胡慧沖 - 令我失望的《戲劇人生》 | 筆泰沖動

　　所謂失望，唔係指葉振棠唱得唔好聽又或者唔鍾意，相反我係十分喜歡《戲劇人生》呢首歌，曲、詞、唱都好有意思！

　　失望係指年輕時的一次經歷和感受。話說1980年代，小弟入職亞洲電視成為員工之一，剛入職兩個月就知道在地下有間唱片房，所收藏的錄音帶當中，竟然包括麗的當年所有經典劇集嘅配樂！這些錄音帶唔係一盒盒，而係一卷卷、一餅餅的！

　　那裏有位叫Amy嘅女士負責借唱片、錄音帶事宜，也許當時我年紀小不知天高地厚，竟然在跟自己工作無關之下，藉口多多借了多套經典劇集嘅配樂錄音帶，出去再搵朋友幫我過落一盒盒錄音帶之中，之後東窗事發，更被當時嘅老細陳灌明捉去「照肺」，好彩最後冇事……

　　還記得我所借的配樂錄音帶，包括有經典劇集《變色龍》、《新變色龍》和《浮生六劫》，全部都係電視劇中出現過嘅原裝配樂，屬於非賣品，由黎小田、奧金寶一同炮製，當今世上應該再也找不到，而小弟有幸還保存至今。失望嘅係這些錄音帶之中，《浮生六劫》配樂竟然沒有正式一首《戲劇人生》，有嘅只係呢首歌嘅MMO伴唱音樂，分別有陳秀雯版本和葉振棠版本，兩個版本只係當中樂器有少少唔同，基本上冇真正收錄到此曲，真係可惜……雖然感到有少少失望，但《戲劇人生》絕對係一首經典好歌，陪着我走過不知多少個歲月、多少個晚上……知道葉振棠在告別演唱會中最後一首歌係《忘盡心中情》，忽發奇想：如果唱嘅係《戲劇人生》，大家一齊唱「快樂時要快樂」，效果一定好似許冠傑同大家唱「命裏有時終須有」一樣，再加上一句「你今天當主角何妨忘掉最終的承諾」，更加可以為整個演唱會畫上完美句號。

胡慧沖