經貿雙循環 企業要追「數」
2021/12/10 04:12:21 網誌分類: 經濟
我代表公司出席過幾次峰會，感覺是嘉賓分享相當高質，為與會者帶來極高養份。今次大會主題是「十四五規劃．經貿雙循環」，我參與了其中一節專題討論，從流動通訊營辦商角度介紹一下5G通訊技術及物聯網於工業數碼化擔當嘅角色。
我哋近年所講嘅物聯網、智慧城市、數碼化及再工業化等，全部需要透過流動網絡作為傳輸媒介，所以世界級嘅網絡基建必定係首要條件，而香港網絡基建以及流動通訊嘅滲透率都係喺全球領先嘅位置，喺早前特首嘅《施政報告》已經指出香港嘅5G覆蓋範圍同穩定性分別排行全球第一及第二，而喺另一個講全球5G使用率嘅報告入面，全球頭十裏面有兩間係香港嘅營辦商，其中一間仲係排名第四。
另一方面，香港嘅流動服務用戶滲透率超過305%，即係話平均每人有三個電話號碼；而喺25至64歲年齡層嘅智能手機滲透率更超過98%。有咗呢啲網絡同用戶嘅基礎，即係已經為唔同行業數碼化做好準備。
不得不提仲有政府嘅積極推動，例如以合理成本令營辦商投得頻譜，以及將以前模擬電視廣播嘅中低頻段頻譜（700兆赫）釋放，等營辦商鋪建一個深層覆蓋嘅5G網絡；另外，當然仲有好受歡迎嘅「鼓勵及早使用5G技術資助計劃」，為香港嘅工業數碼化加速。
政府積極推動 工業數碼化加速
其實我哋現時只係見到5G嘅部份威力，未來更會有切片技術，可以建設小區私有網絡，並且滿足大容量及低時延等不同需求，支援更多對網絡有更高要求嘅應用。另外，亦可以透過加強教育，令大眾對網絡安全以及風險管理方面平衡有更深認識。
希望持份者可以發揮香港呢個優勢，喺雙循環宏觀大政策之下，唔好落後於人，將更多具創意嘅方案落地，推動工業全面走向數碼化。
和記電訊香港行政總裁
古星輝
■筆者出席「香港經濟峰會」，並參與了其中一節專題討論。
回應 (0)
我要發表