鄧達智 - 文苑鴛鴦炒蟹｜智智樂GO

到文苑品嘗文偉賢師傅廚藝出品，成為近年遊玩曼谷其中一項必選動作；花膠撈麵、即燒脆皮乳豬、沙參玉竹甘筍野生水魚湯等菜式早成思念曼谷重要元素。

師傅近期搞作頗密，大本營曼谷之外，出手相助飲食界朋友新食肆；飛來飛去一下間柬埔寨金邊，一下間老家香港 （大形海沙田新城市廣場），繁忙得很！

有緣相聚，自柬埔寨途經曼谷回港，時間匆忙，師傅卻說無論如何定要聚聚⋯⋯當然與美食有關；清蒸文苑自家魚塘飼養肥美不凡，媲美海鮮的羅非魚（又名𩶘魚、非洲鯽、南洋鯽、台灣稱為吳郭魚⋯⋯）。首次得嘗，香氣、油分、口感皆極高水平！

幾度新鮮推出菜式，款款讚不絕口，又以炒蘿蔔糕墊底的「鴛鴦炒蟹」揸緊同枱各各為食鬼永填不飽的食心。

何為鴛鴦？在下靈機一觸；可是雌蟹（膏蟹）跟雄蟹（肉蟹）炒埋一碟？

文師傅親證：

泰國人（包括華裔）喜歡吃蟹，卻又奄尖，拆蟹動作敬而遠之；將鮮艷橙色的雌蟹膏跟白雪雪肉蟹啖啖肉炒在一起，賣相極吸引，吃來不用過分落手落腳，符合不少人抗拒拆蟹，又能爽快吃到蟹肉的平衡。

蟹汁肉香四濺，流灑混凝於底下香炒蘿蔔糕，吃得人人食指大動，大讚鴛鴦炒蟹美妙不凡。

文苑及文師傅不愧泰皇室點名的美食名店及名師，手攬無數高質忠心粉絲，大可Hea做；文師傅卻不斷推陳出新，每次探訪泰京，必有新創美食留下驚喜！

鄧達智