18~19/7 困局待變~大鱷操控手法

大媽連日走鬼.人民幣急挫拖低大市.港股高開低走, 單日轉向呈陰燭.乾跌屠牛

18/7 周三恒指收報28117, 跌64點(最多下跌136點, 一度上升205點), 連跌兩天

國指收報10578, 跌13點(最多下跌49點, 一度上升110點), 連跌4天, 國指連續兩日跑贏恒指

底頂下移尋底格

踏入本周, 恒指日日底頂下移, 今日高低位28386/28045, 即係明日就要下試28000, 係肥牛區, 有下殺誘因

世界盃曲終人散, 但基金經理回歸卻玩換馬, 沽出人民幣貶值受累股.港元拆息續升美國加息在即沽出地產股.內地政策打壓樓市因而沽出內房股, 資金轉投非權重的公用板塊, 怪不得港股彈散啦!

內地股市跌到走樣, 加上人民幣大幅貶值拖累企業盈利, 大媽要沽港股套現返祖國救亡, 港股通(滬)連續4日出現資金凈流出, 連老外都沽出A股, 人民幣資產繼續遭離棄, 指數雖然仍企28000/10500樓上, 但其實呢兩日唔少指標股都跌到走樣, 等時機一到就會插水屠牛

昨日大鱷殺牛694張, 今日殺555張, 真係陰毒, 唔少指標股都跌到阿媽都唔認得, 但大鱷仍托住大市在28000樓上, 養牛熊及臨危托沽, 大鱷操控大市真係無法無天

昨日預測今日即市波幅一係升穿28400, 一係跌穿28100屠牛, 結果係飛天遁地, 高見28386打回頭，大鱷就隊到落28045食牛扒， 符合劇本，港股繼續底頂下移, 由於近日港股頻頻彈散, 全城看淡, 將BB熊引左落黎, 牛熊都非常貼價, 近日恒指即市波幅閒閒地都有350點, 今日收28117, 代表貼價牛熊都命危, 大方向就要向前底27830進發, 因為月尾通常係創即月高或低位的時間窗口, 要見底後才會再沖頂, 當大鱷食飽肥牛就會上攻屠熊

今日港股高開後沖高打回頭急跌屠牛後尾市拗腰, 收復部份失地, 牛熊齊齊入局, 28000樓下有6串肥牛, 28400樓上只得瘦BB熊, 大鱷會點揀呢? 好淡通殺的話, 食牛先抑或食熊先?

大媽多數係開市初段掃貨, 推高大市, 然後就沽貨走鬼, 所以近日恒指往往係上午10時前見頂, 然後碌落山 , 當半日收市前或午後創即市新高就係利好訊號, 代表有買盤進場, 小米一如元帥所分析, $22見阻力, 又打回頭,

外圍股市表現唔錯, 只得中港股市廝人獨憔悴, 美股既炒業績亦炒經濟好, 道指連升4日, 聯儲局主席鮑威爾昨晚在國會發表證詞表示, 由於美國經濟增長相當強勁, 支持繼續漸進加息, 加息預期升溫, 刺激美元走高, 人民幣午後進一步急瀉, 拖累港股由升轉跌, 在岸人民幣挫355點子, 下破6.71關, 收報6.7145兌1美元, 為去年8月7日以來新低, 離岸價亦跌破6.74關, 創近一年低位, 人民幣弱係中港股市跌市元兇

本周玩左3日, 恒指1升2跌, 過去幾個星期慣性走勢係每周多數升2日, 即係未來兩日會有1天係升市, 上証連跌4天, 收2787, 跌10點, 由6月起, 上証最多跌4日就反彈, 未試過連跌5日, 希望明日阿爺打救, 因為港股多數跟上証, 如上証續瀉, 就會拉住港股落山, 中港股市通常係同步見底頂, 要上証觸底回升, 好友才有藉口反擊, A股升的話, 就會拉住H股上山 

港股難炒在於即市跟上証飛天遁地, 極為被動, 無啦啦急升急跌, 無路可捉, 過去一個月恒指不斷跌下彈下, 股民紛紛企錯邊, 見升追入買到成手蟹, 見插止蝕後即彈, 全民皆輸, 連基金經理都全倉蟹, 削弱入市意欲, 怪不得港股成交萎縮, 連全方位監測港股的燈神經仔通梁蛇上周掃貨即艇亦中伏, 大鱷成功扮跌唔落引人入市接火棒及養牛, 港股連日彈散, 技術指標已轉弱, 明日大鱷要開大餐喇!

7月首周三度跌穿28000大關, 不過由9/7起就一直在28000~29000之間游走, 呢班操控港股的大鱷大媽絕頂聰明, 一時扮強, 一時示人以弱, 就將牛熊引晒入28000~29000之內, 大鱷陰陰嘴笑, 牛熊都要死, 在困局中殺牛3043張.熊1725張, 大市明明走弱, 熊蹤處處, 但大鱷唔想玩單邊向下, 頻頻將大市點穴引牛熊入局, 玩好淡通殺, 夜期偶然收大高水, 開市急升亦嚇走熊熊, 扮跌唔落引好友入局, 貼價牛紛紛入市, 熊熊睇中大方向要落山都要輸, 皆因太貼價, 當牛牛養到肥肥白白, 大鱷就會露出真面目, 失驚無神玩大插插, 大舉屠牛, 當大鱷食飽肥牛就會變臉上攻屠熊

~~~~~~~~~~~~~~~~~~~~~~~~~~~~~~~~~~~~~~~

似曾相識的困局

恒指早前的即市波幅高達400~700點, 但今個星期只得約350點即市波幅, 大市在困局中上落, 我曾多次提及近來港股在28000~29000游走, 就好似以前係30000~31000炒波幅一樣, 當時大鱷係點樣操控港股上落呢?

向上: 股份急升, 推高大市, 突破阻力位, 全城看好, 但略為升穿30800/31000, 又或者升近31000隨即掉頭急跌, 好友中伏(就好似早前沖上28800高見28982的形態, 扮強引牛, 部署日後的殺戮)

向下: 股份破位而下, 拉住大市落山, 全城看淡, 但略為插穿30000, 又或者跌至30000邊即拗腰急彈, 又死唔去, 淡友中伏 (就好似早前插落28013即彈上28715的形態, 引熊入局, 部署日後的殺戮)

偷襲: 大市在30000~31000波動，當人人都以為30000守得住, 好友紛紛入局, 但大鱷卻失驚無神玩大插隊穿30000大舉屠牛殺好倉, 皆因大鱷一直咬住30000唔放, 營造跌唔落的假象, 好友以為30000見支持, 大量牛牛聚集, 惹來大鱷殺機 (就好似過去兩周的形態, 扮守得住28000, 其實暗藏殺機, 大鱷養緊27500~28000牛), 當股民見失守30000紛紛跟勢做淡又中伏, 因為大鱷往往係趙完鬆, 秒殺肥牛即彈高, 重返波動區內又磨過, 連下移的熊熊都要死

回顧以前港股係30000~31000游走時, 大市每次上沖或下跌, 都係殺氣騰騰, 極具震懾力, 無啦啦急升暴跌, 升跌都似層層, 令人以為會破位走單邊, 散戶紛紛跟勢追入(見跌買跌.見升買升), 貼價牛熊進場, 結果呢? 牛熊不是陣亡, 就是止蝕收場, 因為大鱷玩估佢唔到, 唔俾股民捉到路, 升升下突然掉頭插水, 跌跌下突然拗腰急升, 失驚無神轉向, 好友淡友都走避不及, 大鱷就奸計得逞, 好淡通殺

當時大鱷就一直咬住30000~31000來托沽, 每日都有亮點股爆升來吸引眼球, 以維持市場氣氛, 扮跌唔落, 其實唔少股份都跌到走樣但指數卻在區間內上落, 在困局中升唔起.跌唔落, 原來時辰未到大鱷唔想爆邊住, 想磨下炒窄幅, 目的係溫水煮蛙式派貨, 熊市正路向淡, 但大市頻頻急跌急彈就嚇到遠牛熊都止蝕, 貼價牛熊亦要死

結論係雖然熊市港股大方向要落地獄, 但由於大鱷唔想俾股民捉到路搭順風車獲利, 所以會頻頻變臉, 在困局中不斷轉向, 升跌瞬間變陣, 半日或過夜已變天, 震到失暈, 令股民無所適從企錯邊, 好友淡友都要死, 所以入市有得賺就要快閃, 否則會成為大鱷的點心,

大鱷最鍾意追住重倉牛熊來殺(包括指數.個股牛熊及好淡倉), 大鱷最擅長捉心理, 營造向好或向淡氣氛, 其實係“明修棧道，暗渡陳倉”, 一方面殺好友, 另一方面就暗地裡部署日後變臉上攻屠熊, 大鱷好淡通殺就可獲得最大利潤, 試想想, 如果單邊向下, 全世界都做淡, 大鱷落山屠牛殺好倉, 但卻要輸俾淡友, 得不償失之餘, 亦要冒著阿爺出招救市的風險, 頻頻轉向好淡通殺大鱷的風險係最細, 成本低.利潤大, 派貨亦容易好多

中港股市通常係同步見底頂, 港股何時脫險就要睇上証及QQ表現, 大媽耐不耐大手掃貨, (好似12/7狂掃貨推動港股向上), 企業密密回購, 阿爺出手又出口護盤, 美股打不死又炒業績, 都會窒礙港股下跌步伐, 做淡亦要睇位落車, 大鱷素來唔鍾意炒單邊, 一見底就會拗腰急升扯住上, 一遇上阻力又跌過, 散戶要跟住大鱷來變臉, 否則就會左一巴右一巴, 屎無全C, 當人人對升勢或跌勢猶豫唔信, 代表趨勢未完, 當人人單邊看好或看淡就係轉向之時

港股高開低走.單日轉向呈陰燭.港股底頂下移繼續尋底.明天破日肥牛命危

19/7 周四恒指收報28010, 跌106點(最多下跌119點, 一度上升212點), 連跌3天

國指收報10523, 跌55點~收市U盤, 一度上升121點, 連跌5天, 國指跑輸恒指

慣性走勢具啟示作用, 如果應升不升(例如上証今日應收升), 就代表唔對路, 大市未見底, 恒指連續四日底頂下移, 今日低見27998, 代表明日會插穿呢個水平, 磨左個幾星期, 28000樓下牛牛已經養到肥肥白白, 大鱷流晒口水, 明日破日開大餐喇!

國指早市跑贏恒指, 但多隻內銀股尾市跌勢加劇, 以全日最低位收, 拖累國指轉弱, 以收市U盤全日最低位收, 形勢不妙, 港股有六成股份係中資股, 人民弊貶值港股必死, 要人民幣回穩港股才有活路, 要密切監察美元及人民幣表現, 係港股升跌關鍵

港股先高後低又彈散, 午後倒跌皆因人民幣跌勢轉急, 失守6.77關, 全日急挫589點子, 收報6.7734兌1美元, 創逾一年新低, 聯儲局主席加息言論推高美元, 美元創一年高位, 令人民幣進一步承壓, 加速走弱, 港元愈走愈弱, 貼近7.85, 受美元強勢拖累, 商品價格下挫, 金融市場冇運行, 道指連升5日都係時候回吐喇! 連升後通常都會嘔

按照慣性走勢, 收跌月會在該月下旬創即月新低, 收升月就會係月尾創即月新高, 由於恒指月波幅未達標, 即係往後一定會插穿前底27830(肥牛區), 亦有可能會再上29000, 過去兩周大鱷一直用拖字訣養/殺/震牛熊, 上周沖上去屠殺貼價熊及震走遠熊就掉頭向下, 每次跌至關鍵大位都窒窒步, 扮跌唔落來養牛熊及派貨, 今日失守28000, 全場最肥牛牛在27800, 引死大鱷, 牛牛要買定官才,

牛在27958水平+約二千張重倉牛在27800 VS 瘦熊在28388水平(增肥中)

明日要睇下會否一插即彈, 走番上去又磨過, 再引牛入局, 或者上去殺貼價熊, 上証連跌4天今日應彈, 但卻連跌5天, 明日上証亦可能會補升作出反彈, 換句話說, 明日插水屠牛後大鱷可能趙完鬆, 彈番上去再養牛熊, 部署下周的殺戮, 月尾可能係牛熊通殺, 未必單邊向下

上周我話大鱷嫌28000樓下牛唔夠肥, 所以一直扮守得住28000, 目的係引牛入局, 因為27800/28000等關鍵大位附近必定會吸引牛牛聚集, 大鱷就特登忍忍手, 等重倉牛埋位才展開大屠殺, 而家牛牛愈養愈肥, 時辰到了, 開餐!!!!

今日28000牛陣亡, 27500~29000仲有5串肥牛, 未必會一鋪清袋, 又睇下大鱷想分幾多餐來吃, 可能秒殺肥牛即彈又扮跌唔落來繼續養牛熊, 因為大鱷亦要預留下周的波動空間, 未必會一步到位見大底, 除了牛牛命危外, 太貼價熊下周亦會有生命危險, 月尾追數大鱷會好淡通殺, 大媽走鬼拖累港股倒跌, 上証及國指連跌5日, 隨時會有反彈, 因為今個星期未升過, 恒指亦欠1日升市, 再插亦會有補空倉買盤推高大市,

磨到今日恒指終於隊穿28000大關喇! 尾市愈跌愈急, 臨收市低見27998後跌幅略為收窄, 收28010, 大鱷話今日食左512張BB牛只係前菜, 未夠飽, 正部署明日食27800二千多隻肥牛早餐, 明日港股表現就要睇上証, 港股會一跌到尾抑或一插穿27800就拗腰彈番上去呢? 因為港股即市走勢多數跟上証, 短炒要快閃, 因為半日或過夜已變天

全民皆艇, 入市意欲低, 斬倉潮暫緩, 令港股即市波幅收窄, 恒指即市波幅已經由早前的400~700點縮減至只得約350點, 以今日收28010來推算, 明日如一係上破28100, 一係插穿27800, 如QQ失守$375, 恒指就會插穿28000, 如果QQ守得住$375就可穩住大局

明日老美好似公布第二輪加關稅清單, 小米亦要納入乜乜指數, 明日破日+下周一轉節氣大暑, 係變盤的時間窗口