20~21/2 尋頂屠熊部署結算位
港股高開高收呈陽燭, 貼價熊陣亡, 貼價熊命危
20/2 周三恒指收報28514, 升286點(最多上升371點)
國指收報11229, 升112點(最多上升176點), 國指跑贏輸恒指
人仔強推動港股創即月新高.繼續尋頂
狂人要中國承諾不讓人民幣貶值來應對加關稅, 人仔爆升係港股破頂的動力之源, 以周及月波幅來看, 今日高位28599不是頂, 按照慣性走勢, 月尾最後一周(20~27/2)係創新高的時間窗口, 今日就創2月下旬的第一個新高, 升勢未完, 港股係俾上証拉住上山, 因為中港股市通常係同步見底頂, 而家係齊齊尋頂,
今日港股向上突破, 明日(周四)大鱷繼續推升挑戰28800已無懸念, 但後日(周五)通常有周末沽壓效應, 過去3個星期五都係跌市, 不過市強多數係作出即市調整, 結算在即, 好友不會輕易放手
今次升浪會上破29000已無懸念, 而家最想唔通係大鱷會否本周忍忍手暫時唔上29000, 預留多些上升水位俾下星期及3月, 因為如果呢兩日就殺上29000超級阻力大位, 就會惹來獲利沽壓, 好難一直托到下周三結算, 反正28600~29000有肥熊約5000張, 具吸引力, 可以食左先, 由於目前29100樓上只得瘦熊(大鱷通常會等大位有超過4000張牛熊才會出手), 仲要養下先, 愈遲吃愈肥, 加上牛牛上移, 亦會拉住港股後腿, 2月玩細波幅, 今個月的高位不會是大頂
今日高見28599就掉頭, 詐死扮受制於28600係大鱷一貫詐死養熊引淡的手法, 一路窒窒步推升來消化沽壓, 震走好友(今日牛食胡.熊大舉進場), 曾說過當大位有超過4000張熊大鱷就會出手, 如今時辰到了, 28600~29000有5053張熊, 向上關鍵阻力大位在28800, 升穿有運行
~~~~~~~~~~~~~~~~~~~~~~~~~~~~~~~~~~
試底(27845)==>沖頂(28489)==>試底(28208)==>沖頂
恒指2月向上目標:
27534(8/2低位) + 1300~2000點月波幅 = 28800~29500
關鍵位: 27500.27800 VS 28000.28300.28500.28800.29000(反彈熊市跌幅一半)
由於今個月恒指高低位 27534~28599, 波幅只得約千點仍未達標, 代表後市仍會向上擴大月波幅, 去年初恒指連升7周見大頂後就反艇, 今次連升6周, 上周就收跌, 升勢提早斷纜未升到盡反而係好事, 估計大鱷只係用拖字訣, 想一路消化沽壓一路推升, 順道養牛熊, 本周仍有望收升，港股慣性走勢係跌完就會收復失地並升突
港股繼續底頂上移向上推進來屠熊追數, 今日低見28357, 守住昨日低位28208收28500關鍵位之上, 底部繼續上移釋出利好訊號, 昨日港股回吐, 今日就收復失地並升突, 重上250天線, 強勢畢現
2月開局以來恒指一直在約千點內窄幅波動, 大鱷利用消息借勢抽升殺跌, 目的係營造波幅來搵食, 大鱷見港股28500/11200阻力大, 唔想冒風險太早推港股出外太空, 所以遲遲未上28800, 但拖到月尾臨近結算時辰到, 今日港股終於爆邊, 創即月新高28599, 收升月會係該月下旬創即月新高, 本周係好淡大鱷角力的關鍵周, 結果今日就向上突破, 好友再勝一仗,
恒指自去年29/1見牛市大頂33484後展開熊市大跌浪, 跌至去年30/10低位24540, 反彈0.382倍的黃金比率為27956, 100周線(27953), 50周線(28144), 28200~28500(當中有250天線及20月線)都係關鍵大位, 但都一一突破, 買盤強得不尋常, 如能企穩3天利好
~~~~~~~~~~~~~~~~~~~~~~~~~~~~~~~~~~
底頂上移尋頂格
今個月港股波幅窄, 通常最後一周就會爆邊來擴大月波幅, 大市波幅窄除了因為2月交易日數少以及貿易談判消息紊亂之外, 亦係因為港股現正處於去年第三季的波動區26219~29083之內, 蟹貨多到不得了, 亦要時間消化沽壓, 大鱷亦想係關鍵大位前詐死來養熊引淡
昨日港股技術指標略為轉弱, 今日上証沽壓亦加劇, 但港股買盤強總是一插即彈, 今日港股飛天屠熊, 真係佩服操控港股的大鱷! 今日殺熊1152張, 收市U盤好友又出手, 大幅踢高42點, 貼價熊肥到不得了, 看來明日港股會有新高, 大鱷今日放生28200附近的牛牛, 一開市就衝上去屠熊, 代表向上殺熊數量足可抵消放生貼價牛的損失, 今日食一口熊只係前菜, 主菜及甜品在後頭
老外繼續大手掃A股, 但港股通(滬)連續兩日出現資金凈流出, 大媽趁反彈食胡減磅及換馬, 沽出內銀及QQ(MSCI減比重股)就令大市升幅收窄, 不過就掃港交所及吉利, 怪不得兩隻嘢爆升, 港股真係冇得分析, 跟住上証飛天遁地
近日頻頻傳出中美90日談判期限1/3可以延長60天, 即係1/3中美就算未能達到全面協議, 仍可繼續談判, 只要有憧憬就有得炒, 原先估計1/3前的沽壓亦可暫緩, 可以繼續炒上, 不過當大市上到29000~29500區間, 短炒獲利沽壓就會出籠
QQ好友繼續作出重倉部署, 亦係QQ餐餐沖高回落的原因之一, QQ及內銀近日高位沽壓大增, 可能係受28/2 MSCI調低比重所拖累, 投資者趁股份彈上去偷步出貨, 博低位才補回,
~~~~~~~~~~~~~~~~~~~~~~~~~~~~~~~~~~
中港股市牛味漸濃
有數據顯示新興市場連續7周錄得資金凈流入, 怪不得今次港股升勢有資金牛的味道(一月兩篇網誌~資金市/2019熊轉牛~已詳列理據),
今個月港股由好友主導, 往往係一回即彈, 通常跌1天, 最多跌2天就會收復失地再創新高, 結算前好友應不會放手, 大鱷似乎想在250天線樓上結算, 所以上企後就一直咬住唔放, 中港股市多數係同步見底頂, 只要上証未見頂, 港股仲有得上, 按照慣性走勢, 無論本周高位在那個水平, 下周都會有新高
從近來中港股市表現來看, 投資者追捧A股, 上証愈升愈有, 推動港股向上, 大漲小回, 兩地股市牛味漸濃, 近來內地股市成交增加, 市場氣氛升溫, 上証站穩2700大位後向2800進發, 亦係港股守得住28000/11000的主因, 只要上証收復2800, 恒指就有望上破29000, 已有上証牛派指上証正處於牛市一期, 會上破3000大關, 中港股市交投熾熱代表內地散戶信心增強, 蜂湧入市, 有助推動中港股市更上一層樓
中美本周進行新一輪高級別貿易磋商, 而特朗普亦會在周五(22/2)會見中國副總理劉鶴, 市場亦頻頻傳出貿易談判的好消息, 加上阿爺密密推出救股市救經濟政策, 市場出現正面反應,
自從農曆長假期復市後, 滬深股市成交明顯增加, 一路推動上証爆上2700水平, 踏入2019年, 老外經滬深股通積極掃A股, 今年滬深股通淨買入A股金額高達千億 是去年全年的三分之一, 已經有分析師說上証今年會進入牛市, 股市有水則生, 怪不得上証愈升愈牛, 亦帶動港股連環突破多個阻力位見28599, 創半年新高仍未有見頂跡象
~~~~~~~~~~~~~~~~~~~~~~~~~~~~~~~~~~
留力養熊引淡
周一曾經講過以大鱷操控大市的能力, 一兩棍就能殺上28800.29000, 但大鱷卻留力, 刻意拖慢上升步伐, 因為唔想本周就爆上29000
~ 部署今個月收陽收升, 即係28/2收28193樓上, 代表未來兩周大鱷會力守呢個水平
~ 有分析指熊市好難連升兩個月, 1月收升, 如2月亦收升, 就打破了熊市的規律, 股民就要思考是否元帥於1月所說的今年熊轉牛
~ 大鱷壓住大市窒窒步升來消化沽壓, 等250天線下移就較易收復, 養熊引淡震好友牛牛, 當累積大量淡倉, 一挾淡港股就會爆升
~ 如果本周初就爆上29000, 就要花好多子彈托住高位到下周三結算, 愈遲殺上去29000熊熊就愈肥, 只要拖到有利好消息就會爆上去
~ 恒指量度升幅要上29600水平, 大鱷唔想一步到位, 因為要預留上升空間營造頂部持續上移的向上趨勢, 亦要預留上升空間俾結算前幾日, 試想想, 如果今日就上企29000, 每日波幅三四百點, 每周波幅閒閒地700點, 未來兩日頂部上移的話, 2月尾就會見30000, 但現時29200樓上只得瘦牛, 要俾時間養熊引淡, 大鱷亦要預留上升空間俾3月, 所以大鱷玩跌下彈下, 壓住大市升勢, 但亦唔俾深潛, 以時間來代替深度調整
21/2 周四恒指收報28630, 升115點(最多上升245點, 一度下跌149點)
肥熊陣亡+消化沽壓+養熊引淡+部署高位結算
趴街大鱷真係陰毒, 今日港股再創新高28759逼死淡友, 午後沖高秒殺肥熊及擴大周及月波幅後, 就急回收窄升幅, 早市走鬼的淡友欲哭無淚, 大鱷又再玩養熊引淡, 淡友繼續湧入, 真係要買定官才,
資金市港股幅走勢圖愈畫愈靚，今日恒指10天線升穿250天線出現黃金交叉利好訊號, 明日如有回吐, 市強只會作出即市調整或小幅下跌, 震完又會再創新高, 一如過去幾日所說, 大鱷或會留力, 暫時唔上29000, 預留多些上升水位俾下星期及3月, 亦會撐埋結算,
呢兩日上証及港股高位見沽壓, 去到28800關鍵大位好淡角力白熱化, 過去3個星期五恒指都係收跌(隨後的星期一例牌反彈收升, 反映大升前都會震一震倉), 明日港股升跌就要睇上証及權重A股生唔生性, 由於今個月好友力撐大市, 加上臨近結算, 港股亦有可能打破慣性走勢不跌反升,
由12/2起, 港股日日成交都超過$900億, 今日成交進一步急增至$1150億, 為今年第二大成交, 回顧13/2港股成交創今年新高$1210億, 翌日就收跌65點, 匯控今日除凈, 收息後好息之徒通常會走貨, 明日匯控沽壓亦會增加, 美元守住96.3略為反彈, 美國十年期債息連升兩天亦對港股構成壓力, 不過中美貿易談判頻頻放風話講掂數, 淡友節節敗退, 處於下風, 而好友就得勢不饒人, 5G 及大灣區慨念仍在熱炒, 代表市場氣氛佳, 所以大市往往一跌就彈, 不會在低位徘徊,
中港美3地股市齊齊尋頂, 不過道指(26000).上証(2800).恒指(28800)同步去到關鍵阻力大位就窒一窒, 不過2月由好友主導, 如有回吐，向下好友只要守28300~28400水平就利好, 向上就要再挑戰28800~29000, 不過今日大媽沽出QQ及內銀
~~~~~~~~~~~~~~~~~~~~~~~~~~~~~~~~~~~~~
老外繼續大手掃A股, 但內銀內險資源商品A股全面下跌, 港股通(滬)連續3日出現資金凈流出, 大媽密密收割, 趁反彈食胡減磅及換馬, 不過屠熊大鱷及好友食得晒大媽的沽盤, 推升之心表露無遺, 港股連升兩天繼續尋頂屠熊之旅
本周高位: 28186(周一低位)+起碼700點周波幅=28886或以上
港股技術上已連續2日站250天線之以上, 續創半年以上高位, 強勢畢現, 成交亦配合升勢, 如本周玩細波幅, 明日未能升抵28886水平, 就有可能係大鱷留力及養牛熊, 如本周收28800樓上, 下周大鱷想連升兩周就要1/3企28800樓上, 亦要殺上29000才夠周波幅, 不過要小心又會好似早前突破28000, 第一次上破只係試水溫, 會有後抽落28800, 回氣後才破頂
3月份港股會繼續受貿易戰消息左右, 亦有英國脫歐, 2月中至3月係港股企業業績期, 3月基金埋季結, 去年輸到嘔, 今年賺到開巷或會收割來鎖定利潤, 19~20/3 聯儲局議息, 今次會否加息極難預測，金融市場勢必大幅波動，2019年第一次水星逆行就在5~28/3, 絕不會是巧合, 估計港股於3月獲利沽壓會大增, 學陸蛇及高手網友話齋: 要自己執生
~~~~~~~~~~~~~~~~~~~~~~~~~~~~~~~~~~~~~~~~~
2019年2月25日 (筆者: 智易東方證券行政總裁藺常念)
特朗普要宣佈國家進入緊急狀態，動用國防部的資金，來建墨西哥圍牆。但是16個民主黨控制的州，控告總統，令到特朗普施政受到阻撓。因此特朗普急需外交勝利，來對沖他內政的失利。現在的民調特朗普支持席只有約45%，極有可能在11月總統連位大選輸給民主黨候選人。所以特朗普需要在二月底和北韓領導人金正恩達成放棄核武協議，在三月和中國達成貿易協議，用外交成就，來突顯特朗普的領導才能及成就，提高民意支持。
