、Stephy及麥明詩三位女角的三種「喊樣」,導演葉念琛似乎要用淚水打動觀眾,這部聖誕上映的佳作,值得推介。 |