胡慧沖 - 斷捨難離 | 筆泰沖動

　　斷捨離呢三個字近年喺香港好流行，但對於我來講，呢三個字就等於「人生交叉點」一樣。

　　自己無論喺泰國同香港都有好多唔等使嘅東西，泰國屋企經常畀大家睇到有好多幪面超人、007嘅收藏，呢啲收藏部分擺喺飾櫃之中可以朝夕相對，有啲就擺埋喺櫃桶裏面，根本一年都未必會睇一次，尤其書籍擺咗上書架就唔會睇……經常講有朝一日自己走咗，你可能喺翟道翟見到我啲嘢被人拎咗去賣……

　　其實除咗泰國屋企多呢啲寶貴垃圾之外，喺香港我一直以來都有租迷你倉，因為依然有好多食之無味棄之可惜的東西唔知點處理好，又或者唔捨得處理，結果就要擺入迷你倉。但之前因為一啲事情搬了又搬，幸好最近朋友找到一個幾理想嘅迷你倉集團24 storage畀我，裏面設備較為先進，而且配套都幾好，有空間位畀大家可以休息攤唞，亦都有免費樽裝水同咖啡供應，最緊要係有電子門鎖，唔使驚唔記得帶鎖匙。

　　今次返嚟香港任務多多，其中一個任務就係清理門戶，把一些紙箱轉做膠箱，然之後再地氈式搜索，將一啲真係可以唔要嘅嘢掉咗佢，但花咗兩日時間，都只能夠表面上執好，如果要執好晒真係要再畀多啲時間。其實迷你倉裏面所有嘢都係一啲回憶，甚至乎集體回憶，尤其是竟然有兩大箱當年泰國旅遊時影嘅菲林，以前泰國是甚麼模樣？曼谷未有BTS之前又係點樣？菲林曬返數碼相出嚟，又可以重新為大家分享，其實都係一個懷舊寶庫。似乎以後每次返嚟香港都要入一入迷你倉呢個寶庫尋寶先得。

胡慧沖