胡慧沖 - 人生第三個刺符｜筆泰沖動

一把年紀仲走去紋身？我鍾意呀！

　　話說從1990年第一次踏足泰國開始，已經發覺不少男士都有一種好獨特的紋身，看起來十分Man……不是飛龍飛鳳，而是一些符咒。這些刺符流傳至今已有600多年歷史，當年軍隊上場打仗沒有盔甲，就是靠這些大師的刺符去保護他們，但到現在已經轉變成一種佛教神通與藝術的結合，是一種文化，一種信仰，泰國政府旅遊局也稱之為軟力量。這些刺符據稱除了可保平安、避難消災之外，更可以招財助生意興隆，增強人緣及善緣等。姑勿論是否真的如有神助，起碼視覺上很獨特很有美感，除了泰國人之外，不少外國人甚至外國明星如英國歌手Ed Sheeran最近都在曼谷刺了一個。

　　我自己來說，N年前拍電視節目《泰國乜都有》，親身上陣找和尚刺了一個小小的符號在肩膊之上，之後2012年深信世界會末日，結果「臨死前」找師傅在背上紋了五條經文，但結果冇死到，地球依然存在……

　　最近趁自己生日搵了一位近期人氣急升的師傅阿贊明，替我紋了一個很美的符，需時大概20分鐘，少少痛還可以忍受，但真的好靚。其實這位師傅仲有好多不同大經文可以幫你紋上身，但一來自己怕痛，二來太大又好似多得滯，結果只選擇了在背脊中間紋這個既有美感也有藝術價值的符。

　　朋友問會否因紋上癮以後再紋多一些，的確我身邊有些當地男性朋友整個背脊都紋上了經文，很有美感，但問題係我有幾可除衫畀大家睇到我個背脊？就算再靚大家都未必睇到……所以下次如果要紋可能會紋在手臂上，等大家可欣賞這一種另類泰國軟力量。下一輯電視節目盡量唔畀冬蔭妹、玲玲游水，要畀大家睇我游水，見我背脊……死未！

胡慧沖