出錢出力助友復出 撐蔡楓華重新上路 盧敏儀：我要佢放低過去！
2011/02/28 08:46:19 網誌分類: 娛樂
| 患難見真情，蔡楓華復出樂壇，盧敏儀幫到盡，出錢出力碌爆人情卡，無非想給他一個機會，姑勿論這剎那的光輝能否永恆，全城關注、觀眾熱捧，演唱會兩度加場皆是事實。我敢說，蔡楓華要多謝的，一定是盧敏儀夫婦，須知道，從一開始，已飽受周遭人的白眼，至今天的成功絕不敢說容易，少一點耐心，蔡楓華都難以圓夢。 主持：黃柏高 統籌：林永匡 協力：彭燕燕、袁東亮 誰說人間無情？盧敏儀貼錢幫蔡楓華，目的是要讓他重新投入社會，復出騷是第一步，往後的日子則要靠蔡楓華自己。 盧敏儀：「講真，蔡楓華咁多年來遇到咁多風風雨雨，真係好慘，我知佢一直有個心願就係開演唱會，所以好想幫佢，今次要多謝傳媒朋友支持，大家畀咗好多愛和包容，我好開心見到佢有進步，我想講，今次係一個開始，之後的要睇佢自己。」 孫敬安：「當初我老婆問我可唔可以搞呢個騷，我話可以，後來我同蔡楓華講『依家我係幫你，唔係做生意，你知唔知？』佢話知，跟住我就幫佢周圍拍門搵人投資，大名娛樂、耀榮娛樂都怕咗佢個名，驚佢亂講嘢，唔知會做啲咩傻事，咁無法啦，我自己真金白銀攞錢出嚟搞囉，到後來，大少（林建名）畀面我又玩少少，呢個算係一個好大鼓勵。」 下一站紅館 蔡楓華重踏舞台成全城熱話，大家關注喺這個胡蘆賣的是甚麼藥，孫敬安坦言Rundown仍未編排，但絕對要觀眾拍案叫絕。 孫敬安：「修身減磅後就是排山倒海的宣傳訪問，老實講，門票都賣晒，係唔需要做咁多訪問，但做人點可以咁？叫人幫手宣傳就得，去做個訪問就唔得？點講得通。演唱會將會有勁歌熱舞，舞蹈員都預備好，會有一Part深情對話，等蔡楓華可以同觀眾剖白心聲。嘉賓方面仍未定實，譚詠麟、陳奕迅會來，講真，話開騷，第一場門票首日售罄，都無人估到可以開到三場，如果要再做落去，下一步就去紅館，大名娛樂都話好耐冇見過有Artist人氣咁高，所以都計劃同佢出唱片。我自己間公司今年會投資開戲同拍片，預計投資8千萬，屬時裝打鬥片種，主打內地巿場，會在外地拍攝，其實近幾年，大家都會關注內地巿場，你諗吓，依家近乎每日有兩個銀幕開，內地農村小鎮多的是，電影院發展迅速，點會唔關注這個巿場。」 鑽牛角尖 曾經紅透半邊天，跟張國榮睇齊的蔡楓華，過去十年，生活一度陷入低潮，如今強勢復出，鏡頭前表現淡定，舉手投足都有大將風範，盧敏儀說他「過去」只是受性格影響所致。 盧敏儀：「蔡楓華份人都幾固執，過去經常鑽牛角尖，我有試過鬧佢，係為佢好，我丈夫EQ好高，我唔得，我唔想佢再傻落去，有乜嘢放唔低都要放低。」 孫敬安：「佢唔係好信人，可能受過傷，會防範人，成日諗以前唔開心的日子，所以每次做訪問見記者前都要傾，始終過去十幾年鮮有與外界接觸，捱到今日已經係好勁，好似早兩日咁，佢打畀我喊晒咁，話自己做訪問講得唔好，唉，過去嘅咪由得佢過去。」 相處之道 盧敏儀說她很幸福，與孫敬安相知相惜22年，恩愛無比，多得丈夫支持，捱過人生最艱苦的日子，含着淚說她的故事。 盧敏儀：「我哋喺88年認識，92年拍拖，那年我個騷跌爆眼，右眼縫了廿針，那次他一直陪在我身邊，97年結婚，大家一直好愛大家，當我要到英國讀書，分開一年，喊咗好耐，你唔好睇佢硬崩崩好Cool咁，其實佢不知幾可愛。相處之道？我唔知喎，只係知好難得有人咁錫我，Keep住覺得好Sweet，好似初戀咁，出門口前要錫錫，上庭前要佢同我講GoodLuck，好簡單，我唔會要好多金好多鑽，買呢啲嘢我通常都會唔見。自己仍好Enjoy做Artist那種成功感，但今日的我，覺得自己個世界大咗好多，以前點會諗咁多嘢，睇單新聞睇完就算，依家會諗好多，會諗背後的社會問題，人生閱歷豐富好多。」 |
 | |
| |
 | |
| |
 | |
| |
 | |
 | |
|
回應 (0)
我要發表
