戰室有很多回憶

我在頭條認識了一班喜愛投資、投機既網友。由買一支正股，慢慢等佢升，套利再買第二隻，演變至今日乜都玩，最初是贏錢的多，後來開始體會到輸錢。

莫非實現了輸錢皆因贏錢起？

從來不買股票的朋友，從來不賭波、賭馬的朋友，安份守己，生活有乜問題？在公司裡畀人無端端針對，人工好多年都無得加但支出就越來越多。見到人家話有辦法在股市搵到錢，賭波又有心水搵到錢，仲駛乜出去做幾個鐘part time都係得幾舊水，走一轉就有幾千蚊，幾正！心動了。

自己又玩下，咦，果然所言非虛，今個月多成萬蚊使，梗係正啦。

問題出在哪裡？就係當輸錢時不肯停手，停了手又走回去。點解？因為有贏錢既人做見證，投機是可行啊，是自己技術不足才真。最弊其中一個贏過錢的人是自己，你地話點可以說服自己不再走回舊路。

一年前我有了自己的渡假屋，玩得好開心，叫做離開了戰室。但我還是不斷留言同post歌仔。幾個月前跟網友講我要復出了。復出做咩？把交易減少及只在有時間先去做，平日的時間放棄現在的工作，開始新的工作。

已經超過3個月了，上次決定回去打工，但經濟變得好差，加上遇上了一些問題，過程十分不愉快。可幸是還未失去信心，打工仔的信心，呵呵。今次金融海嘯不是人生第一次遇上的難關，我會回復從前的狀態再尋出路。

當年走了去做交易不是因為大牛市或望一朝發達，只是本來的工作難搵食，一心諗住好好學習不就是另一份工？我錯了，原來是這麼難的，贏小錢是可以，發達是難上難，隨時要冒很大的風險，趁自己未「意外」破產前退出。

有親密戰友比我經驗多，而且資本亦較多，但以我個人睇，若發生「意外」就更大劑。試想想渣住兩萬蚊的人，輸極是兩萬蚊，用孖展好麼？人地都不會借太多畀佢，去盡輸5萬好未，彈藥耗盡都不能再玩。當人工1萬蚊多o的一個月，聽聽話話節衣縮食，半年就回氣，最重要是不再賭博，就算唔發達咪慢慢來，再輸就好難救。換著彈藥充足就是另一回事，少則輸幾十萬，多則過百萬，一萬蚊份工比幾萬蚊份工容易找很多，輸了大錢再失去工作，要翻身就不是上述輸5萬蚊那麼容易。

咁有人資助去「玩」兩手又點計？

我講真話有人唔鍾意，我收口。不過並不代表我否定一切，網友時常都叫大家離場，真正意思要問佢至知，但佢輸過錢，家人輸過錢，現在相信都洗心革面怕怕，所以從這心理投影到日誌是可以理解。我又何嘗不曾這樣想，離場者不是代表沽清手上既貨，不是不投資、不投機。在不明朗的情況下，估估下的情況下就不要進場（=離場），而且注碼太大就不好，輸5個位是大賭博，輸4個位是睇情況，輸3個位當賭馬，已經是起碼的代價，睇情況就已經不好。

戰友想聽我真心話我就講…

有人資助你去玩，你唔會大大注去玩掛？當一張期指輸300點計，萬5蚊，自己錢你可能繼續玩，但人家既錢你都要停手掛。這是一個月人工，好pay的是半個月人工。

若輕易走回去投機同賭博，只因有人鼓勵你，定力太差了。

好多人在今次金融海嘯損手，不計坐貨的股票，大家都有，但以外的投機、炒作既物業、衍生工具及賭波、賭馬（牛市、熊市跟馬會無關係），我地得到什麼？錢？可能有些人係搵到，但連大戶都輸，點解？因為交易頻繁加上槓桿，只有中間人即經紀贏錢，只有無良銀行贏錢，但銀行贏了又以高溢價買了美國毒藥，資產價格暴跌，要幾多年先返家鄉？一、兩年都太耐了，因為銀行迫住要套現，若不是槓桿就有得守，所以環球投資市場是輸去3大目的地：

1) 經紀個袋
2) 壞帳，不只是美國，全球都有人借錢唔還，賭錢輸了整個倉斬了也未夠
3) 幾年前股市、商品、物業價格大升，但當時未套利，現在大家接手，錢就全去了幾年前買貨的人

大家暫時是玩唔贏市場的，一來人為，二來資訊不平衡，三就是贏是贏唔盡的，當你一心讓利潤奔走，帳面利潤是過眼雲煙，但止蝕總是太遲，就算不是最遲總是出人意表。市場是不能預測的，贏錢贏了幾十年的師兄，有很多都一鋪清倉，就算一鋪唔死，兩鋪好未？我認識不少好富有既人，不過是在98年之前，宜家都10年，翻了身麼？

算吧，趁現在退出吧，過幾年之後市場會比現在「合理」嗎？

我曾私下同人講過有得選擇我會退出，其實我已接近退出了，只是時間問題，現在做的是純為錢，靠的是一半技術一半運氣，紀律當然重要但畀唔到運氣我地仍屬技術層面，贏輸是一件事，做得久了有點無所事事的感覺，退出不會等待很久，夠了。

內容如有相似，純屬巧合，能會意的會意，人生無常，祝大家行好運。

我的選擇是正確的，希望你都選擇正確。

我的日誌都是剪剪貼貼，可以當是個人在網上找到的資料而成的筆記簿，無乜好提的。