古星輝 - 5G起飛的3個關鍵｜乜都5G

上星期《施政報告》出爐，大眾嘅焦點都放喺鼓勵生育及樓市減辣等措施。喺促進5G發展方面，報告提到當局會繼續加強5G網絡覆蓋，包括透過資助加快擴展鄉郊及偏遠地方的流動網絡基建，以及向流動網絡商提供更多頻譜等。畢竟，5G喺香港已推出3年多，核心商業區覆蓋達99%，而5G網絡覆蓋超過9成人口，成績斐然！但要令5G更大放異彩，有3個關鍵：

兼顧繁忙及偏遠地區

當局多年前推出先導計劃，開放逾千個政府場所俾電訊商安裝5G基站，時至今日，好希望當局能夠繼續制定實際措施，方便我哋喺人流眾多嘅室內文化娛樂場地及熱門大型表演場地，例如紅館、文化中心、大會堂、中環海濱等拓展5G覆蓋及普及5G應用，例如5G 4K高清直播，就可實時將藝術表演帶到環球嘅網上平台。

我哋亦好希望當局能為5G營辦商提供資助，吸引大家喺鄉郊及偏遠地區增設流動基建設施，讓村民及郊遊人士均可用到5G服務，做到真正嘅無遠弗屆。

與公用事業看齊

記得政府喺舊年嘅《施政報告》提過會修例，等流動營辦商可以好似水電煤等公用機構一樣，獲授權進入新建成嘅樓宇，並且預留位置比我哋安裝電訊設備，等住戶一入伙就可以享用穩定可靠嘅通訊服務。一年已過，希望政府能加快立法，以便我哋因應地區發展、人流等擴展5G網絡。

適時指配頻譜

其次，希望政府能繼續適時指配頻譜，好讓我哋可以及早部署及規劃5G網絡及應用嘅未來發展藍圖。5G係推動數碼經濟發展嘅重要一環，喺打造香港成為國際盛事之都，以及國際創新科技中心方面舉足輕重。要5G起飛，有賴各方面努力，我哋一齊為香港「拼經濟謀發展，惠民生添幸福」！

和記電訊香港行政總裁

古星輝