梁家權
梁家權
梁家權

舊茶樓 老風味

2008/07/04 00:00:00 網誌分類: 寫作
04 Jul
如果我話事,飲茶一定會叫牛栢葉、棉花雞、燒賣、鳳爪、蒜茸鮮魷、雞包仔、芝麻卷。朋友說我是老派的人,新派人飲茶喜歡的是大大粒的鮮蝦餃、排骨、牛肉燒賣、XO醬煎腸粉、馬拉糕、叉燒餐包、杞子桂花糕。

   其實怎會有新舊派之分?現在不少新開的茶樓特意走懷舊路線,供應傳統點心,可惜不少是有其形而沒有其神粹。剝開一粒蝦餃皮便知點心師傅和茶樓的水平,如果蝦餃的饀料只有蝦和一團漿糊,連筍都沒有,就算你塞滿蝦做到幾大隻都好,都是未到家之作。

   街邊魚蛋檔亦有牛栢葉賣,一般都是浸一浸咖喱汁賣給客人,別說咖喱汁調得不知所謂,本來已沒甚麼味道的牛栢葉,不知何解味同嚼蠟;茶樓的牛栢葉,配上薑葱,可口得多。

   新派茶樓每多賣氣氛,點心也做得很精緻,但總不及舊式茶樓品種的繁多,而且欠一點鮮。上茶樓,我真的是舊式人,喜歡老茶樓,甚至故意找一些街坊茶樓去試。從前在灣仔三角街的一家,在街邊擺開摺枱,路人在身旁擦過,我卻悠然地學人歎一盅兩件,或吃一盅飯,還一邊歎報紙。

   飲茶吃盅頭飯,是自小養成的習慣。小時候只有星期天爹才帶我們六條化骨龍上茶樓,都是叫盅頭飯塞飽我們的肚,點心反而少叫,到自己有本事上茶樓飲茶,最喜歡吃點心,算是一種補償。

  梁家權

  

  

回應 (4)
我要發表
梁家權
梁家權 2008/07/16 14:19:06 回覆
candy,冇痰罐喎,福臨門係比較高檔的茶樓。
則卷小雲
則卷小雲 2008/07/13 22:46:22 回覆

係咪有個痰罐放係凳底果種呀?

梁家權
梁家權 2008/07/07 23:25:06 回覆
答Queenie:

我有一年時間未去過大澳,再去會試。

讀者
讀者 2008/07/07 23:25:06 回覆
Queenie問:

大澳好出名既阿婆茶果,睇電視成日介紹錯唔好味個間,反而好味個間又唔介紹! 我住係大澳既朋友個個都係咁講! 可惜阿婆好似巳經唔係度,所以而家d茶果走哂樣,入面有好多胡椒粉! 好難食! 反而張記士多既魚蛋味道始終如一,一食停唔到口!

user