3~8/11 24800穿梭.好淡通殺

3/11 周三恒指收25024, 跌75點, 連跌7天

熱錢持續流走拖低港股.25000危危乎

恒指一如所料破底創月內新低, 周波幅勉強達標, 但月波幅遠遠未達標, 仍有下跌空間, 大方向要隊穿24500, 不過今個星期港股未升過, 加上道指恒指差距爆燈, 斷估未來兩天港股不會全跌, 點都會有死貓彈, 失守25000後下一個關鍵大位在24800, 今早低見24808即彈, 除了因為大鱷今日嫌24800樓下貼價只得瘦牛, 想養肥拖多一陣才殺, 亦可能係今晚聯儲局公布議息結果前會有短炒淡友食胡, 亦有可能係博反彈買盤進場, 大戶出貨, 散戶接貨, 唔係好現象

對於技術派來說, 只要守得住24800代表由23681展開的反彈浪仍未破壞, 亦係今日好友力守24800的主因, 只要不插穿, 技術派好友就會進場幫手推高大市,

貼價BB熊今日出世, 熊熊大幅下移至25350附近, 以往大跌浪見熊熊大幅下移就係反彈先兆, 港股磨左成日, 好友牛牛亦飛撲入市, 24500~24800有超肥牛, 不過要破底才有得吃, 大鱷成功養肥牛熊, 準備開大餐, 整體牛肥熊瘦, 12042牛 VS 7928熊,

每當熱錢流入或流走, 由於金額大威力強, 往往令港股慣性走勢失效, 例如上周國指反常地日日收跌, 已連跌8日, 恒指連跌7日, 港匯弱勢持續, 熱錢流走, 曾低見7.7845, 不過我從未見過國指連續兩周日日跌, 加上港股超賣, 會有後抽技術性反彈, 今晚聯儲局公布議息結果, 每逢有財經大事股匯債都會有大變, 所以要看今次跌浪會否逆轉, 明日要留意今日高低位24808~25187點爆邊, 如果大鱷暫時唔想破底, 就要上破今日高位25187來擴大即市波幅, 彈完才破底都得

恒指由高位26235插到落今日低位24808, 累計下跌1426點, 短炒淡友夠水位食胡了, 就算港股今個月未見大底, 不過從時間及波幅來看, 港股都應跌下彈下來派貨, 不應直落插穿24500.24000,

上証失守3500大位, 收3498, 跌7點, 連跌3天, 上証通常連跌3~4天就會反彈, 只要穩住上証, 利好港股, 中港股市多數係同步尋底, 只要上証冇跌穿昨日低位3477, 好友就有藉口守住今日低位24808, 拖得一日得一日, 牛牛就會愈養愈肥, 目前牛牛有超過12000張, 罕有地多牛牛, 早晚要歸西

QQ熱錢莊家撤退, 交棒俾大媽護盤托沽, 港股收窄跌幅全靠QQ托市掩護其他股份走鬼, QQ先低後高收陽收升, 低見$457.8, 叻仔力撐大市, 釋出利好訊號, 不過QQ冇左莊家推升, 向上$482阻力大, 沽空亦多, 呢幾日QQ仍沽壓沉重, 大鱷積極沽貨, 而散戶卻入貨, 昨日滬深大媽齊齊掃QQ, 但今日唔齊心, 滬大媽走QQ, 深大媽掃QQ護盤

美股愈升愈有, 屢創新高, 美股牛氣沖天吸引熱錢回流炒作, 港股卻走資, QQ美團阿里等大股沽空增加, 今日港股收市表面上跌幅不大, 但卻有濃濃的托沽味, 匯控.友邦.快手.港交所等多隻股份都見洗倉盤, 大媽連日密密沽藥明生物, 今日更狂沽小米

近來港股雖然日日跌, 但以收市計約1100點跌幅不算大, 25/10收26132, 今日收25024, 大鱷似在刻意營造利淡氣氛, 引股民止蝕止賺沽貨走鬼, 幫手推低大市, 而一直咬住25000唔放就可引博反彈好友入局, 亦可嚇退淡友, 當好友淡友埋晒位, 大鱷就可擇肥而噬, 上攻下殺, 試想想, 以往插一兩日都有逾千點跌幅, 今次連跌7日才是1100點, 大鱷大費周章玩連跌, 必有所圖, 似乎唔想炒單邊向下, 係想上攻下殺, 好淡通殺, 牛熊都要死

4/11 周四恒指收25225, 升200點, 結束7連跌, 受制於50天線

乾升挾淡.好淡通殺

QQ莊家已撤退, 由大媽操控QQ上落, 反而冇左莊家沽盤制肘, 大媽推高QQ來派貨, QQ連升兩日, 為QQ見頂$515回落以來首度出現連續兩日收升收陽, 係推高港股的功臣, 不過今日高見$481.8, 剛好去到阻力位$482, 向上$487阻力非輕, 今日夾硬於收市U盤踢上$480.8收, QQ蟹貨多, 明日沽壓到, QQ及港股今日升勢亦冇大成交支持, 係乾升挾淡, 今日港股升市但下跌股份多, 並不配合升勢, 係臨危托沽

債務違約.降評級.業績欠佳等利淡內房壞消息頻傳, 屋仔反艇, 拖累內銀內險股表現, 大媽走工建行及藥明生物, 淡友借屋仔壞消息早市一度推低大市, 恒指低見25010, 好友就藉著美股創新高以及內地股市彈高來反擊, 最終好友險勝, 港股收升收陽, 結束連跌浪, 不過一如日前所說, 港股只會有死貓彈, 因為以周及月波幅計, 港股仍有下跌空間, 後市仍會有新低, 打穿24808就要向24500進發, 500點級級落

中港股市同步結束連跌作出反彈, 明日關鍵位25377/8961, 必定會有淡友攔路, 明日會有周末沽壓效應, 好淡大鱷亦要畫周線, 只要破底隊穿24808/8772就可擴大波幅, 要看淡友會否乘勝追擊食到盡, 明日港股食粥食飯睇QQ及上証, 今個星期收跌的話, 周三四五係創周低位的時間窗口

上証今日冇創新低, 今日港股亦跟隨冇創新低, 齊齊上山, 近日美元在94穿梭, 只要守住93.5仍屬強勢, 人民幣連升3天, 但本港熱錢流走, 港匯仍弱, 通常聯儲局議息後股匯債都會有大變, 今晚美元急升上企94.3, 淡友又有藉口反擊, 沽空仍高企, 淡友又趁反彈加沽, 港股下殺危機未除, 想企穩25000殊不容易, 牛勁多, 牛肥熊瘦拉住港股後腿, 12266張牛 VS 7439張熊, 牛在25000 VS 熊在25250, 肥牛在24800之下, 大鱷成功養牛熊, 明日要開大餐, 港股成交細, 操控易, 即市波幅三四百點抽升殺跌係易如反掌

24500好淡攻防戰

5/11 周五恒指收24870, 跌354點,

尋底市每周有新低, 估計下周會跌穿本周低位24724來擴大周及月波幅, 要看大鱷會否守住24500勒住來跌, 不急於向24000進發, 只要守住24500大位, 就可吸引買盤進場, 挑戰25000

10月展開反彈浪以來港股累積龐大沽空, 本周空軍仍未收手, 今日沽空突然急增至16.31%, 為21/10以來最高, 淡友加沽不少股份, 必有所圖, 要看周三QQ公布業績前淡友會否平倉食胡, 只要滬深大媽齊齊掃QQ, 就能穩住港股

早已說過美企公布業績後回購活動就會推動美股向上, 到目前為止回購金額已有逾萬億美元, 怪不得美股屢創新高, 道指恒指創史上最大差距, 高達11254點, 以往每當差距超過10000點, 恒指就會急彈追落後, 今日港股卻反彈乏力, 愈跌愈有, 代表港股出事了, 港股及上証弱雞連跌兩周, 美股連升5周破頂而上, 這就是美股炒業績及大手回購的威力

美元強勢上企94, 一度突破94.6, 港匯弱, 資金流走, 恒指近日雖然在25000穿梭, 仍未破今年大底, 但其實唔少股份都洗倉式下挫, 大鱷托沽, 估計洗倉潮未完, 內房債務違約愈演愈烈, 避險情緒升溫, 每當熱錢大舉沽貨, 港股就會大跌一浸

牛肥熊瘦拉住港股後腿, 11852張牛 VS 7706張熊, 牛在24700 VS 熊在25100, 港股成交細, 操控易, 即市波幅三四百點抽升殺跌係易如反掌

上証收報3491, 大跌35點, 收3500之下, 恒指亦收25000樓下, 看來港股要等阿爺打救,
下周一召開六中全會, 要上証重上3500, 好友才有藉口反擊

新地下周一除息$3.7，會失守$100, 好息之徒或會獲利沽貨,

8/11 周一恒指收24763, 跌106點, 連跌兩天, 大舉屠牛

今日恒指隊穿上周低位24724, 向下擴大周波幅創月內新低24633後即彈, 明日輪到升穿今日高位24837向上擴大周波幅, 技術指標弱雞, 股份市寬及RSI反映港股仍處尋底趨勢, 熱錢流走, 不過技術上會有後抽, 先行作出反彈, 假設大底仍未出現, 彈上去擴大周波幅, 如仍受制於25000, 就會再插穿今日低位24633繼續尋底, 下試24500關鍵大位

大鱷有可能扮守得住24500做頭肩底, 彈上去屠熊, 引好友入局, 溫水煮蛙式派貨, 逼死淡友, 然後等美股/上證反艇, 就插穿24500落地獄, 做雙底, 要失驚無神抽升挾淡, 扮見底, 引股民入局

~ 今日恒指收市跌106點, 好少見周一收跌幅度這麼細, 似在醞釀反彈, 亦可能係點穴養牛熊, 部署開大餐

~ 初生BB小熊已下移至24858, 肥牛在24628, 向下級級有肥牛, 一路排到落24000, 目前牛熊都非常貼價, 上攻下插, 牛熊通殺機會大, 牛12755張 VS 熊8062張, 牛肥熊瘦會拉港股落山,

~ 24500係關鍵大位, 今日落到24633見少量買盤進場, 可能係QQ業績前淡友低位回補空倉, 可能係博反彈買盤入場

~ 港股收市跌幅不大, 但VSHI恒指恐慌指數卻急升4%, 代表港股下殺危機未除, 後市仍會有新低

~ 差不多日日都傳出內房債務違約消息, 利淡市場氣氛, 港股一彈上去就惹來沽壓

~ 港股成交縮, 人人都等周三QQ公布業績

~~~~~~~~~~~~~~~~~~~~~~~~~~~~~~~~

~ 昨日轉節氣立冬, 預示將會有大變, 本周破底係無可避免, 要置諸死地方能重生, 恒指由26/10見頂回落, 回吐兩周, 時間及跌幅都預示本周要大插創新低, 淡友食胡後就會大反彈,

~ 恒指10天線跌穿50天線, 出現死亡交叉, 出死叉通常會走相反, 作出大反彈，大鱷今日食了肥牛, 彈上去食埋貼價熊都得

~ 港股出死叉代表跌浪已維持了一段長時間, 大鱷通常係好淡通殺, 殺完好友就會變臉殺淡友, 所以跌夠就會急彈, 牛熊都要死

~ 過去兩周恒指每星期只升1天, 斷估本周不會只升1天這麼少, 正常市況每周升2~3天, 市弱升1~2天

~ 唔計2/11見短頂25639那天, 近來恒指每日即市波幅約200~400點, 以即市波幅及周波幅彈上25000不難, 如打回頭, 就要插穿24500來擴大周及月波幅

~ 24500或會有小淡友食胡, 不過港股驚嚇的一棍仍未出現, 連續兩日沽空增加, 大淡友博落去24000, 各有所圖

~ 今日恒指最多跌237點, 唔少指標股於低位見買盤, 一插即彈, 可能係空軍趁熱錢流走, 港股碌落山, 見價殘回補空倉

~ 上証及美股升, 拉住港股死唔去, 港股收窄跌幅

~~~~~~~~~~~~~~~~~~~~~~~~~~~~~~~~

~ 美元匯價由15個月高位94.634回落, 人民幣反彈, 上証亦反彈, 港股收窄跌幅, 不過港匯進一步走弱, 報7.7885, 熱錢持續流走, 怪不得港股破底, 如港匯弱勢持續, 港股彈散容易彈高難, 大淡友等緊美股或上証反艇來做助力殺跌

~ 大媽大手沽出美團.內銀及藥明生物, 老外亦沽A股, 如大媽及老外繼續走貨, 個別股份洗倉式下跌, 全民皆艇, 削弱反彈動力

~ 中港股市多數係同步, 如上証未能重上3500, 又或者跌穿月初低位3477或今日低位3484, 港股破底機會大增

~ QQ業績, 阿爺開大會, 都會令港股出現變數, 有QQ淡友於業績前推低QQ來回補空倉, 導致QQ急插急彈

~ 全靠大媽掃10億元QQ, 否則今日已插穿24500, QQ一度大插低見$453.4創一個月新低, 其後見空軍補空倉買盤, 推上$463.8收, 跌幅明顯收窄, 走勢與港股同步

~ 大媽大手掃QQ, 好耐冇見買入這麼多, QQ沽空增加, 要靠挾淡才能推高港股

~ 10月初港股觸底反彈, 尋頂期間升市日數遠遠多過下跌日數, 逼死淡友, 今個月係翻轉版, 尋底期間跌市日數遠遠多過上升日數, 逼死好友

~ 周三四五係創周高低位的時間窗口

~ 港股出現漫長的跌浪, 股民灰心, 入市意欲低, 要失驚無神抽升挾淡, 扮見底, 才能吸引股民入局

~ 基金界仍看好美股, 因為升勢有靚仔業績配合, 亦有白宮刺激經濟措施做後盾, 基金經理仍熱衷炒牛氣沖天的美股, 表示逢跌買上, 但對處於熊市的港股興趣不大, 有基金經理估計今個月恒指月波幅會比10月細

=====================

有分析指德師奶有勁多好倉係今次轉勢的其中一個原因, 馬斯克借股民把口來做藉口沽出德師奶獲利, 是否股市殺跌的催化劑? 美企車股反艇的話, 比亞迪等一眾車股會如何? 車股莊家會托沽抑或鬥快走鬼? 中港美股市會點走?

馬斯克在線詢問是否應沽售 Tesla 10%股票套現交稅
<匯港通訊> 電動車 Tesla(特斯拉)創辦人馬斯克在社交網絡在線向追隨者詢問,他是否應該沽售手上所持有的10% Tesla 股票, 又聲稱他會按網民意見行事。 Tesla 上周收市價每股約值1222美元,估計馬斯克所持有股票總值約值3000億美元(約2.34萬億港元)。

=====================