胡慧沖 - 香港設計風靡泰國 | 筆泰沖動

  一個香港男人，加上一個泰國女人，令全泰國的人都瘋狂了！

　　所指嘅香港男人，就係講緊龍家昇，香港著名玩具設計師，佢創作嘅角色「Labubu」，喺香港可能仲未有一股好勁嘅熱潮，但喺泰國已經紅到無人不知，無人不曉，個個都將佢當作一個吉祥物。而令到Labubu更上一層樓嘅，就係K-pop天團Blackpink泰籍成員Lisa，自從某日佢喺社交媒體帳號公開自己都有收藏Labubu公仔之後，成個泰國都熱炒起來，當中除正貨以外不乏假貨，甚至乎有餐廳甜品店設計Labubu相關食物，亦都有金舖將佢變作金飾，更有紋身師傅將之化成吉祥物紋上身，認真係Amazing Thailand！

　　而更加Amazing、更加瘋狂嘅，就係泰國曼谷有好多售賣有關Labubu產品嘅商店，全部都大排長龍限量發售！有泰國人自己買來收藏，亦都有炒家，總之個個都走去排隊買，情況十分之哄動！甚至連泰國有關商務部官員都要出來講句，提醒大家買還買，要小心唔好買錯假貨。

  就自己所見，現時泰國男男女女無論甚麼年紀，個個都鍾意將Labubu公仔掛上身。由此可見，設計師龍家昇可以話係為香港人爭光，勁！

胡慧沖