胡慧沖 - 人生中的燈光 | 筆泰沖動

　　點解忽然之間變咗咁佛系，變得咁玄？

　　話說泰國人去佛寺拜神拜佛，有時都會送上燈泡或者光管，原因就係希望透過這些燈泡和光管令到佛寺一片光明，寓意自己前景和人生都一片光明。

  同樣地人生之中燈光都好重要，尤其是我哋呢啲YouTuber拍嘢冇燈真係會死！江湖傳聞當年鄭少秋拍片，任何環境都一定會有私家燈影住自己個樣。因為年紀開始大，冇足夠嘅燈光驚嚇親人，所以話燈光係好重要！

　　之前有朋友替我做了一些製作，堅持話不用打燈，因為後期電腦可以「谷光」。佢講得好啱，係谷光而唔係真係光，有打燈同後期谷光出嚟效果係兩回事。老實講，如果真係可以咁做，啲燈光師個個執包袱返屋企都得，燈光設備亦都唔再需要存在喺世上……

　　於是自己的起心肝買咗個機頭燈，有咗機頭燈真係好好多！唔單止觀眾睇得舒服，自己都睇得舒服。有時這些小器材真的值得投資，尤其一些商業製作，燈真係唔少得！燈光背後亦都感受到一樣嘢，就係勉強冇幸福，唔好好地用燈，反而希望靠後期谷光呢啲等於勉強，勉強出嚟又點會好睇，點會有幸福呢？

　　所以無論喺宗教信仰上或者現實生活之中，燈光都係好重要，作為拍攝嘅工作燈光，更加係絕不能缺少。
胡慧沖