PACO名人會
PACO名人會
PACO名人會

用心營商40年 楊貫一:堅持才會成功!

2017/07/31 08:41:18 網誌分類: 生活
31 Jul

        中國人愛吃天下聞名,而中華美食中首選鮑魚最珍貴,香港地乃至全世界,講起「阿一鮑魚」肯定無人不曉。今天很榮幸請來名廚楊貫一做我的嘉賓,分享富臨飯店四十年來的營商之道,要知道,經營食店從不容易,而一哥話多年來背着「人無我有,人有我優,人優我更優!」的十三字真言來處事,還即場炮製一哥炒飯給我享用,讀者記得睇片學嘢!

        主持:黃柏高
        統籌:林永匡
        協力:彭保迦
        攝影:袁東亮、謝民光

        七十年代成立的富臨飯店享譽盛名,趁今年富臨開業四十周年誌慶,我特意邀請一哥楊貫一做嘉賓,楊貫一師傅絕對係香港乃至世界廚神No.1,應該要尊稱一聲「廚神」,不過楊師傅好謙虛咁話:「好多人話乜神物神,有啲叫廚神、女神、歌神,我覺得好好笑,次次見到都會笑出聲。打開本字典,神者拜也,生勾勾喺度又點拜?死咗先至可以叫神。其實所謂成功,好多嘢係環境逼成,不成功則成仁。」

        人冇我有人有我優

        其實美食千千萬萬,點解一定要揀鮑魚做招牌菜呢?一哥話除咗因為鮑魚防糖尿病降血壓,養肝明目外,最重要係鮑魚夠名貴,「我覺得做飲食業好艱辛,要點去維持你間店嘅價值呢?普通嘢周街都係,所以我哋揀鮑魚。發明一樣嘢成功唔難,難在個個食完都讚好、讚靚、讚有價值。其實我做咗咁多年都受過教訓,都唔係一下就成功,曾經有好多人對我哋冇信心、好多閒言閒語,但我嘅成功之道係『人冇我有,人有我優,人優我更優!』,揀得最貴嘅食材做主打,當然唔會求其煲腍隻飽魚加蠔油汁就算,煮食有煎、炒、焗,我用嗰種叫『迫』,慢慢『迫』啲靚汁出嚟,再用慢火收汁,咁個汁先叫靚。」

        鄧小平點名上京

        做足四十年鮑魚,一哥話自己一講鮑魚經就沒完沒了。其實一哥威水史講起上嚟一樣沒完沒了。好多香港人都知,一哥煮鮑魚出名到被鄧小平邀請去釣魚台開爐,又試過飛去法國煮畀當時總統和各國政要食,「當年係包玉剛請食飯,鄧小平食到呢一味鮑魚講咗一句說話,佢話冇改革開放就唔會有機會食到好嘢。之後鄧小平請我去釣魚台煮,不過一餐飯要等咁多位重要人物夾啱時間一啲都唔易,我一住就住咗大半個月,有一日行緊故宮突然通知我話第二日就食,嗱嗱聲返去浸發鮑魚、然後漏夜煲天光;之後我又去過加拿大、法國煮畀當地總統食,法國總統最後仲寫咗封信畀我,話因為我煮中國菜煮得好,要我接受佢最崇高敬意……我仲記得去法國時遇上一個好牙擦嘅法國名廚,話佢自己食盡天下美食,唔信我嘅鮑魚有咁好食……結果佢食完呢道菜乜都冇講喺後門走咗去,話冇面見個中國廚師,即係我。哈哈!」

        親自下廚過兩招

        好多名廚為咗保住招牌,都唔會輕易透露煮食秘技畀人知,我好敬佩一哥,佢從來都唔怕公開煮鮑魚心得同方法,話好嘢應該要人人都可以有機會品嚐。想當年,我掹衫尾跟住好朋友試過一哥炒飯,實在估唔到今時今日、八十幾歲高齡,一哥仲係不時會親自落場炒飯。呢一日我哋大家都好有口福,笑談之間,一哥捲起衫袖就話入廚炒個飯畀大家試吓,「講落其實冇咩巧妙,米都係嗰啲米,蛋又係嗰啲蛋,炒得靚唔需要隔夜飯,啱啱煲起嘅飯我一樣炒得起。我鍾意用砂鍋炒飯,因為熱力夠,可以鎖晒所有材料香氣,呢個就係同普通鍋炒出嚟嘅分別。好多人鍾意先落飯再落蛋,我就鍾意先落油炒蛋再落飯,然後配料逐一加入,最後才落葱焗一陣,香味自然會散開,咁樣炒出嚟嘅飯就『粒粒向東』,真正係靚。」聞到已經流晒口水!食完之後仲學到嘢,今晚返去即刻試吓先!
        
 
■楊貫一師傅經營的富臨飯店享譽盛名,今天一聚我獲益良多,他還找來品酒師Jacky陸志文教我用酒配菜,確實別有風味。
■楊貫一師傅經營的富臨飯店享譽盛名,今天一聚我獲益良多,他還找來品酒師Jacky陸志文教我用酒配菜,確實別有風味。
■阿一鮑魚創辦人、世界御廚楊貫一前年獲業界頒發終身成就獎,以表揚他為飲食界作出的貢獻。
■阿一鮑魚創辦人、世界御廚楊貫一前年獲業界頒發終身成就獎,以表揚他為飲食界作出的貢獻。
■煮得一手好菜的楊貫一師傅曾招呼中國前國家領導人李瑞環﹙左﹚。
■煮得一手好菜的楊貫一師傅曾招呼中國前國家領導人李瑞環﹙左﹚。
 
■楊貫一師傅煮的鮑魚入口煙靱,味道濃郁,有機會絕對要食。
■楊貫一師傅煮的鮑魚入口煙靱,味道濃郁,有機會絕對要食。
 
■楊貫一師傅特意走訪日本東北鮑魚場,挑選最頂級的青森特選鮑魚返港以饗食客。
■楊貫一師傅特意走訪日本東北鮑魚場,挑選最頂級的青森特選鮑魚返港以饗食客。
 
■世界御廚主席布路架大讚楊貫一師傅,把中國美食揚威世界。
■世界御廚主席布路架大讚楊貫一師傅,把中國美食揚威世界。
■05年,楊貫一師傅親到山東煙台示範烹飪鮑魚的技術。
■05年,楊貫一師傅親到山東煙台示範烹飪鮑魚的技術。
■富臨早前舉辦慈善晚宴,成功為小母牛籌得港幣223萬元善款,楊貫一聯同飯店董事即場送上其中100萬元的支票到小母牛香港主席梁錦松手上。
■富臨早前舉辦慈善晚宴,成功為小母牛籌得港幣223萬元善款,楊貫一聯同飯店董事即場送上其中100萬元的支票到小母牛香港主席梁錦松手上。
■楊貫一在希臘出席世界御廚協會活動時,獲當時的法國總統接見。
 ■楊貫一在希臘出席世界御廚協會活動時,獲當時的法國總統接見。
回應 (0)
我要發表
user