由大律師轉型做生意 周國豐開一站式男士生活概念店
2017/05/22 08:41:25 網誌分類: 娛樂
已故著名律師周啟邦的獨子周國豐(Brandon),為完成父母心願而當上大律師,不過愈做愈大壓力,因他性格不愛與人爭拗,以和為貴是最好的。所以做了三年,決定轉型做生意,最初走去賣牀褥,但講到至愛都是「西裝」。他坦言,男士都需要有自己的空間,所以在中環開設了一間有男裝服飾、剪髮服務和酒吧的一站式男士生活概念店「Attire House」。男士們可以一邊揀西裝,一邊飲吓嘢,去剪髮、剃鬚都得,好寫意。 主持:黃柏高 統籌:林永匡 協力:李佩儀 攝影:袁東亮、謝民光 場地:AttireHouse 周啟邦是著名律師,所以也想兒子繼承衣鉢。而Brandon不負所望,09年正式成為大律師,不過父母很開明,「佢哋話只要我做咗大律師,之後可以揀自己鍾意嘅路。」Brandon做了三年大律師覺得好大壓力,不大適合自己,「我唔鍾意同人有拗撬、爭論,我鍾意以和為貴,所以做律師同我性格有好大Contrast。」五年前適逢有個機遇,因Brandon時常睡得唔好,令他接觸到牀褥的生意,現時已有兩間分店,但講到夢想都是開一間西裝專門店。 唔好飲悶酒 15年他構思開西裝店時剛巧遇到現時的拍檔Roger,改變了他的想法,不如做個一站式的生活概念店,「嚟呢度除咗揀衫、訂造西裝,仲可以剪髮、剃個鬚,之後上去飲杯Cocktail Relax吓,感覺好似個Private Club咁。」 經典紳士服 當日訪問地點在店內上層的Bar High Five,Brandon知道我鍾意飲酒,特別為我點了杯Gin Martini,味道剛剛好,調酒師有功力。Brandon表示:「一般我哋嘅Cocktail唔會太甜,因為我唔想畀糖醬蓋過啲酒味,咁飲Cocktail先夠原汁原味。」由於我要到內地做電影工作,時常要飲酒,茅台、二鍋頭走唔甩,但如果度數夠、年份高,啲酒又純又靚,絕對不會醉。我與Brandon有個共通點,飲酒要飲開心酒,要飲得輕鬆,千祈唔好飲辛苦酒、飲悶酒。 除了飲酒,Brandon熱愛着西裝,他表示自小已很喜歡,「因爸爸對衣着好講究,好細個已經教我點樣為之一套好西裝,揀咩布料、點樣打呔、袖口鈕點襯,當時我已經好有興趣,加上我去英國讀書,校服都係西裝,到大學畢業做咗大律師,又係要着西裝。」起初他鍾意比較英式的,後來又會留意埋意大利和法國的西裝,他鍾情「Classic Men's Wear」(經典紳士服),「佢哋源自於三、四十年代,重視剪裁、比例同顏色嘅配搭。」 食嘢愛簡單 講到食嘢,Branon崇尚簡單,他笑言:「其實我爸爸好鍾意食嘢,相信亦係佢最大嘅樂趣,但佢唔一定食貴嘢,佢食魚蛋又得、牛腩麵又得,我原則上同佢一樣,平日我鍾意食啲簡單啲、健康啲嘅嘢,喺屋企就三餸一湯,食吓蒸魚或蒸肉餅,出街食碗魚蛋麵都可以,總之好快食完就去做嘢。」無可厚非,香港人生活急促,食嘢好多時都有時間限制,但我覺得美食應該慢慢享受,想Keep Fit,我還有套心得,早餐可以食七至八成飽,午餐食五成飽,而晚餐食得最少、只有三成,9點後就乜都唔好食,但飲酒就例外,Brandon笑我是「Liquid Diet。」有機會要跟他再歎美食、摸吓酒杯底再傾過。 |
| |
| |
| |
| |
| |
| |
| |
|
回應 (0)
我要發表