古星輝 - 智能手機「摺」力爆上｜乜都5G

本周業界熱話，必定是內地品牌嘅摺機推出市面，當中公司率先推出淺金色，正好迎合近年大熱嘅「低調奢華」風，名貴而不張揚，最適合今年秋冬配搭時裝。

提及摺機，亞太區用戶2G年代已對摺機情有獨鍾，皆因可以令機身體積小巧，方便攜帶，熱潮直至智能手機年代才冷卻下來。近年摺疊式螢幕誕生，令智能手機設計多了一條出路，不再是千篇一律的外形，結合螢幕大而體積小巧嘅特色，令機身設計有更大發揮。韓國大牌年前已開始推出摺疊螢幕智能手機，到了今年，先後至少有6至7個品牌推出摺疊螢幕智能手機，更成為與iOS陣營嘅最大分野，為Android陣營造就另一契機。

內地摺機銷量勁升逾6成

根據市場研究機構Counterpoint月前發表嘅一份報告，摺疊螢幕智能手機喺第2季嘅全球出貨量達210萬部，按年上升10%。喺全球智能手機出貨量下降下，摺疊螢幕智能手機急速普及，有望成為未來智能手機出貨量增長一大動力。報告更以內地市場為例，摺疊螢幕智能手機喺內地取得空前成功，第2季銷量按年爆升超過6成，達120萬部，更係目前市場大戶，佔全球摺疊螢幕智能手機用戶近60%。

目前嘅摺疊螢幕智能手機仍屬旗艦級數，報告中預期明年至少2個品牌，推出價錢大約700美元左右嘅大眾化摺機，相信明年摺機勢頭將會更為強勁。

現時市面有2款摺疊螢幕智能手機，一款是橫向揭開，行內稱為「大摺」；另一款是縱向揭開，我們稱為「細摺」。大摺打開後螢幕較大，適合日理萬機用戶，不過機身較重，體積亦較大。相反細摺較得用戶歡心，盒子式大小機身更保留近7吋大螢幕，身邊不少朋友已經對細摺表示興趣，各位又不妨到門市攞上手感受一下。

和記電訊香港行政總裁

古星輝