《最強囍事》粒粒巨星 游說栢芝復出子丹派笑彈 黃百鳴:觀眾一定想睇
2011/01/31 08:46:53 網誌分類: 娛樂 31 Jan
何謂「最強」?像年三十晚上映的賀歲片《最強囍事》般,以粒粒巨星去拍攝一套集搞笑與溫情於一身的愛情片,去跟觀眾們賀年便是好例子,當中有首拍喜劇的甄子丹及產後復出的張栢芝,還有前者點名要合作的劉嘉玲及跟後者合作多次的古天樂,加上杜汶澤及內地一級女星閻妮等,齊齊在賀歲檔發放笑彈。問到粒粒巨星,度期拍攝及拍攝期間有否難度?監製兼老闆黃百鳴笑言,只要電影有好成績就可以了。
主持:黃柏高
統籌:林永匡
協力:廖思慧、袁東亮
黃百鳴老闆是拍賀歲片的始祖,由多年前的《家有囍事》開始,「囍事」系列成為賀歲檔中的必然一份子,今年黃老闆繼續將「囍事」發揚光大,以「最強」班底在農曆新年大放笑彈。
黃百鳴:「所謂『瘦田無人耕,耕開有人爭。』因為○九年一套大收嘅《家有囍事2009》令到曾志偉眼紅,之後一年又叉隻腳去拍賀歲片,良性競爭我接受嘅,但今年愈嚟愈多,市場競爭愈來愈激烈,要加把勁去計劃同作出變陣。所以當陳慶嘉導演提出不如搵甄子丹合作,我覺得好有意思,因為子丹未拍過喜劇,觀眾應該好想睇,最後,成功搵到子丹之後,再搵嚟產後未拍過戲嘅張栢芝,演員班底變得愈來愈強。」
甄子丹的秘密
雖知道甄子丹是一級動作演員,黃老闆夠膽替他轉戲路已令我深感佩服,更厲害的是,能夠說服子丹,兼從他密不透風的檔期中,抽出十日作拍攝,黃老闆才是最強之霸。
黃百鳴:「如果觀眾唔接受子丹拍喜劇,只會鬧我,但若然觀眾受的話,子丹就會多條戲路,我一開始就安慰咗佢心靈先。但佢嘅檔期太密,我無本事同其他老闆攞期,就唯有同子丹講,叫佢畀十日出嚟,呢十日除可令佢賺好多片酬外,又唔使離開香港,可以見到老婆仔女,又可以扮到靚一靚,何樂而不為呢?無幾耐,子丹笑笑口同我講,佢有10日空檔嘞,之後,佢話有一個條件,就係一定要搵劉嘉玲做拍檔,因為佢哋未合作過,當時《讓子彈飛》未上,要度嘉玲嘅檔期就易傾好多。」
杜汶澤犧牲色相
電影除了有子丹及嘉玲等巨星外,還有搞笑能手杜汶澤參與,據知他在戲中需要在不知情下犧牲色相,不過,當事人相當專業,了解過後便全心投入拍攝。
陳慶嘉:「阿澤在戲中需要扮女人,我敢講,佢扮女人絕對靚過王祖藍,亦較佢更有韻味。」
杜汶澤:「我好信導演,之前拍《人間喜劇》令我有好大轉變,知道拍笑片除了搞笑外,亦要有情懷,就算一個癲佬走去打女人,都要有情懷,呢樣好緊要。所以有一幕要我除褲,我問導演,佢話同我講咗要拍一幕香艷鏡頭,原來就係要我除褲,但最後我都信佢。」
張栢芝緊張復出作
當張栢芝宣告會復出,相信邀請她拍戲的電影商多不勝數,黃老闆自言沒有太大信心找她拍戲,但因為古天樂指明要找女方做拍檔,最後,在黃老闆的堅持下終於得到了栢芝產後復出的第一次。
黃百鳴:「因為古仔要求跟栢芝合作,我同後者唔熟,又無合作過,我知好多人搵佢,自覺勝算唔高,但最後憑住四項人無我有的必殺技,最終得到栢芝復出的第一次。嗰四項就係《家有囍事》嘅名牌,仲有群戲嘅主因,唔使全程佢孭飛,壓力自然小,加上對手係古天樂,佢哋合作過六次,有默契之餘,亦令栢芝拍得安心,最後就係賀歲片呢個好意頭,復出作當然要揀個夠吉利口架啦。」
陳慶嘉:「栢芝第一次埋位都有啲緊張,要熱身一陣先可以投入,但第二日已經好咗好多,佢好緊張自己復出嘅表現,經常要睇Playback,亦好滿意佢嘅演出。」