古星輝 - 3i釋放5G潛力｜乜都5G

今個星期一，好榮幸再次出席香港經濟峰會2024。今年嘅主題為「全力拼經濟，多元創新機」，筆者好開心可以同與會者分享科技如何喺後疫情時代，推動經濟發展，特別以5G結合先進科技，推動香港智慧城市發展。

5G推出至今已3年多，以往一直以ABCDE多個字母深入淺出介紹5G，分別係A─AI（人工智能）、B─Blockchain（區塊鏈）、C─Cloud computing（雲端運算）、D─Big data（大數據）及E─Edge computing（邊緣運算）。

及至復常環境不斷轉變，筆者特意加入三個i字：ideas（點子）、imagination（想像力）及innovation（創新），令大家更容易了解5G、先進科技與智慧城市發展嘅關係。

疫情後百業待興，我哋睇到科技如何賦能中小微企，實現數碼轉型，從而提升營運效率及捕捉更多機遇。簡單如為夜繽紛「期間限定」嘅戶外商戶或一般茶餐廳提供5G寬頻服務，可便利電子收費及電子落單。

月費機械人降門檻

又例如我哋見到餐飲業及顧客服務行業都請唔到人，於是靈機一觸，將機械人方案，以較容易負擔的月費形式，提供予不同行業；透過大幅減低使用5G方案嘅門檻，並提供一站式服務，包括安裝及維修，鼓勵各行各業採用新科技，而機械人能送餐、消毒、回答問題，可謂多才多藝，加上能長時間工作，亦有助紓緩巿場人手短缺問題。

從以上例子可見，嶄新想法及豐富想像力，能開拓5G於不同場景及領域嘅應用，係促進產業多元化嘅必備元素之一。

3i中最後嘅「i」係innovation（創新），而「創新」係敢於突破和改變。就好似年初全港首個海上郵輪5G網上直播音樂會，就係5G喺旅遊及文化方面嘅創新應用。同一個音樂會，完全不一樣的直播方式。

根據國際管理發展學院（IMD）年初嘅智慧城市指數報告，香港同新加坡雙雙入圍全球二十大智慧城市。筆者相信超高速、低時延及萬物互聯嘅5G，會繼續係推動企業數碼轉型以及香港發展為智慧城巿嘅催化劑。

和記電訊香港行政總裁

古星輝