由於香港社會貧富嚴重兩極化，社會瀰漫着不滿情緒，有見及此，香港電台特別製作以探討貧富懸殊問題的《窮富翁大作戰》，讓有錢人親身體驗窮苦拮据生活，去年推出後引起不少響，如今來到第二輯，「嘉賓」名單更厲害，當中包括諾基亞香港及澳門區市場營運總經理林國誠（Bruce)，日送外賣11小時兼在嚴寒下露宿深水埗街頭五日四夜，「真係好慘，有一刻諗過放棄。」但看着「曙光行動」的社工們對低下層人士的無私幫助，終讓感受到人間有愛的Bruce戰勝心魔。「我真係好希望大眾能關注貧富懸殊問題。」節目將於明晚7時無綫電視翡翠台播出。
主持：黃柏高
統籌：林永匡
協力：彭燕燕、廖思慧、袁東亮
Bruce是我的好朋友，當得知他參與這個計劃，真的很佩服他，聽着他為這個節目真心真意的付出，看着他雙眼閃着淚光，知道這個五日四夜的體驗令他感受至深，由決定參與到真正體會，Bruce實在有說不出的苦。
「當港台邀請我做呢個真人騷，我考慮咗一陣就接受，因為節目希望帶出正面訊息，希望社會嘅人能夠關注社會上的低下層，所以6集裏，每位參與者都擔當不同角色，全部皆是真實故事加親身經歴。當中我負責做一個日做11個鐘送外賣兼夜瞓深水埗街頭嘅露宿者，唔瞓過唔知，原來有三成露宿者都係從大陸回流嘅人，因為無辦法才瞓街，因為要政府協助，申請最少要等35日。」
曾想過退出
Bruce只要經歷5日4夜的露宿者生活便可以打回原狀，但真正露宿者，沒有明天，只有無止境的以街為家，說着這5日苦況，Bruce相當感慨，皆因節目一開始，他便要以2元在深圳展開這5日的體驗旅程。
「一開始，社工只國畀2蚊我，身上只身份證同回鄉卡，手提電話都沒收，為咗由深圳返香港，我唯有厚住面板同鐵路職員講無錢，職員隨即俾咗張表我填，只要7日內還錢就可以，原來九鐵係有呢個咁好嘅服務，之後社工就帶咗我去深水埗，因為嗰度係最多露宿者。記得第一晚溫度只得7度，我只好搵紙箱瞓喺公園，嗰種寒風入骨嘅感覺真係永世難忘，第二晚頂唔順實在太凍，就匿入貨車車尾瞓，好彩好多貨車司機都好好人，隻眼開隻眼閉，但壓力好大，因為揭咗好多架貨車車尾先搵到一架空車。因為你唔知有咩人會入嚟瞓喺你隔籬，壓力真係好大。全程都處於半夢半醒狀態，嗰刻想退出嘅心好強烈。」
露宿者的苦況
Bruce去茶餐廳求職外賣散工，苦無電話屢遭拒絕；即使有人願意聘請，薪金亦被壓低。晚上要在深水埗露宿街頭，環境惡劣，時值去年聖誕節，寒風中以紙皮蔽體倍覺悲涼。
「去年12月25日，我一直送外賣，其間一直留意天氣報告，知道當晚避寒中心會開，我好開心，終於有晚可以有瓦遮頭，因為睇新聞都知，避寒中心好大好光猛，但點知去到，發覺中心提供嘅氈全部都好污漕，有露宿朋友同我講，叫我搵中心嘅樓梯口瞓，但搵極都無，俾人霸晒，無奈下唯有坐喺中心嘅門口位，從而得知點解避寒中心入住率咁低，因為當中好多都係癮君子入住，我一晚裏聽得最多就係打火機聲，然後見到好多受藥物影響嘅人行嚟行去，成晚我就坐喺度，唔敢瞓，心理壓力真係好大。」
曙光行動令人感動
雖經歴了5日4夜的露宿生活，但Bruce由抱着懷疑的心到最後變得感恩，全憑「曙光行動」一班無私的義工，他們不望回報只求付出的菩薩心腸，令Bruce心受感動。
「瞓街咁多晚，『曙光行動』啲社工都無停過，就算平安夜同聖誕都一樣照派衫同氈畀啲露宿者，我問佢哋唔使過節咩，佢哋話：『我要過，佢哋都要過。』佢哋嗰種菩薩心腸真係令我好感動，我信佛㗎，一直以為菩薩只喺天上，原來人間都有的。我只希望多啲人知道，一個完整社會同公司，都一定有一班基層員工，一定要專重每一個工作崗位。」 | 
