港股牛氣沖天

港股開年強勢向上突破，恆指重上二萬大關

3/1/2023 周二恆指收20145, 大升363點

恆指最多下跌478點低見19303, 空軍有胡食，基金經理放 聖誕新年長假期後回歸，見大跌趁低吸納博上21000, 港股一插即彈， 成交明顯增加, 上月減倉今日趁大鱷震倉就有得執平貨， 內地股市向上空間大，繼續加注買阿爺，早已說過港股牛市不可清倉，短炒倉可炒波幅，中線倉就坐定定等食大茶飯

恆指上企20000大位，500點一級就要上20500.21000....  向上阻力250天線約在20370， 如能突破，再上就要挑戰 20800-21000

30/12 分析指大鱷同基金經理都唔想2022年埋年結恆指收20000之上，亦唔想12月上破20500, 因為2022年第四季恆指季波幅已超標，所以留力2023年第一季才殺上去，就可做新一季的波幅, 而2022年壓低收於20000之下，就可降低2023年的年線收升的門檻，同樣地，今早恆指競價大幅低開211點報19570 亦可降低2023年收陽燭的門檻

港股長假期前衝高回落，恆指 20000大關再度得而復失

30/12/2022 周五恆指收19781, 升40點

今日基金年結以及黑期結算，港股高開低走，雖然收升卻收陰燭，不過近來港股升勢係每次回吐都力守10及20天線，後市只要不收於其下，代表好友仍未放手，又會再挑戰20100～20300阻力位

早前曾經講過，12月初港股爆上，恆指上破19500，當時係有資金流入，港匯強勢配合，但12月中港匯逐步走弱，熱錢流走，12月尾再踢上，成交並不配合升勢, 今日港匯進一步走弱，已碌到落7.8098，幸好美元疲弱，推動人民幣連升兩日，撐住中港股市

現時最擔心係港股1月例旺是否已偷步提早於11～12月上演， 以及好友是否正在逐步撤退, 因為10月股災嚴重超賣、期指結算以及12月基金粉飾櫥窗的利好因素已消失，如今只剩下炒通關.炒阿爺放水救股救經濟

9～10月港股出現股災後，11月作出報復性反彈，當時由今年低位14597彈上18645，大幅上升約4000點，12月雖然再進一步推上20099，不過頂部只係上移大約1450點，反映港股大部份升幅已於11月出現

～～～～～～～～

QQ衝高回落, 倒跌收場

昨日QQ撐市任務完成，今日回落收陰燭，輪到其他股份踢上去粉飾櫥窗, 昨日已說QQ連日收陽燭已超標，今日殺上$343樓上，獲利沽壓明顯增加，指標股QQ受制於250天線(約$345.5），代表恆指亦同樣受制於 20100～20300阻力區，不過QQ有大莊家控盤力撐, 呢兩日有莊家再掃貨

今日基金經理夾硬踢高粉飾櫥窗，大鱷就想屠熊， 雙劍合璧 ，任務完成大市就回落, 從基金經理的角度來看，今日指數壓低收，股份踢高收，如此一來，基金今年持倉就可跑贏大市，如果今日年結收20000之上，基金今年持倉就可能跑輸大市, 不如留力明年才殺上去

一如日前所說，恆指於28/12創新高20099, 略為上破 9/12高位19926即回，皆因 28/12 只得恆指破頂，國指科指冇破頂，國指科指於9/12早已見頂回落，拉住港股後腿，亦係今日恆指再衝上20074 冇破頂即回的主因， 今日恆指更於收市U盤以全日最低位收市

牛熊分布方面，肥牛在19300-19700, 不過20000～20500有肥熊，小心急跌急彈兩邊殺, 聖誕假期後連續3日都係牛多熊少，19700樓下貼價牛愈養愈肥，有下殺誘因

今個星期恆指周線收升收陰，港股周線壓力愈來愈大，其實我都想造淡搏下周回吐，但港股牛市, 做好友係順勢, 長周末唔敢熊過夜，所以寧願今日走貨食胡減磅港股, 換馬阿爺

~~~~~~~~

近來港股底頂走勢顯示恆指頂部(紅色)上移幅度明顯收窄，要再回吐900點或下試10,20天線才能再攻頂

14597 ----〉18414 ----〉16833 ----〉19737 ---〉18799 ----〉19926 ----〉18885 ----〉20099 

過去幾個月港股收市位反映港股已收復9-10月股災的所有失地, 惟仍未能突破8月高位，代表好友於現水平再買上意欲甚低，畢竟港股災後已累積龐大升幅，恆指由低位14597彈上20099, 累積高達5502點的升幅，股民普遍等港股回吐才入貨再買上

恆指每5000點都是一個超級關口，所以跌穿15000即彈, 升穿20000即回落，回顧10月尾隊穿15000，只係三天就重上15000，今次兩度上破20000，看來快要收復20000大關

恆指

（12月收19781, 11月收18597, 10月收14687, 9月收17222, 8月收19954）

科指

（12月收4128, 11月收3798, 10月收2852, 9月收3450, 8月收4273）

國指（12月收6704, 11月收6374, 10月收4938, 9月收5914, 8月收6865）

~~~~~~~~

後市展望

今個月恆指跟隨以往12月例静的慣性走勢, 只得1569點的細月波幅, 按照慣性走勢下個月就會做大月波幅， 底頂上移的話, 1月就要升穿12月高位20099，今個月冇殺上20500除了因為要養肥熊熊才上攻之外，亦係因為第四季（10-12月）的季波幅5502點已超標，所以要留待1月才飛天

Al 顯示目前港股正處於牛市，怪不得主力控盤大莊家仍坐定定，近來只係短線炒家沽貨食胡，不過港股後市會飛天遁地大幅波動, 因為 29/12/2022 ~ 18/1/2023 是水星逆行

要特別留意 5/1 轉節氣小寒, 當天QQ 除淨派發美團, 以及中移A股有一大批貨解禁, 當天沽壓或會增加， 4/2 立春前後幾天, 因剛好撞著2/2聯儲局議息, 股匯債或會變天

12月美股捱沽其中一個原因係避稅，踏入1月就會少了這批沽盤，不過1月美股業績公布期，目前正處於企業董事禁止買賣期

向上方面，今次港股連續兩個月急升, 牛味甚濃，技術指標顯示大方向上望20500-21000, 最樂觀的分析看明年首季見22000~23000, 不過要先回調, 然後才會再飛天

向下方面，短線第一站19500，再下一個支持區在19000-19300

港股於10月底創今年新低後雖然展開大型反彈浪(可能係熊市轉牛市)，明年上半年仍有可能碌落去做第二隻腳， 中港疫情惡化，內地疫情爆發高峰期仍未到來，市傳已有數億人感染新冠病毒，內地醫療系統及經濟不堪設想，加上農曆新年春運，染病及停工人數龐大, 12月及1月經濟數據不妙

港股期指結算，底頂下移，沽盤湧現

29/12 周四恆指收19741, 跌157點

12月期指結算價19670
12月國指期貨結算價6668

今日港股下試10天線即彈, 好友力守19500來結算， 近來急升的科企領跌，炒家及基金經理 粉飾櫥窗 ，紛紛沽貨鎖定利潤

騰訊有利好消息, 資金湧入掃貨，QQ有莊家撐走強，逆市急升， 不過QQ 連陽 日數已超標，小心明日收陰燭，技術上QQ 要回調

今日港股下跌，正好畀19750樓上熊仔出世，月尾恆指已跌了兩天，達標， 插完呢棍，Vhsi 恆指恐慌指數亦下跌，預示好友會撐埋明日基金年結以及黑期結算

睇港股日線似聚頂，今個星期港股周線雖然收升機會大，不過要小心下個星期，因為周線連升兩周後回調壓力甚大，今個星期有聖誕假期，恆指短周只得560點細波幅， 按照慣性走勢下星期就會炒大波幅

上證連跌兩日 ，老外上午大舉沽出A股，但尾市掃入A股， 又玩趁低吸納炒波幅

美國十年期債息升勢回順，跌穿3.85%，美元下跌，人民幣及港匯略為反彈，超短線匯市回穩

聖誕長假期後復市， 港股衝高回落

港股高處不勝寒，恆指20000大關得而復失

28/12 周三恆指收19899, 升306點

港股期指結算前夕急升， 肥熊陣亡， 恆指擴大月波幅任務亦已完成 ，隨即 收窄升幅， Vhsi 恆指恐慌指數連升三日 ，今日更進一步急升3.31%，代表大市有暗湧

恆指高見20099, 剛好去到20100-20300阻力大位，不進則退，以周波幅計，後市就要跌穿今日低位19787來 擴大本周波幅，順道回補今日上升裂口 19686-19787

上證於港股聖誕假期冇咗老外沽盤偷雞升了兩天， 今日互聯互通復市，沽盤隨即湧現，內地股市重拾跌勢， 收3087，跌8點， 權重A股寧德時代臨尾香，失守400大關並創12月新低380.28，響起警號，內地股市形勢不妙勢必拖累港股

~~~~~~~~~~~~

中美股市拉住港股後腿

中港疫情持續惡化，四川省推算約有64％人已染疫，人民幣下跌，影響股民炒股及消費意欲，其實港股於11-12月大幅反彈已偷步炒放寬防疫措施以及通關

中美股市走弱，港股又豈能一直獨自去偷歡？點都會畀中美股市拉住後腿，美國十年期債息上破3.85%明明不利科企，但大鱷卻夾硬推升， 唔排除空軍亦順勢推高來加沽， 港股沽空連日急增是後患，壓力始終要釋放

早前風水術數師已預告11月至7/12前港股財氣最旺，22/12冬至轉節氣後財氣大減，睇近來港股表現又幾似，恆指今日升破前頂19926, 但卻走不遠，高見20099 (阻力20100）, 恆指破頂創月內新高，但科指及國指冇破頂

今日推升好明顯係挾淡屠熊及部署明日結算位， 以及預留回調空間，大鱷要咬住19500樓上結算

~~~~~~~~~~~~

港股雖然收陽收升，但唔少股份都衝高回落，收窄升幅，甚至倒跌，多隻熱炒股都有散水味，近來狂炒的教育股暴跌，京東阿里小米舜宇都逆市大跌，反映 20000 樓上沽壓甚大， 新年長假期在即，股民傾向減磅避險

今日港股成交增加可能係空軍回補空倉 以及沽盤湧現，並非看好後市的買盤，估計基金經理粉飾櫥窗亦沽貨鎖定利潤，公用股急升，資金泊入公用股避險 唔係好現象

QQ 高見$329.6, 創近4個月新高，以周波幅計，後市$320-330就要爆邊來擴大周波幅，高位沽壓雖然明顯增加，但 QQ 今日仍能收陽收升皆因大媽大手掃貨, 國家新聞出版署發布2022年進口網絡遊戲審批訊息，共44款遊戲獲批，當中包括騰訊旗下的《寶可夢大集結》

按照慣性走勢，港股月尾多數係好淡通殺，不會單邊升或跌，月尾6天目前係1跌3升，跌市日數尚未達標，等淡友出場殺跌

26-27/12 周一二

聖誕假期港股休市期間內地股市造好，人民幣上升，利好港股假期後復市表現

港股轉倉高峰期， 基金粉飾櫥窗部署上攻屠熊

23/12 周五恆指收19593, 跌86點

雖然有通關憧憬，不過中港疫情持續惡化，人民幣連跌兩日，港匯弱雞，加上聖誕及新年長假期，削弱股民入市意欲, 避險沽壓增加， 部份基金經理已放假, 所以近來港股都係乾升乾跌，幸好12月係好倉底，大市往往係急跌急彈，消化沽壓後又會再上攻

短炒莊家周初食胡後，呢兩日又再湧入掃貨，可能係炒通關復常，想殺上20000來擴大恆指月波幅，普遍基金經理中短線看20500-21000，不過Al預測20100-20300會攔路

近日恆指主要在19500穿梭，最長連續兩天收於其上又會碌番落山，要看下周三（28/12）能否守住19500，上破20000, 一如日前所說， 好友想守住不斷上移的10及20天線，就要向上推進

有分析師指近來大鱷高位派貨, 港股技術指標亦不配合升勢, 近來港股反覆向上, 但港匯卻愈走愈低, 反映資金流走，港股累積龐大沽空，今日沽空亦急增，係計時炸彈，不過12月港股強勢，可能要拖到1月中才反艇

12月初恆指上破19500, 當時港匯強勢報7.7610

近日恆指挑戰19800, 但目前恆指已跌到落7.8065

QQ 收$320.4之下，報$320.2, 即係今個星期QQ周線雖然收升卻收陰燭，科指則收跌收陰，反映月初爆升的科企於月中起獲利沽壓大增, 以周線計，恆指國指本周小幅收升，上證及科指連跌兩周， 全周計恆指收升收陽，國指收升收陰

~~~~~~~~~~~~

港股在月內高位反覆，成交縮，買盤弱，大鱷托住高位派貨，亦有可能是為了下周四（29/12）期指結算及基金埋年結，總的來說，美股熊反覆向下，內地股市即將反彈，港股牛反覆向上，恆指最大阻力在20100-20300

內地疫情大爆發，阿爺索性不再每曰公布染疫數據，可想而知情況有多麼嚴重，怪不得上證今日彈唔起，連跌7日, 創今年最長連跌紀錄, 2022年真係臨尾香，不過技術上內地股市呈超賣，隨時會反彈

港股聖誕休市期間內地股市理應作出反彈，有助港股好友於下周咬住高位結算, 下周一二聖誕假期滬深股通 繼續休市, 冇咗老外的沽盤, 點都會彈一彈吧! 到時好友就有藉口出手

以月波幅計，下星期(12月尾)或明年1月初就要上破20000大關，不過由於目前牛熊都非常貼價，下周恆指上落200點 都有牛熊可殺， 目前貼價熊較肥，吸引力較大，美國十年期債息重上3.75%水平，不利科企

明年1月開新局，港股可能係飛天遁地，1月中或會變盤 ，要預早作出部署，5/1轉節氣小寒，當天QQ除淨美團，近來QQ沽空增加，可能係空軍博除淨後沽壓大增

港股報復式反彈重上十天線 受制於19800

22/12 周四恆指收19679, 大升518點

內地疫情持續惡化，經濟數據差，人民幣走弱，內地股市跌跌不休， 弱到不得了，但港股卻反常地唔跟跌， 大裂口高開挾淡後雖然未能破頂（因恆指周波幅已達標)，但低見19475即彈， 大升除了屠殺肥熊外，另一個原因係要畀19100～19500的BB牛牛出世， 大鱷亦想拋離20天線及19000來預留回調水位

美元止跌回升，重上104水平，人民幣下跌，港匯走弱，不利股市，沽空大增，預示後市會大幅波動，好友力撐，但恆指200天線阻力大位想企穩殊不容易

港股步入月尾6天市況，已升了兩天， 按照慣性走勢月尾 多數係好淡通殺，不會日日升， 現時無論大市抑或指標股都升抵阻力大位，港股溫度計港交所早市急升後急回，收窄升幅具啟示作用，我家好友齊齊趁反彈減磅

明日有長假期前沽壓效應，恆指關鍵位19450，如能收於其上，好友勝，上證連跌6日，如果明日仲唔彈，就係臨尾香，創今年最長連跌紀錄, 明日互聯互通北向關閉，A股沽壓有望減輕，要看弱雞上證會否作出反彈，幫下港股好友周線收升

港股止跌回升，部署上攻屠熊

21/12 周三恆指收19160, 升65點

內地3/1通關消息以及阿爺繼續推出利好內房措施，美期亦急升， 正路港股應大升，但大鱷刻意壓住大市唔畀今日升住，目的係震牛引熊， 奸計得逞，有好友撤退，而19300 樓上淡友熊熊大手加倉，要買定官才， 因為按照慣性走勢，港股試完底就會再沖頂，

近日港股回吐，雖然失守10天線，但拋離不遠，兩連跌即彈，反映好友仍未放手，只要重上19400代表好友已奪回主導權， 其實近來只係短炒莊家食胡，主力控盤莊家仍坐定定等食大茶飯

昨日港股急挫後今日冇破底釋出利好信號，好友一直力守20天線，但20天線今日已上移至19000水平，好友必須要繼續推升，才能避免跌穿持續攀升的20天線，守19000, 500點一級就係19500大位，再上阻力19800-2000

~~~~~~~~~~~~

人民幣連升兩天， 內地股市雖然低收，但老外午後大手掃入A股博反彈，有趁低吸納味

上證連跌5日後亦即將反彈，到時好友就有藉口推升， 按照收升月的慣性走勢，月初推高、月中回吐、月尾再上，港股溫度計港交所今日升幅遠勝恆指，指標股偷步急升具啟示作用

今日港股表面上升幅不大 ，但唔少股份都由低位抝腰走高，連弱雞的內銀股都彈高， 反映港股低位有買盤承接， 可能係基金粉飾櫥窗，短炒好友博反彈，大鱷亦想推高派貨， 好友亦要部署後日(周五)畫周線

今日港股成交大幅縮減至$693億，恆指即市波幅 罕有地急降至192點，代表大鱷正在作出部署，係大龍鳳先兆，明日大鱷要食熊掌做冬