幪面超人
2009/07/13 19:55:25 網誌分類: 寫作
星期六上午到茶餐廳吃早餐，看著電視「幪面超人甲鬥王」，彷彿時光倒流三十年。這套經典超人劇集從七一年開始，一直陪伴著我們這些「中流砥柱」成長。奇怪的是，超人和怪獸這些明知不可能發生的事，怎可以歷久不衰？我猜劇集受小朋友和成年人歡迎，一定與玩具製造商有關。說不定是他們斥資或贊助電視台開拍的，所以才能長做長有。
日本人製作這類神怪劇集最多。除了幪面超人，還有另一個經典，就是那個會變得很大的鹹蛋超人，即是那胸口有個時間計，超時便發出閃光警號，提醒超人是時候出絕招了。聽說第一代超人叫阿香，但他如何由一個正常人類變身成超人？而那幪面超人又是如何產生？
我的童年記憶雖然模糊，卻為著一個幪面超人而有過極慘痛的經歷。話說幾歲的時候，有次為看劇集而與父親爭吵。那時的小朋友和大人爭看電視的結果便是「籐條炆豬肉」。幾十年後的今天，我依然記得這段與幪面超人之間的深仇大恨！真要回敬他幾十個Rider Kick！
以前看這兩套超人劇集，心底裡總希望那隻超低能怪獸可以打敗超人的。因為超人永遠得勝，故事便千篇一律，沒甚麼看頭了。所以每次總期待能看出一點突破，不知這是否心理變態？還是每個小孩都有一份潛在的反叛心態？那要問問兒童心理學家了。
幸好在我的成長路上，沒保留太多叛逆思想，也沒有甚麼暴力傾向，總算聽教聽話，也能明辨是非。有時太過正義，更會幫理不幫親的。
http://hk.video.yahoo.com/video/video.html?id=528508
幪面超人個樣真係越睇越似隻昆蟲啊。
後記：博士的回應寫得非常精彩，大家一定要睇啊！
來遲了，先加星！
這兩部超人我也看，不算沉迷。還有一部“小露寶”，也很喜歡看。
最近（近20年）最喜歡的卡通是“新世紀福音戰士”，里面有很多的謎，尚未搞清楚。
心之，俾你睇到條拉鍊，咁你真係好眼利啊！
超人片愈變愈新款，我以前都鐘意睇，睇條背脊拉鍊，穿崩，一睇到就笑，不過現在改良左，無咁容易睇到，偶然看一下，當懷舊下囉。
嘩，心香兄，我工作好忙碌架，邊有咁多時間日日煲湯呀？你去看我上一個網誌啦，整左個滾湯呀，都好好飲架。
Indy仔對日本文化真係好有認識喎，咁期待你快的放果套鬼太郎出來啦。
又是沒有『幸福湯水』的一天！
立冬姐:
我來了。
博士的回應，對我來說，"fairly"精彩...
以前日本工廠寫字樓有閃燈，我真係唔知，學到野。
不過，話日本人枯燥，所以想變改造人，才唸出幪面超，我又唔太同意。
全世界Ｄ人都好枯燥，為何只有日本人有幪面超人？歐洲點解無？
單是枯燥二字，我認為未能解釋變身的慾念。
至於日本人的宗教觀，確是甚麼都崇拜，這跟他們古代的土產神宗教有關。這宗教觀念幾乎由日本人開始發展文明就有。咯咯咯鬼太郎是這種宗教在動畫裡的最佳反映，另外蟲師這本漫畫都係建立在土產神宗教之上。
有機會在我BLOG秀一套鬼太郎花札牌給大家看看吧！
不過，我暫時唔寄得放左在屋企邊度，要搵搵先。希望講完哈利波特可以SHOW出來。另外還有吼叫配音未講，排大長龍了>
上次食物的回憶,今次娛樂的回憶.
都是美麗開心的回憶.
還有什麼童年的回憶?.go go go....
Thanks...
真真念唔到，博士系甘依就可以搞出一篇咸蛋论文！赞！呢分借位加比博士！
有机会博士能否写翻篇关于日本人心态的论文，引领下在下等众兄弟。
咁又係，不過就算有都應該掉晒啦，幾十年了，能保存到今天真係一個奇蹟呀。
立冬 ,
我邊有能力收藏玩具呀 ! 特別係早期 70年代尾 , 80年代初果 D ,那時我都係得幾歲 , 阿媽唔會買的 ! 阿媽最多都係買 "超人貼紙" 俾我 , 好似 5 毫紙一大張 ! 我還記得 ....我第1張貼紙就係 "小露寶 " !!!!
嘩，點解Lawrence你的記性好得咁交關架？你有無收藏果的玩具呀？有就唔該放些少出來供諸同好啊。
樂人谷 POST 的那幅圖, 就是最新的幪面超人 , 叫 decade , 其實我睇左20多隻都唔知套劇的中心是什麼 , 只係知這個超人, 要去好多個不同時空嘅世界 , 先至可以令原來的世界變番正常 ...........唔知這一套, 有無人睇緊 ? 仲有無d 野可以分享 ? (這一輯都幾好睇的 , 因為可以見番晒近幾年, 所有幪面超人 !!!)
大家連卡通都講埋 , 就要提埋 , , , 仲有大鐵人 17 , 好恐佈.......我到依家都記得鐵人17有個細佬 18 , 但18號係壞人 !!! 佢兩兄弟對打時 .....鐵人17就會好慘咁嗌 ........." 細佬 , 細佬 , 細佬 ......."
立冬, 係呀,Dr真係寫得好精彩!
我地班豬朋狗友富貴就唔講得上,但真係幾開心0架!
p.s.
加星,加星 ... 成日都無呢個習慣添。
嘩....嘩
原來咁多人仲意超人架!!!
Good morning!
Frankie
http://www.youtube.com/watch?v=7uO4nM3klp0&feature=related幪面超人我最仲意....任何卡通我都睇eee!!~~多謝博士回應，提供咁寶貴的資料啊！感激感激！
因為小妹想慳錢，所以將個早餐推遲到十一點幾截止一刻先去食，咁就慳番中午果餐了，然後再等到下午茶時段再吃第二餐，咁又可以慳埋個晚餐，即是全日都係食左四十蚊．哈哈．
大臣哥，你唔好話人幼稚呀，呢的係日本人的文化呀，博士寫論文都係寫呢的野架．不過，成年人能保留一份童真，心地一定都會好的．你睇壽哥同佢班富貴朋友，名成利就都一樣保持一個青春的心，這份童心也是令人年青和快樂的秘訣．
幪面超人甲鬥王？
好似係星期六 11:30 a.m. 做, 立冬靚女個早餐, 都食得好早啫！
以前寫過超人和幪面超人嘅論文, 研究日本人嘅企業文化。
超人, Ultraman, 即係鹹蛋超人, 因為對眼似兩個鹹蛋。
超人一號叫吉田, 超人三號叫阿香。
吉田駕駛戰機同怪獸搏鬥, 俾怪獸打瓜咗, 屍沉海底, 咁啱又俾 M78 星雲嘅超人睇中, 一於借屍還魂。
阿香亦都係俾怪獸做瓜咗, 再俾另一個超人借屍還魂。
問日本朋友, 點解無 Ultraman 2？
佢話如果超人唔夠打, 要揾人幫拖, 就彈一個出嚟, 求其話係二號咯。
超人心口無個勇字, 而係有個燈胆, 到時到候就會閃吓閃吓, 即係話唔可以超時㗎, 死人㗎。
嗰陣時日本仔好景, 邊有人 OT, 到時到候就放工, 去飲酒唱歌。
點解要整個燈胆係心口？
因為嗰陣時日本嘅工厰同寫字樓, 都會係當眼嘅牆上, 有盞燈, 夠鐘食晏夠鐘放工, 盞燈就會閃吓閃吓。
幪面超人, 即係 Mask Rider, 嗱, 博文裡面講嘅 rider kick, 香港就叫風雷電。
立冬靚女話幪面超人似昆蟲, 啱㗎, 一號、二號都係蜜蜂, 三號係螞蟻。
幪面超人係改造人, 即係話一個正常人俾壞人捉咗去, 改造成蜜蜂、螞蟻、昆蟲。
以前日本仔好景, 佢哋嘅生活就枯燥乏味, 成日想有啲變化, 所以就有改造人嘅諗法。
而家嘅幪面超人, 就係妖魔鬼怪, 再唔係昆蟲。
日本人嘅文化認為, 祇要肯幫佢哋, 有好處俾佢哋, 話之係昆蟲定係妖魔鬼怪, 一於當神咁拜。
日本仔特別多鬼故, 其實係反映佢哋內心嘅一面。
(6 號, 記住 6 號)
唉，细路哥真系细路哥，原来立冬都仲系甘“幼稚”。去做幼稚园老师一定很受欢迎。
係喎，＜三一萬能俠＞同＜鐵甲萬能俠＞真係經典，仲有機械人玩具出埋添。哈，壽哥真好野！
仲有沙漠神童,三一萬能俠,鐵甲萬能俠 ... 仲有就係上次和旦兄所談的獅子丸 ...
我一年一度和啲老友敘舊時,都懷念一番,唔理你係老闆也好,警司也好,GM,director,律師,校長或是狗仔都好 ... 乜都好,都會熱烈地講一輪,變成一班大細路 ... ... 哈哈哈
我地啲老婆仔女見到都好笑! 哈哈哈 ...
人生只有一個童年!!!
哈哈，May姐，唔駛擔心，我動靜皆宜的，所以總會找到一兩樣嗜好和你相同，總會有話題的．
雖然我性格好成熟，但仍保留著一份童真的．所以三歲至八十歲的人，一樣傾得埋．
飄零燕，義犬報恩，小甜甜，長腿叔叔，伙頭智多星，足球小將，黃金戰士，聖鬥士星矢，龍珠，死亡筆記，火影忍者全部都鍾意．但宮崎俊的動畫真係一套都未睇過呢．
其實超人系列我都是一般，所以我先至成日望個超人打輸呢．哈哈．．哈
哈哈！我還以爲立冬只愛看書和煲湯，原來還有時間看卡通片呢！
立冬：如何是好？我與妳有代溝(⊙o⊙)哦！
我不愛看卡通片，尤其是超人、怪獸之類——不喜歡那身裝扮，而且打打殺殺的劇情也是我抗拒的主因。
我喜歡的動畫片，印象最深的唯有《飄零燕》；再就是宮崎駿的動畫系列，如風之谷、天空之城、龍貓及千與千尋……
如妳也喜歡這類片，那我或可“老懷安慰”
多謝Indy同Lawrence的資料！我寫呢篇文的時候，都知佢地係專家，有咩卡通片好睇，問佢地就最好．
大家去Indy仔的網誌，就知佢真係專家，無介紹錯架．
電光再造人 .....是否主角常諗那句 "有黑暗就有光明，有邪惡的地方就有正義" 那套 .......無記錯, 仲有隻"狗" 與主角並肩作戰的 !
仲有電腦奇俠 , 天地雙龍 , 佳視播的五勇士!
說到暴力 , 小朋友諗野好單純, 愛睇超人劇, 我諗無小朋友想做怪物那方, 正面 d 睇, 其實從中正義感就可能是這樣培育出來 ! 而日本超人片, 動漫, 雖然有唔少打打踢踢場面 ....但其實有很多, 是很有意義 !
例 : 立冬喜歡的 "火影忍者" ....帶出的是 "友情" , "忍道 - 宗旨" , 與及"冤冤相報何時了？"
立冬姐:
閃光警號係話能源快用完, 不是提醒出招的說。
通常劇情係話超人同主角合成一體，從此主角可以變身。
至於幪面超人，多數係被改造，亦有的是藉腰帶或其他科學力量變身，每輯都唔同。
這兩系列的超人，都配好多玩具出，係真。但好難話純係玩具廠贊助，日本玩具動畫特攝電玩早已合體，好難話邊個贊助邊個的了。
呢個AGCT營商system，全世界唔係好多企業做得到。
對我來說，最好睇的長壽系列係戰隊，鹹蛋和幪面我都唔係咁鍾意。
Anyway，我細個時都曾因為被老豆逼我出街，無得睇鹹蛋打怪獸而大哭。
講到突破，其實係有，巴魯坦星人就係蝦超人蝦得最勁的怪獸。我記得巴魯坦一出，超人例牌俾佢SM。
提到幪面超人，唔係愈睇愈似昆蟲，而係根本一開始，石森章太郎就把他設計為昆蟲造型，並擁有昆蟲般的戰鬥力。有FANS曾為幪面超人龍騎造型唔係昆蟲而抗議。
indy
壽哥的記性仲勁！彩虹化身俠同電光再造人，你講開就有的印象，仲有咩呢？講多幾套啦。等大家都回味一下。
佩妮的記性真好，我已經咩都唔記得了。
ktk，所以我懷疑是那些玩具製造商斥資或贊助開拍這類超人劇集的。
幪面超人出現的時候，我已在社會上工作，四處奔走，沒有心情欣賞。但卻很憎恨這個幪面超人，因我的孩子化了我不少錢兩去買幪面超人的玩具。
超人(Ultraman)是我童年喜愛看的卡通片集，記得最後一集，超人能量耗盡，停咗係度，那時看後....很不開心。
那時覺得超人代表正義，怪獸代表邪惡。為什麼邪惡可以戰勝正義呢?
太不合理了~
最後讀歷史時才知道，為什麼日本仔要這樣做....
原來他們認為二次大戰日本侵略中國，不是侵略....而只是進入而已。
我細個時都很喜歡看超人片,乜超人呀,彩虹化身俠,電光再造人等等等都睇 ... 勁!
人哥，我記得了。Ultraman即係超人呀，係會變大果個啊。
不知道你說的蒙面超人是否國内叫,英文是: ULTRAMAN
（1）我個仔2嵗多開始看，後來我發現他越來越暴力，一天到晚都是打阿，踢阿。。。。的。結果在上個月，我就決定把他的數十個奧特曼玩具全部收起來不准再玩，也不准再看這個電視劇。太暴力，對少年兒童沒有任何啓發作用。
（2）數月前，溫縂對著日本的客人說，我孫子也每天都要看奧特曼，但是我覺得這類電視對少年兒童的心智影響不好，太暴力。
現在我發現中國有不少卡通電視劇很好，暴力少甚至沒有，而且有啓發性。中國内地的一些玩具廠商近年來已經會投資2000万拍一部卡通電視劇了，卡通片的銷量是不賺錢的，大約每套電視劇要虧200万到500万元。可是，通過卡通片而帶動的玩具銷量則很賺錢，每個卡通系列可以在玩具上面賺取約1-2個億的利潤。因爲，中國自己研發的玩具已經銷往韓國，東南亞，非洲，中東，起碼數十個國家。
有時候我也陪兒子看中國的卡通片，不但内容好，而且主題歌也很好聽。
故事集集一樣，當然係希望出現突破，係好合理的期望，好合理的好奇心