鄧達智 - 食到一把火 | 智智樂GO

　　曼谷受遊人愛戴，必有銳不可當的旅遊元素及軟實力；食物既富特色且價廉物美，為曼谷贏盡口碑重要一環。

　　基本上，甚少聽到泰國飲食的負面評價。經歷自己預支及透支的輕狂歲月，悟出「凡事留一線，日後好相見」的真義，能讚美盡力而為；假若有失，沉默是金，多一句不如少一句。

　　非常鮮見，曼谷這夜食到一把火，大家可作參考。

　　多倫多家人久未回港過年，乘着節慶，一家大小回來，在下特別撥出時間同遊。弟弟多年前一度長駐曼谷，對此間奉上深厚感情，定要懷舊唐人街吃一頓過去平靚正唐人泰餐，當然包括燕窩魚翅數十年老字號「南星」。久未聽到坊間談論「南星」，自己是文偉賢師傅及「文苑」忠粉，疫情前只曾幫襯過「南星」鄰舖「T&K」，味道與食材尚算滿意，除了偏差的座位與環境。

　　為滿足弟弟懷舊，揀了「南星」，入店始覺入座率未及一半，激死香港搞夜繽紛官員，整個曼谷唐人街體驗真正車水馬龍，「T&K」其門若巿，等位入內人龍如過江之鯽。

　　「南星」發生咩事？

　　幾億萬泰銖未開頭為員工態度，愛理不理。餸菜上桌，5樣魚翅⋯⋯今次毋須擔心「一翅不食」的堅持，清湯、紅燒點整都好，只見幾梳翅仔浮遊，點睇都唔似鯊魚翅！

　　家人心平氣和，出嚟玩啫，千祈唔好勞氣，食完即去第二間。冇可能入到「T&K」，半年前去了對面街「Seafood Cafe Restaurant」，裝潢新潮中帶華人文化色彩，食物也很可以。扶老攜幼，即轉店。入內，眼睛掃了一轉；大鑊，極可能又中伏，晚上7點多，顧客曾經多至坐出街外。今夜，只有一半，心知不妙⋯⋯「烤鹽鱸魚」，打開錫紙，嗅不到半點魚味香草香葉氣，魚肉燒得不乾身還未算重點，入口肉霉，立即吐出。下一度菜，「鐵板海鮮炒鹹鴨蛋醬」；立立雜雜，乜嘢都有，蟹仔一隻明顯死去多時，青口幾隻，質感直追劣質蠔豉：乾、細、餿！

　　來到此刻，一夜食興全數打落屎坑！興旺香港歲月，幫襯不相熟食肆，同樣受過侍應黑面，以貴價吃垃圾；人無千日好，花無百日紅，香港前車可鑑，曼谷緊記。
鄧達智