胡慧沖 - 為個袋買盒曲奇 | 筆泰沖動

  其實呢個係一個好荒謬嘅概念，但為咗安慰自己唯有咁諗。

　　泰國曼谷嘅LV咖啡店千呼萬喚始出來，一位難求，小弟幾個禮拜前網上訂位，最快都要到4月中先至有位，Walk-in除非你真係咁好彩有死雞可以執到，但估計機會一定唔會高……

　　不過咁唔代表唔可以入場參觀，雖然冇機會畀你就咁入去坐低食嘢，但部分食品可以外賣，而且如果你講到明話入去買外賣嘅話，店員都會好有禮貌，好細心帶你入去參觀講解。他們都有唔少曲奇餅、法式甜餅每天限量發售，包裝精美，大方得體，無論紙盒或鐵罐包裝都異常高雅，最重要係有LV大字同Logo。

　　價錢方面最平七百幾銖，但更加吸引和令人滿足虛榮心的，就係竟然買盒曲奇都會送你一個經典啡黃色配藍帶的LV紙袋！唔再需要去舖頭買貴價名牌貨品，平平哋買盒曲奇餅都可以得到個LV手袋（手挽紙袋）！

　　日後大家喺曼谷如果見到我拎住個LV紙袋，唔好以為我屋企有好多名貴LV時裝或包包，其實我只不過係買咗幾盒曲奇餅。

　　呢鋪絕對係妹仔大過主人婆，但我相信對於部分朋友來講，儘管未能入去好好品嘗一頓下午茶食件餅歎杯茶，單買盒曲奇跟住攞個袋都可能覺得是值得的。
胡慧沖