湯圓 - 兩蚊雞的憤怒 | 升學表表姐

　　小事一樁，卻不吐不快。飯枱上，見母親大人炮製的炒飯放了切得細碎的芫荽，正想誇口稱讚之際，老人家急急截停本人「賣口乖」之起動，趕快要搶先分享她的即日趣聞。

　　老人家當日如常走入街市，為晚飯張羅。見菜檔把瓜瓜菜菜一份一份分門別類，又標明「18元兩份」，就揀了一份紅蘿蔔、一份芥蘭苗，付上一張20元鈔，等檔主找回2元。但過了會兒檔主依然無動於衷，老人家開口向檔主說：「麻煩要找2蚊。」本人邊把炒飯推入口，邊豎起耳仔不敢錯過細節。

　　豈料檔主回應：「吖呀，你嗰啲紅蘿蔔係台灣嚟㗎！唔駛找啦！」我差一點把炒飯吞進了氣管！相比我的反應，母親只輕描淡寫地加了一個情緒備註：「咁都有喎？」我再問一次，檔主最後都沒有找錢，對嗎？母親堅定地表示：「冇呀！」

　　我少許激動地連環「馬後炮」：「可以全部菜放番低，攞番20蚊走」、「如果台灣紅蘿蔔要貴啲，咁可以一開始標明係20蚊而唔係18蚊」、「真係佢想點就點喎」…… 最後一句：「真係越講越嬲！」因為這一刻，已經不是兩蚊雞的事，是誠信敗壞，是社會風氣的墮落。

　　尤幸母親還是一副氣定神閒的表情，而且胸有成竹：「其實佢咁樣都冇着數，我以後都唔會幫襯佢。」似乎這樣就是母親給不老實檔主的最大懲罰；也是給自己生活不如意的安慰。放過自己，薑，還是老的辣！
湯圓