「令炎反胃的文和感想」（下）

另一網友「小琳」評炎說得好，炎再就此文應之：

小 琳  2009/1/31 上午 01:28:14 

炎兄講得好

炎澄魂：

謝謝。但炎只係個愛情愚者，唔係個ｄ明女仔心理既「智者」，所以講既野對唔對真係要由大家自己判斷。

不過炎實在忍唔住再就呢篇「詮釋女性心理」既「浪漫偉文」作出補充：

坦白講炎覺得呢篇文充斥著美麗詞澡，糖衣包裝，的確能夠迷惑到「一D人」，特別係後生女，因為都抓到女仔對愛情個D「欲拒還迎」既「部分」心態。可對炎呢個愚者黎講，美麗包裝既背後，骨子裏，內容實在相當以偏概全，亦有誤導性，同太過將男仔妖魔化（可能咁樣先易引起女仔共鳴掛）。

講真，所謂「知人者智，自知者明」（老子第三十三章），「女人心，海底針」，有時女仔既心態你地自己都未必明啦，何況男人？但炎想指出幾樣野：「其實唔少男人對女方提出分手都會留，仲會唔要面咁留。最決絕既有時反而係女方。」

另外男人之所以唔挽留，原因有唔少，但好多時唔係因為上面篇文講個一大堆XYZ。而係因為「痛在心裏口難開」－－男人傳統黎講係要強要面，面對女方突如其來咁提出分手，佢地好多時都會覺得不知所措，但行為上又未必做得出難過苦痛，反而會選擇壓抑，逃避以維護面子尊嚴，然後個晚就搵埋自己班兄弟劈酒訴苦。

又男人會諗：「反正咁愛你你都提出分手，咁無謂再係你面前哭哭啼啼俾自己個脆弱樣你睇自取其辱，走就走算。」

女人提分手要男人留，炎覺得實質上唔係好似上面篇「偉文」講得咁浪漫咁感人，好大程度上係要「面」啫。

但女人要面，男人都要面架。當然男人可以唔要面留女人，但要視乎佢覺得你值唔值。若果三日唔埋兩日就提分手然後要跪要氹咁鬼煩，再有耐性再愛你既男人都頂唔順，走硬！寧願搵過個好過！世上又唔係只有你一個女人，點解要同一個咁煩咁討厭既一齊？

請女方們將心俾己，假若有個自認為魅力驚人既男人，以為身邊既女人無左佢唔得成日借頭借路提分手要女方挽留（隨時仲以此作為去滾去玩既籌碼），咁作為女性既大家又頂唔頂得順呢Ｄ「X街契弟」？

尤甚既係，炎覺得上面個篇「偉文」唔單止誤導女人，以為男人真係咁衰，隨時仲誤導埋男方，等男人以為女人提出分手多數都係「流既」唔係真心，於是苦苦死纏，點知最後發現原來女方係「黎真」既時候，男人覺得感情既無，面又無埋，咁結果會點？

女人要分到手固然極難。男人方面，係炎呢個愚者既角度黎講「好」既，就睇得開當無事或只係傷自己就算。唔好既，就傷害女方或攬住一齊死－－呢Ｄ咪就係悲劇！女人唔係下下提分手都流架！但造成呢Ｄ悲劇既責任炎覺得反而唔係男方，而係個Ｄ將「分手」兩字當兒戲賭注，成日提出要男人氹既麻煩女人。

「分手」係愛情上係一個「好重」既字眼，炎覺得唔應該拿來玩耍或做賭注成日掛係口邊。藉提分手要人留唔理係女或男都好，都係「愚昧」，「任性」、「無聊」、「戇居」、「麻煩」同「自以為是」既表現，弄假成真都係「犯賤自招」，毫不浪漫淒美。

就黎情人節啦各位讀友，炎在此苦口婆心囑大家一句：「想係佳節溫馨浪漫就請好好珍惜身邊愛侶，真係唔好俾個Ｄ『金玉奇外，敗絮其中』既『浪漫文字』誤導，對伴侶做出Ｄ比如『表面提分手，實際要挽留』，既愚苯行為。否則弄假成真或造出悲劇，到時就真係好無謂同非常唔好！

（感慨）能同相愛既人係埋一齊係福份，唔係個個都可以。有，就應該珍惜同愛護，唔好身在福中不知福當猴兒耍！尤其感情既野，有時無左就無左，無得返轉頭架。要自己用腦分析是非對錯，唔好俾Ｄ寫稿佬或寫稿婆誤導敗壞良緣呀！

二零零九年一月三十一日

中午一時十三分

炎澄魂字