堆填區撞大板 焚化爐又走寶

講番垃圾處理呢筆，過去十年本港固體廢物增加咗三成四，現有堆填區過幾年就會飽和。當局對廢物處理無所作為，既唔想辦法喺源頭減少垃圾，又唔肯盡快建焚化爐，獨沽一味垃圾堆填區，滿瀉就擴建，呢次卒之搞出個大頭佛。

查實焚化爐唔係洪水猛獸。浸會大學一項研究顯示，以焚化方式處理垃圾喺海外相當普遍，其中德國、荷蘭、台灣、新加坡同日本，焚化爐燒垃圾比例由最少約三成到最高嘅八成。雖然香港起步遲，仍然有條件利用垃圾焚化發電。

垃圾焚化可以化腐朽為神奇，既能夠紓緩堆填區壓力，又能夠發電，仲可以創造就業添，一舉三得。咁着數嘅方法，當局居然一拖再拖唔實施，你話係咪個腦有問題吖？

唉，環境局官員眼矇、耳聾兼壞腦，良莠不分，珠寶當係草早有前科啦。呢，青洲英坭四年前已經向環保署提交咗一個處理垃圾方案，叫 「環保廢物熔化系統」。簡單嚟講，就係將水泥生產過程同燒垃圾結合，用都市固體廢物代替燃料煤生產水泥，過程中產生嘅剩餘灰燼又可以循環再用，做水泥生產 原料，既環保又有經濟效益，垃圾處理量高過傳統焚化爐，而且成本更低，啱晒香港。

開講有話，禮失求諸野，港府高官明知自己冇腦，照計應該多聽專家意見，集思廣益至係正路㗎。吓，估唔到呢班官老爺有眼無珠，擇惡固執，以選址同當局計劃中選擇嘅地方唔同為理由，拒絕考慮方案。

話時話吖，抽膠袋稅畀人狂炳，港府照樣掠水；派慳電膽券唔驚畀人鬧利益輸送；硬銷停車熄匙劣政亦唔驚擾民，「環保廢物熔化系統」既有利減排又惠及市民，當局居然前怕狼後怕虎，一直唔接納。係咪真心支持環保，畫公仔唔使畫出腸嘞啩。

話到尾，香港環保搞到一鑊泡，處理廢物嘅好橋胎死腹中，好大喜功、冥頑不靈嘅環境局高官難辭其咎。

前兩日有環保團體上街抗議港府喺環保方面無所作為，誓要「休騰華」，表達咗市民嘅心聲。計功夫茶話齋，如果班庸官仲知廉恥，快啲主動讓賢罷啦！

2010年10月26日(二)

http://orientaldaily.on.cc/cnt/news/20101026/00190_001.html?pubdate=20101026

不能燃燒發電的污泥就用焚化爐，能燃燒發電的垃圾就去堆填。明要浪費人民利益。

堆填區？可以為地產商制造土地嘛！所以博命堆填囉！最近仲狼到喺郊野公園嘅地做垃圾堆填！地點靚，最適合將來做高尚住宅的黃金地皮呀，所以咪喺度堆填囉！唔會選擇啲冇人嘅小島。咪就喺因為唔會有人住嘅地做地產是得地無所用嘛！ 

不去發電？會損害電力公司利益嘛！所以咪不用垃圾焚化爐發電囉！

從以上分析，政府唔係冇腦。而且辦事十分精明，很懂得計萛利益。