古星輝 - 樂齡族融入數碼社會｜乜都5G

一場疫情，大大提升數碼科技喺社會不同層面嘅廣泛應用。不論年紀嘅用戶，日常生活多少都受流動通訊及資訊科技嘅直接衝擊。今時今日簡單如去茶樓飲茶，都要用電子點餐；去政府醫院覆診要識用HA Go。樂齡一族除依靠身邊親友外，要融入數碼社會，社區嘅幫助及個人努力亦在所難免。

記得10多年前智能手機剛推出，公司開始舉辦手機長者學堂，反應熱烈。當時學習嘅一般係iOS同Android作業系統嘅分別，以及簡易手機操作。時移世易，舊年每10個65歲及以上人士，9個都有智能手機，同2020年每10個有不足7個比較，普及程度持續增長。

今日嘅老友記，一般已能掌握手機嘅操作，其學習層面逐漸提升至個別應用程式嘅使用。由以往睇吓片、用吓巴士App，到疫情期間，極具催化作用嘅「安心出行」出現，部分老友記逼不得已都要開始學習「新科技」。當時公司針對此應用而舉辦嘅講座，每次都座無虛席。

對先進流動網絡有要求

社會逐漸復常後，老友記要學嘅應用更廣泛及進階，例如回鄉探親，要識得上網買高鐵飛；填寫內地出入境健康申報表，甚至使用流動支付、電子錢包及網上銀行等，對先進的流動網絡亦有一定要求。因此升級5G絕對不是年輕一代嘅專利。況且巿面上有不少5G應用都係特別為樂齡一族而設，例如5G機械人就有助透過同長者互動，提升情緒管理，而結合5G技術及VR眼鏡，又可以為老友記提供虛擬旅遊活動，足不戶出看世界！

筆者喜見政府新一輪長者數碼外展計劃經已展開（2023-2025），由各大機構舉辦嘅外展計劃，內容涵蓋樂齡科技產品嘅應用，例如配合AR讓長者做伸展運動，又會安排義工到訪院舍，同喺社區舉辦流動外展服務站主動接觸長者，對於全方位推廣數碼科技，提升數碼共融，好有積極作用。當然，對於進一步提升香港嘅5G滲透率，亦有幫助。

和記電訊香港行政總裁

古星輝