PACO名人會
PACO名人會
PACO名人會

賀歲頭炮笑到肚痛 林盛斌:導演任我發揮!

2017/01/09 14:42:52 網誌分類: 生活
09 Jan

        踏入2017年,要先恭喜Bob林盛斌今年鴻運當頭,他孭飛的新片《我要發達》成為賀歲檔頭炮,題材是香港人中六合彩的發達夢,瘋狂情節抵死過癮,新年入場睇戲肯定笑唔停,Bob說:「平時拍戲客串一兩場玩完就算,今次要由頭帶到尾都好大壓力,最感恩係能搵到唐詩詠做我夢中情人,真係無得頂!其實套戲係好多香港人嘅生活寫照,相信中六合彩亦係好多人嘅心願,希望大家入場笑餐飽之餘亦可沾些旺氣,散場再去買注六合彩發個新年財!」

        首次擔正做男主角,Bob林盛斌無論在造型或演技上都瞓身去盡,「我角色係好多香港人嘅寫照,成日怨老婆對自己唔好,被外父外母睇唔起,工作無前途、無出色,葉念琛直頭話我係廢柴!」廢柴Bob造型核突又爆笑,但居然可跟唐詩詠、孫慧雪、陳嘉桓三位「宅男女神」埋牙肉搏,令整部片充滿Fantasy感,單看預告片已笑到肚痛。「其實一開始我好大壓力,因成部戲要由頭帶到尾,直頭唔知點去處理,而最感恩係能搵到唐詩詠做我夢中情人,我嘅初戀,真係verygood!」Bob自爆拍攝時也對唐詩詠心動,「詩詠演技好好,記得有場戲講我中咗六合彩後,詩詠走來求我幫手,嗰種眼神、感覺好可憐,你係會好想即時攬住佢、錫住佢,拍完我真係好想同佢男朋友Tony講,你真係要對佢好啲!」

        導演要求高

        同樣被葉念琛睇中、首次擔正做電影女主角的唐詩詠笑說:「導演話想搵我拍愛情片,我即時?飯應,心諗好浪漫喎,但聽到男主角係Bob,就覺得呢部應該唔係愛情片,諗咗十秒,覺得都係開心嘢,所以即時答應接拍。」說到這次合作,唐詩詠坦言導演要求很高,「有場酒吧戲拍咗三十幾個take,因導演不停想我修改,一路畀好多指引我,去到最後一take我發現真係最好,導演亦收貨,其實出來拍戲就係想其他人身上學習,自己拍咗咁耐戲,可能有啲位平時自己無留意到,需要人提點。」

        即興爆肚最好笑

        說到演技上的提點,Bob亦感謝葉念琛出盡力助他入戲,他說:「我本身對自己都幾有要求,之前《沒女神探》都會睇得好緊,而今次葉念琛為幫我掌握角色,直頭同我講『Bob,你諗下你一個咁廢嘅廢柴,中咗一個幾千萬嘅六合彩,你幻想下你係會點樣,你應該係會崩潰、開心到爆!』,嗰場戲我放盡去拍,導演亦攞部戲lock住我分幾鐘一shot過,拍完我個人直頭謝咗。同唐詩詠嘅感情戲亦好到肉,以前拍戲邊有呢啲?睇得出導演拍內心戲好有深度,我真係學到好多嘢。」問到戲中爆笑位,Bob說:「導演係放手任我玩,話想睇大家即時反應,如我攞個波掟詩詠個頭,佢個樣係又驚又好笑,因排戲時無呢下動作,又或有場我攞張中彩獎劵摑麥玲玲,導演叫我玩下佢,麥玲玲好嘢呀,郁都唔郁,繼續扮瞓,導演一嗌cut,佢即彈起叉頸鬧我死仔,現場班工作人員成日都要忍笑,所以有時呢啲所謂即興爆肚幾好睇。」

        唐詩詠形象大突破

        一部成功的喜劇,對白情節要抵死好笑外,角色造型設定亦要夠出,Bob笑言要多謝葉念琛塑造出前所未見的唐詩詠給大家欣賞,他說:「造型上,詩詠都有好大突破,因戲中有場戲話佢做舞小姐,即夜總會公關,你係未喺TVB見過佢着嗰類衫,好得人驚,同埋flashback我哋中學階段,佢嗰個傻瓜樣,真係好離譜,有幕仲要係你想打佢一身,好搞笑,現場工作人員個個笑得好開心,因未見過唐詩詠有咁嘅樣,亦睇得出佢係好肯付出,換轉第二個都唔肯做㗎,係佢咁專業先可以做到。」Bob說得眉飛色舞,在旁的唐詩詠即時解畫:「講我扮少女時代,對住Bob係流口水,好想嗒佢。」

主持:黃柏高
統籌:林永匡
協力:彭子僖
攝影:李維隆、謝民光
化妝:JessicaChan(唐詩詠)
場地:空海(電話:60108932)

 
■要數新年最佳節目必定係入戲院搵部喜劇輕鬆笑下,今日要向大家推介Bob林盛斌孭飛演的爆笑喜劇《我要發達》。
■要數新年最佳節目必定係入戲院搵部喜劇輕鬆笑下,今日要向大家推介Bob林盛斌孭飛演的爆笑喜劇《我要發達》。
■唐詩詠的學生妹造型好pure。
■唐詩詠的學生妹造型好pure。
■工作無停手的Bob經常連踩兩組chur到盡。
■工作無停手的Bob經常連踩兩組chur到盡。
 
■Bob大讚葉念琛用盡方法助他入戲。
■Bob大讚葉念琛用盡方法助他入戲。
■廢柴Bob一夜間發達,還重遇初戀女友唐詩詠。
■廢柴Bob一夜間發達,還重遇初戀女友唐詩詠。
■王光良、河國榮、莊思敏等客串演出,跟Bob玩到攬頭攬頸。
■王光良、河國榮、莊思敏等客串演出,跟Bob玩到攬頭攬頸。
 
■剛升做人妻的孫慧雪化身日本AV女優「波多野雪雪」跟Bob肉搏。
■剛升做人妻的孫慧雪化身日本AV女優「波多野雪雪」跟Bob肉搏。
■Bob坦言很享受這次拍攝過程,學到很多。
■Bob坦言很享受這次拍攝過程,學到很多。
■唐詩詠表示導演要求高,讓她在演技上有所提升。
■唐詩詠表示導演要求高,讓她在演技上有所提升。
回應 (0)
我要發表
user