胡慧沖 - 天線得得B鹹魚翻生 | 筆泰沖動

　　正當多啦A夢為香港朋友帶來歡樂之際，天線得得B就為泰國人帶來歡樂。

　　話說今期在泰國曼谷很受大家歡迎的，竟然就是這個天線得得B，一套1990年代來自英國的兒童節目。雖然世界各地都有播放，泰國亦都唔例外，但畢竟已是上世紀的事情，點解突然又會鹹魚翻生呢？其實好簡單，皆因這個劇集裏面的人物跟同志有關係，泰國向來都推廣平權，而本月底和下月初曼谷都將有平權遊行活動舉行。

　　曼谷市中心Siam Center以及周邊商場，甚至大學區多個地方都一起大肆宣傳這個活動，沒有歧視，只有參與，而當中Siam Center更加不遺餘力地推出一個以天線得得B為主題的活動，除了大量有關的打卡位畀大家影相，也有大量衣服精品、化妝品，甚至乎主題咖啡店推出，更加會有人扮的天線得得B在現場跟大家擁抱打卡。雖然香港的多啦A夢活動更加大型，出動的公仔更加多，但好似沒有一個人扮的多啦A夢出現；曼谷這邊則有真人扮的天線得得B一連多日在商場內跟大家合照。

　　老實講，自己當年在電視台工作的時候，都曾經睇過呢個節目，以成年人嚟講真係好悶……真係唔識欣賞，但都叫做係集體回憶，所以同樣地喺泰國都引起本地人關注，無論未睇過嘅年輕人又或者曾經睇過嘅大人，都一窩蜂走去影相打卡買精品。天線得得B你係得嘅！

胡慧沖