剛上映的新片《報應》，由羅永昌執導、杜琪峯監製，看片名還以為如杜監製的舊作《大隻佬》般探討因果，原來電影以懸疑手法去說一個綁架故事，當中所表達的是人性的黑暗面，但又跟《神探》不同，因為電影內沒有絕對的好人與壞人，因為每人心中皆有一把尺，執導過《每當變幻時》等片的羅導演坦言：「希望觀眾把焦點放在『人物』和『人性』兩方面，看完能夠有所反省，明白《報應》兩字的真正意義。」 主持：黃柏高
統籌：林永匡
協力：廖思慧、袁東亮
所謂善惡到頭終有報，只爭來早與來遲。
《報應》以一宗綁架案作引子，帶出「一念天堂，用之救贖，用之殺戮」的微妙關係，不要誤會電影的中心思想是想探討宗教的天理循環，實情是講述人性，以為復仇可以懲罰敵人？原來到最後，懲罰者才是受害者。
羅永昌：「人對人有好多要求，希望對方點點點，然後出現一個自己想要嘅結果，就好似黃秋生飾演嘅角色，對下屬同仔女都有好多要求，永遠用自己把尺去度人，但呢個世界點會咁簡單，唔係你話想點就點，你做過咩行為，就有啲咩結果出現，呢樣就係我想透過電影嚟表達嘅核心。唔好聽過片名就以為係講因果咁大件事，只係想觀眾明白，每行一步，每做一件事，衍生出嚟嘅結果都唔同，所以凡事必定要三思而後行。」
睇好Janice Man
跟羅導演合作無間的編劇馮志強一直強調，戲中所有演員均表現超班，除了好戲之人黃秋生外，飾演其女兒的文詠珊（Janice），演技更是讓他及導演刮目相看。
馮志強：「Janice飾演秋生個女，我哋一開頭就寫佢遺傳咗爸爸嘅霸道，所以佢喺戲內係迷你版秋生，除因為被綁票而經常被打外，更要演秋生嘅影子，難度相當高，但Janice都做得好好。因為佢嘅角色好重要，係故事嘅脈絡，唔係佢被綁，秋生唔會因為忿怒而報仇，然後再去到萬劫不復嘅境地。」
Janice慘遭虐待
演技被讚賞的Janice坦言，跟秋生合作是難得地興奮，但對於在戲中經常被打，甚至被活埋，嬌滴滴的她竟然說好玩。
Janice：「其實一收到劇本已大概知要做乜，但到拍攝時卻是意料之外，好多場面令我好震撼，被泥活埋係好恐怖，因為我好怕蛇蟲鼠蟻，但都唔及被綁匪打，唔係因為我怕痛，係因為嗰幕我要矇住眼綁晒手腳，心理關口好難過，因為我係知將會畀人打，但明知又要扮唔知，好難演，加上矇住眼，嗰種就嚟就嚟嘅感覺真係好難頂，但而家拍完嘞，我就梗係唔驚啦，仲覺得好玩。」
恭碩良的第一次
因為恭碩良（Jun）的型格吸引到導演，所以令前者有機會一嘗做綁匪的滋味，但對於這個第一次，Jun卻百般滋味在心頭。
恭碩良：「因為戲中演一個細膽嘅綁匪，做咩都好緊張，其實我拍嗰陣真係好緊張，特別係要虐打Janice嗰幕，真係好驚。可能之前拍《同門》嘅反應幾好，所以導演今次搵我做呢個角色，而家對拍戲嘅自信心大咗，雖然拍戲要做好多預備，但我好Enjoy。」 | 
