古星輝 - 帶住「5G BB」返工｜乜都5G

每個行業都有一啲行內人先知嘅用語，電訊業一樣有。自從5G寬頻服務推出巿場，同事為咗方便，大家都將5G寬頻服務（英文5G broadband有兩個字母B）簡稱為「5G BB」，既親切又易記。

寬頻服務簡稱「BB」

話說要推廣及普及5G，需要喺唔同領域深耕細作，我哋公司嘅「5G特別行動組」，一直喺鄉郊社區不斷努力，近期佢哋嘅最新戰線就轉咗去梅窩。因為公司最近喺梅窩政府合署加設咗基站，增強流動訊號，無論3G、4G及5G通訊都全部受惠；速度更快，覆蓋更廣。

5G特別行動組一收到消息，就立即備妥5G BB裝備，鎖定目標地區，向梅窩商戶介紹5G BB服務嘅優勢，實地示範如何即插即用，以及即場測試網速，大有驚喜，吸引咗唔少商戶登記使用。

其中一位梅窩原居民，喺碼頭附近開士多，見到喺舖頭用5G BB嘅上網速度快，又唔使拉線，於是立即踩單車載埋同事去佢山上嘅屋企測試，發現5G BB一樣發揮功用；自此佢每日就帶着5G BB路由器返工放工，踩住單車穿梭舖頭同屋企。

助社區加速發展

社會一直討論發展及保育大嶼，而梅窩一向係大嶼山嘅重要門戶，旅遊景點眾多，不但吸引遊客、行山人士，該區亦結聚不少村落、居屋及公共屋邨，有好嘅流動通訊網絡，對社區嘅發展十分重要。5G寬頻喺偏遠地區，特別能發揮強勁功能，只要有好嘅覆蓋，配合5G神器（即先進路由器），就可瞬間上網！

好似上述例子，可能你會話有多一個5G BB 路由器咪唔使帶嚟帶去，但士多老闆話覺得咁樣好抵用，因為免拉線、免安裝，一個路由器可以放喺幾個地方使用，真係「無得輸」。

有時聽人話啲路由器外形似水桶，查實o依家啲5G神器設計簡約，又可以同時支援唔同頻譜，如果喺外形再花點心思，將佢變成家居或舖頭嘅精美擺設，5G寬頻業務應可再上一層樓。

和記電訊香港行政總裁

古星輝