許冠文（Michael）是香港的棟篤笑始祖，他的幽默感與引起觀眾發笑的本領，相信年長一輩的讀者們也很清楚。自05年在紅館舉行過首次棟篤笑Show《鬼馬TalkShow》後，下月16日，Michael將再次以他的生動口才舉行《棟篤笑2：最後警告》。「呢幾年嘅世界有太多好荒謬的事發生，所以好想用講笑嘅方式講出嚟，希望以笑話去代香港人發洩。」人生匆匆數十年，笑與喊也要繼續做人，何不如Michael所言，笑着生活不是更有意義麼？ 主持：黃柏高
統籌：林永匡
協力：彭燕燕、廖思慧、袁東亮
Michael在我心目中是一個很厲害的人，他的口若懸河及幽默感實在令我相當佩服。5年前，Michael舉行了第一個楝篤笑Show，兩場全爆，成績斐然，5年後，Michael再度踏上紅館開Show，全因他對社會的荒謬變化看不過眼，無窮的感觸促使他再度開Show。
「世界愈來愈荒謬，像菲律賓發生挾持人質事件，重要關頭一班官員全部去了吃飯，個總統去到慘劇現場，見到滿車子彈窿竟然夠膽死談笑風生，有無搞錯？最離譜嘅係佢竟然解釋，佢悲哀係會笑的，唔係呀嘩？真係好想睇佢拜山嗰陣，係咪一路拜一路笑，我對呢件事嘅感受，同所有香港人一樣，憤怒而且無奈，所以我想用笑嘅方法去代香港人發洩。另外，我亦會講香港樓價，而家啲樓價貴到飛起，個個媽媽聲，特首話會用盡方法去壓低樓價，根本無可能，唯一方法就係搵董建華再做特首，因為當年佢在位時，樓價狂跌，業主變晒負資產，呢啲我都會同大家分享吓。還有人與人之間的隔膜亦愈來愈大，個個只跟電腦做朋友，以前約人食飯，一定係約實，依家約人，對方通常答：『call你啦。』代表對方喺call你之前，睇吓有無其他更重要嘅約會，無嘅先搵你。約朋友變得無晒誠意，就算出到嚟食飯，一坐低就玩電話，當你死嘅，飯到都係自己食，唔知係悲定好笑。」
愛做棟篤笑的原因
Michael所說的奇怪現象確實發人深省，要用電影手法拍出來不容易，但以棟篤笑方式去做，易於表達之餘亦更為彈性。Michael做棟篤笑已20多年，問到當事人為何如此沉醉，原來除了喜歡外，亦切合他喜歡講說話的性格。
「20幾年前去NewYork，有朋友帶我去睇棟篤笑，朋友話入場30幾蚊美金一張飛，可以由頭笑到尾，好抵睇。我話唔係卦，我唔笑點先，最後，我真係由頭笑到尾，之後我都好想試吓，買咗幾本書研究，然後就膽粗粗上電視節目試，再去啲頒獎禮度表演，繼而就去紅館開Show啦。」
開班誘發年輕人幽默感
除了以自身獨特幽默技能去令觀眾發笑兼有所領會外，Michael還希望去教導更多年輕人去嘗試做棟篤笑，賺錢是其次，誘發他們的幽默感，從而在職場上或待人處事上也能有所得着。
「之前曾經去嶺南大學教了8堂書，課程關於棟篤笑，想多啲年輕人去認識同去做呢樣嘢，唔係話教佢哋搵食，人有幽默感就做咩都掂啦，我以前讀書，啲老師教書好悶，搞到我唔想上堂，若然老師夠幽默感，學生都願意上堂同學習，又或者做Sales，識講嘢同唔識講嘢分別都好大，追女仔就更甚，若然你約女仔食飯，由8點引佢笑到11點，追唔到就奇啦。」
再度自編自導拍電影
Michael久未有電影作品面世，並不是他已厭倦拍電影，只是他在等待一個時機，讓一個全新的許冠文重現大銀幕。
「依家嘅香港電影太依靠大陸市場，咩都要改，好煩，但我對拍電影依然好有熱誠，更計劃自編自導自演，但我唔想拍番以前嘅嘢，希望有一個新嘅許冠文喜劇模式出嚟，所以做完Show後，我會努力地去諗。」
| 
