鄧達智 - 台北美食減肥團 | 智智樂GO

　　台北一周，原意並非單單吃喝玩樂會友睇風景；十六人成團頭號目標其實減肥，然而為食鬼當道，團名將美食行前，先嘗美食，然後減肥！

　　事緣南非鮑魚達人夫婦過年前同遊潮汕，發現二人體重明顯清減，身材窈窕，感覺後生咗10年。作為「減肥係一生一世嘅事業」信徒，當然窮追猛打：橋妙在台北，中醫師「埋線」之外，配合按各人體質安排合適藥丸、藥湯或藥茶，按時服用，如此而已。四星期飛一次台北，既減肥又美食，兩全其美，兩人去過三轉，各自減重超過10公斤。

　　咁筍，當然死跟，騰出一星期同往。

　　甫入永康街對面的蔡醫師醫務所，即時被唯一的宣傳人型紙皮公仔鎮攝；醫師本人當年體重最高峰104公斤（高度只係1米72），口號：我可以，你也可以！

  後來面對面見到Fit到漏油嘅蔡醫師，才知道他用自己作實驗白老鼠，從104公斤減至現時64公斤，當年只是用了6個月時間。

　　西醫減肥兩條路：1，食西藥；2，節食加運動。

食西藥，一般不會像中醫般同時留意體質，以免弄成身體過度虛弱。節食兼運動減肥當然最好，問題係恆心；一百個人當中，頂籠兩個。

　　閣下明顯都好標準，減腳趾咩！

　　朋友有所不知，時光荏苒歲月無聲，肌肉流失皮膚漸鬆，其他地方過得去，中圍至難搞，1米83身高，明明着大碼衫，如果有個唔生性嘅加大碼肚腩橫空突出，都咪話唔攞命，以防萬一，還是未雨綢繆為上策。

　　20年前在廣州，埋線減肥我試過，冇花冇假真係Work；重點埋線後前頭數天，一星期更佳，下午3點之後，禁止進食至次天早晨，在下有恆心，照醫師指引跟，真係成功。

　　這次在台北，整個過程叫人更有信心，首先用儀器測量，獲得體質數據，醫師然後打脈問切，再躺下讓他在肚皮以類似快針針灸的手法埋線，無痛無血，快而準。

　　一個星期過去，感覺衣服鬆了，上磅竟然輕了三公斤；立即決定，服過醫師安排6個星期的藥丸與藥茶，再飛台北延續治療。

鄧達智