KellyChu - 網友開眼界：遠睇好似一班聖誕老人 昂坪360演習救出被困纜車乘客｜Executive日記

消防處聯同飛行服務隊、警務處等多個部門，日前到昂坪360纜車演習，模擬營救被困車廂嘅乘客。一班救援人員身穿搶眼紅衣，吊喺纜車繩索上，半空中飛過，英姿颯爽。不過可能就快到聖誕，唔少網友睇完，竟然話：「遠睇好似一班聖誕老人！」小妹又認真睇兩眼，發現真係好似！不過一定係身材fit爆嘅「聖誕老人」。

消防處11月20日聯同飛行服務隊、警務處及民眾安全服務隊，到昂坪360纜車演習，藉此提升拯救行動效率，加強跨部門協作能力。演習模擬多名乘客被困纜車車廂，消防處接報後，調派高空拯救專隊到場，利用繩索同高空拯救裝備，迅速救出被困人士。

高空救人一幕睇到唔少網民目不轉睛，有親眼見到嘅市民話：「今朝望出去仲諗緊係咩嚟」；亦好多人形容：「遠睇好似一班聖誕老人」、「一班好忙碌嘅聖誕老人」、「聖誕老人嚟啦」；仲有網民感慨：「如果係我家人做呢份工，一有呢啲拯救行動我都會牽腸掛肚⋯⋯真係真心致敬！」

Kelly Chu