胡慧沖 - 許冠傑話齋 最緊要好玩 | 筆泰沖動

  歌神至理名言「最緊要好玩」，人生在世匆匆數十年好玩其實好緊要，生命苦短能夠令自己開心、好玩亦都好重要。當然所謂好玩唔係話叫你想做就去做乜都唔理，又或者千金花盡做啲好無聊嘅嘢跟住冇錢開飯，其實經濟能力許可的話，做一些事情令自己開心又覺得好玩先至係最重要！

　　小弟活到這個年頭其實一路有個夢想，最近這個夢想終於可以實現！就係扮幪面超人並坐上幪面超人電單車跟住拍照甚至揸出街！

　　話說自己透過泰國的社交媒體認識了一位改車大師，這位大師有很多明星名人的人客，他不論房車電單車都可以改到，而最令我詫異嘅就係佢可以將一部日本Kawasaki GTO電單車改變成為幪面超人1號的「旋風號」！價錢只不過59,000銖，平過啲阿太買名貴手袋。結果天時地利人和之下我買了這部電單車，在我一眾玩具收藏之中這件大玩具都可以說是驚世駭俗，引來艷羨目光！

　　你諗吓胡慧沖擁有一部幪面超人電單車，聽到都覺得開心、覺得型！那天專登問朋友借了幪面超人一身的打扮，配以自己買的銀色長靴，跟住就拍了一些Video，短短數天有接近10萬人觀看，真係多謝大家畀面。在片中我更加應承大家有一日會揸住這部電單車在曼谷市中心繞場一周，跟住順便唱一曲《最緊要好玩》！

　　開心其實就係咁簡單，老實講這個費用差不多1萬港元，相信好多人都可以負擔得起，只是唔係咁多人可以有機會買到甚至乎有地方安放，最重要係在香港如果揸這些改裝車出街是犯法的，但在泰國就冇問題。希望在三十至四十度高溫之下在曼谷街上揸着這部旋風號不會中暑吧……

胡慧沖