古星輝 - 電訊商新招助長者防騙｜乜都5G

各類騙案無日無之，每日至少總會收到一兩次詐騙電話，雖然大部分市民都知道如何應對，不過聽得太多總會令人煩厭，有些長者更會誤信為真而上當。根據警方反詐騙協調中心公布嘅統計數字，今年7月嘅電話騙案數目，較去年同期大增超過7成，涉及金額亦上升4成。

為咗提高市民對詐騙電話嘅防範意識，近年業界同通訊辦及警方緊密合作，配合堵截詐騙電話及訊息，同時加強對市民有關防騙嘅宣傳及教育工作。

以我哋公司為例，如有來電號碼為「+852」字頭嘅境外來電，用戶接聽時我哋會先播放一段話音提示，提醒有關電話是來自境外，提醒佢哋提高警惕；發送有關防詐騙嘅溫馨提示訊息給客戶；於網站上載防止電話及網上詐騙嘅宣傳資料；門市方面則張貼宣傳海報及派發防騙單張，全方位協助教育公眾。

長者可免費用保安服務

站在電訊商立場，我哋覺得可以再做多啲，協助有關當局打擊騙案，所以啱啱推出一項全方位流動保安服務「來電管理組合」，呢個組合包括「防騙王」及「Call Block」兩大服務，前者過濾由警方提供及我哋公司制定嘅詐騙電話名單，於流動網絡層面，自動識別並攔截詐騙來電，減低用戶受電話滋擾及詐騙嘅風險，有關名單資料庫會不時更新；至於後者就可以讓用戶自設黑名單及拒絕接收冇顯示嘅來電等。

喺企業社會責任層面上，我哋認為社會上嘅長者更加需要關顧，幫助佢哋防範電騙，所以65歲或以上嘅月費用戶，只要嚟到我哋嘅門市就可以免費申請「來電管理組合」服務。希望喺各持份者同心合力下，大家可以成功打擊電騙！

和記電訊香港行政總裁

古星輝