古星輝 - 5G助力網絡安全管理｜乜都5G

今年有關網絡詐騙、黑客入侵、釣魚攻擊、資料外洩嘅報道無日無之，香港電腦保安事故協調中心今年頭九個月就已經錄得近1.4萬宗安全事故，與去年同期比較增加逾2成；無論個人客戶或公私營機構，均面對如何提升網絡保安嘅難題。

「零信任」方案

筆者經常話，作為今時今日嘅數碼營辦商，需要不斷創新。以提升企業網絡保安為例，最近我哋就搵咗一間業界領先嘅系統集成ICT服務供應商及一間國際網絡安全方案供應商，針對企業需求，結合高速、低時延嘅5G服務，攜手推出適合中小企嘅一站式網絡安全管理方案。

呢個方案嘅特點係「零信任」！人與人要講求信任，但喺網絡保安嘅世界，我哋會假定所有用家、裝置都信唔過，以最嚴謹、最高規格處理嘅「零信任」標準，分析各種網絡安全事宜，全力提高系統防禦，阻止網絡攻擊。

有關管理方案由人工智能驅動，設有固定月費，毋須額外購置硬件，令資源匱乏嘅中小企有數得計，能大幅降低要投放於提升網絡安全嘅投資門檻，而且有專人管理，毋須再為聘請IT專才而煩惱。更重要嘅係，方案同時設有安全監控中心，全天候24小時有專人監測網絡情況，有乜風吹草動，企業可以立即應變，處理危機。

特別一提的是，5G喺呢個一站式嘅網絡安全管理方案，扮演重要角色。我哋以先進嘅流動通訊5G服務，配合夥伴嘅固網連接，為用戶提供雙重網絡保障及高度復原能力。

現今講求發展數碼經濟，企業紛紛進行數碼轉型，與此同時，新興嘅網絡攻擊及詐騙招數亦層出不窮，大小企業必須採取適當措施提升網絡安全，防患於未然。

和記電訊香港行政總裁

古星輝