《我愛HK》成票房No.1 曾志偉：一定要拉隊謝票！
2011/02/14 08:48:37 網誌分類: 娛樂
| 農曆賀歲猛片中，我首選曾志偉執導的《我愛HK開心萬歲》，大堆頭演員陪你過年大派笑彈，戲院內外總是笑聲不絕，人人讚好。是的，口碑很重要，還未入場的你，真要抽空支持，電影上映兩星期票房已衝破2,000萬元（截至本周日）成票房No.1，作為監製的志偉坦言這次是繼《最佳拍檔》後又一佳作，為答謝觀眾支持，四出拉隊謝票，每次例必有驚喜，今天更百忙抽空跟我細訴他那份「香港情懷」。 主持：黃柏高 統籌：林永匡 協力：彭燕燕、袁東亮 場地提供：板獎火鍋（訂座電話：23676680） 曾志偉說電影賣的是人情味，去年賀歲檔有《72家租客》，今年有《我愛HK》，兩片都以80年代港人發憤圖強、左鄰右舍的團結精神為本，那份情懷贏盡共鳴。 「港人在菲律賓遇難，推動我開拍此片，始終過去的就由它過去，放下悲傷向前望，日子總要過，這是繼《最佳拍檔》最開心一次，要鼓勵港人繼續撐住。取材屋邨，是要人唔好忘本，其實香港好多有錢人都係草根出身，屋邨長大，以前中學未畢業唔緊要，你肯做就得，藍領捱到白領，又或者打三、四份工養家，左鄰右舍互助團結，但今時今日，唔好話隔離屋，一家人想傾多句都唔得，班細路成日攞住部遊戲機，你坐喺度要send短訊嗌佢食飯嘅，問你怕未？」 阿緊好戲 又一次碌爆人情卡，大堆頭演員分演每個小故事，囊括老中青觀眾，曾志偉激讚馮粹帆寶刀未老。 「去年《72家租客》有張學友，今年有九哥九嫂（梁家輝、吳君如）坐陣，觀眾好鍾意睇佢哋，好似有場戲要君如用條脷舐iPhone，笑爆全場，君如就係咁正，度到啲笑位唔會自私收埋。阿緊（馮粹帆）就唔使講，你知嘛，當初佢收到劇本，只係拋低一句『哦，做老嘢呀。』我以為佢唔鍾意，到埋位就知，佢交足戲，扮鬼那場戲係特意加的。林欣彤、李治廷就係因應不同年齡層觀眾加入，個個都做得好好。」 香港電影 人人說港產片難做，無他，觀眾永遠首選卡士製作高幾班的西片，為引起觀眾注意，曾志偉不惜使出80年代撒手鐧，跟競爭對手互數互窒。 「唔知幾時開始，賀歲檔會上演吸毒、打打殺殺的片種，賀歲唔係應該笑咩？《我愛HK》揮贏兩部魔法西片，係贏口碑，所以要跑圈謝票，多得傳媒個個睇好，你睇我同百鳴（《最強囍事》監製）企出嚟互窒互寸都係想引起話題。拉隊踩場那天，我見佢塊面黑晒，幾過癮，其實80年代好興呢套，嗌嗌下，班觀眾就會唔記得有其他電影，係可以雙贏。今時今日電影真係好難做，以前就話4日定輸贏，今日只得4個鐘，見你唔得就cut場次，cut剩日場同夜場，大院變細院，點做？不過咁，電影票房係嗌返嚟，去年《72家租客》收3500萬都係嗌返嚟，係周邊氛圍效應。」 望子成龍 有誰不是望子成龍，曾志偉亦然，女兒曾寶儀是台灣名嘴之一，兒子曾國祥已是新晉導演，說到兒子從場務做起到今天獨當一面，志偉不自覺笑起來。 「個女係靠自己上，我介紹佢去幫主持寫稿，最好係咁，從低做起，連稿都唔識寫，點做主持？如果你見我倆父女同場主持，那個騷一定係無錢收的。個仔入行，我介紹佢去幫陳可辛做場務，係電影最辛苦最多嘢做的崗位，但勝在多嘢學，估唔到佢enjoy，過到第一關，佢就去當副導演，可惜佢拍culture片，我拍商業片的，所以合作唔到，哈哈，呢個講笑啫。老實講，我睇過《戀人絮語》覺得唔錯，如果佢唔係我個仔，我會搵佢開戲，但佢唔肯，話唔想被人話我貼錢佢開戲，呢個仔都幾硬淨，明明無錢入油，畀錢佢都唔要，話不如你搵嘢我做啦，點都好，我會支持佢。」 |
 | |
| |
 | |
| |
 | |
| |
 | |
 | |
| |
 | |
回應 (0)
我要發表
