感激太太全力支持 黃浩然希望有機會再拍電影!
「放下不代表失去!」黃浩然說他曾經迷失,從電影跳進電視,過着非人生活,心有不甘,幸好有天開竅,發力狂跑,到了今天,黃浩然的名字不再陌生,劇接劇的現身電視熒幕上,角色種類繁多,憤青、戇探、窮家子,如今是無綫獨當一面的外援小生。「以前唔識把握機會,希望有機會再拍杜生(杜琪峯)的電影!」黃浩然說起自己的故事,悲喜交集,是啊,要簡略道出13年辛酸經歷,談何容易。
主持:黃柏高
統籌:林永匡
協力:彭燕燕、袁東亮、黎寶倫
常說「過去的是經歷,明天才是重點!」黃浩然曾是杜琪峯導演的頭號愛將,如今是無綫的「鐵腳」外援小生,跳進公仔箱四年,恍如活在木人巷。
黃浩然:「好多人都話撈唔掂先入電視,因為電視台真係好少錢,唔到最後一步你都唔會諗。記得06年,TVB監製黃偉聲搵我合作,那時就諗,過去9個月都只係開得十日八日工,覺得可以試吓。初時都幾困難,頭兩、三部劇都唔知做乜,成日好驚人點睇,覺得自己回晒塘,仲衰過初入行,那時搭公車出入,搭廠巴返工,盡可能慳住使,好氣餒,直至遇到李添勝監製的《碧血鹽梟》才真正尋回演戲感覺,好開心,學到好多。過去三年來沒有休息,在《真相》演律師才知法庭戲唔易演,要在法庭上突出角色character唔容易,自己評自己,有待改進!」
啟蒙老師
要在演藝圈上位,須集天時地利人和,黃浩然說他很幸運,觀眾接受他,TVB如是,畢竟黃浩然非「親生仔」關係,最多謝的是啟蒙老師鄭則士。
黃浩然:「我哋這行做得耐,好易滑牙,真係估唔到Ken哥(鄭則士)今日仲咁有火,跟他合作《情越雙白線》演父子,大家好有默契,佢教我好多,之前在公司撞見,佢會主動打招呼閒聊,後來才知咁做係可以幫助演戲,唔會話拍劇合作先來認識,佢教我做演員要學識觀察身邊每人每物,收到《情》劇本,Ken哥更邀請我返屋企讀劇本,佢對我好好,在他身上學到好多,包括待人處事。」
禁絕野心
有麝自然香,破格上位讓黃浩然成為搶手貨,監製愛起用,無非貪他有人氣又肯做。
黃浩然:「好多人話我太低調,冇乜野心,好似《真相》被陳展鵬搶戲都唔為自己爭取下,其實好多嘢唔到我控制,我唯一可以做的,是做好我自己,在TVB這四年,我學會全情投入工作,唔去諗其他嘢。視帝?這個一定是目標,但唔會set個時間限死自己。我一定會再拍電影,等我Ready好就會去做,以前唔識把握機會,都希望有機會再拍杜生(杜琪峯)的電影!講真,就算公司真係度到五日期出去拍戲,都未必去,你知這行變幻莫測,既然係咁,不如專心拍劇,真係好忙,剛跟周麗淇完成《我的如意狼君》就要同鄭嘉穎拍《拳王》打到飛起,全部親身上陣,冇pad冇墊,體能要求好高!」
學做爸爸
黃浩然有個幸福家庭,太太全力支持,跟他共度起跌,四個月大的兒子Jaydon是生活動力。
黃浩然:「太太好支持我,或者叫做妥協啦,佢從來都唔會阻我做任何嘢,即使我話要去內地拍劇半年,佢最多會有怨言,但最終都會妥協,諗落都幾唔fair,好在大家都係呢行,佢會明白難得有機會搵外快,點辛苦都要度時間去做,因為你唔知一坐要坐幾耐。現在太太全職照顧BB,自己就未習慣,換片、餵奶這些已學識,沖涼就仲未試,我諗遲吓識行識走會好辛苦,講真,做人爸爸感覺都幾奇妙,睇到一個個體由你而生,希望將來同個仔溝通到,大家好似朋友咁互相尊重。」
| |
| |
| |
| |
| |
| |