鄭伊健將於3月5至6日於紅館舉行《鄭伊健Beautifulday2011演唱會》,其經理人林姍姍說:「世上有好多人生道理,咩學識放低,忘記過去,才能好好享受人生,其實要擁有美麗嘅日子,事前必先付出更多。」的確,伊健出道20年,在高峰與低谷之間徘徊游走,雖然未曾得過任何音樂上的重要獎項,但其歌曲卻陪伴一眾70及80後成長,回憶總是美好的,難怪演唱會門票已幾近售罄,加場事在必行,在此預祝伊健演唱會成功:「Enjoyyourlife,Enjoyyourparty.」
主持:黃柏高 統籌:林永匡 協力:彭燕燕、廖思慧、袁東亮、陳紀塋
09年尾,十年沒有開Show的伊健在紅館舉行了兩場演唱會,在被看淡的情況下,票房卻大爆特爆,隨即決定加場,可惜礙於檔期問題,Part2要延至今年3月,然後,Part2沒有了,卻換來這個全新的《Beautifulday2011演唱會》,其實是甚麼名稱也不緊要,觀眾入場目的也只是希望看到一個全程投入做Show的鄭伊健。
鄭:「我哋成隊人都好鍾意做Show,好似一個Party咁,上次做Show我好緊張,今次輪到佢哋緊張,因為要再做一個精采嘅Party出嚟。」
林:「你上次好緊張咩?我睇唔出嘅。」
鄭:「十年無上台呀,壓力幾大呀,我唔出聲當唔知啫,真係好緊張口架,但我着重過程,亦好享受過程。」
林:「其實點解呢個Show會叫BeautifulDay呢,係因為近排好多人講咗啲人生道理出嚟,咩學識自在,學識放低,忘記過去呀,好多道理咁,其實在我哋心裏所想,要有美麗嘅日子背後,必先要付出好多嘢,像風雨過後是晴天一樣,所以想喺演唱會上做呢樣嘢,將人生一幕幕咁影像化出嚟。」
勁歌熱舞Show肌肉
在紅館開Show不容易,要控制氣氛之餘,亦要讓觀眾產生一種「咁快完」的情緒,但09年尾,伊健才開完2場演唱會,相信經過上次的熱身,這次Show對他來說,很易Handle的。
林:「Rundown已商討中,因為要從300幾首歌中揀合適嘅歌嚟唱唔容易,伊健已不斷提醒我哋,邊首歌上次無唱,今次一定要唱番,其實我哋都要好小心,因為上次觀眾覺得個Show好緊湊,睇得好開心,今次我都希望觀眾有同樣感覺,覺得唔想完就最好。」
鄭:「今次我會落力跳舞,又會着少啲,但因為之前操得太勁,中醫師話我操得太盡,叫我停一停,所以暫時未知可以操成點,但唔係一定胸肌大先叫靚,最重要身形靚,成正比,胸太大人哋以為你打針添呀。」
做導演拍愛情片
開完Show後,伊健有連場大計,估不到當事人原來對做導演亦相當有興趣,實在很期待跟他在電影上合作。
鄭:「做完香港Show,就會再向東南亞市場發展,之後對做導演都好有興趣,咁要拍當然要拍一啲自己有興趣嘅嘢,所以會拍一套叫《初夏之戀》嘅戲,當然係講愛情的。」
林姍姍跟伊健合作無間,對於這位藝人,她有說不完的感覺。
姍姍眼中的伊健
林:「佢好似我細佬,唔知點解佢成日都唔大,一見到遊戲機就好開心,佢換機嘅速度快過啲男人換車,但佢有個好得意嘅本領,就係好多人都好信佢,關於機械嘅嘢,佢自言係一個TopSales,哈哈。另外,佢優點就係好坦白,好忠於自己,喺呢行會好蝕底嘅,但我欣賞佢唔會呃自己,所以我都學習緊佢呢樣嘢,所有嘢,講好過唔講,做人忠於自己的確舒服好多。」 |