講電影說音樂論藝人 林建岳笑談香港娛樂圈
2011/09/26 08:43:24 網誌分類: 娛樂
| 雖然「東亞娛樂」只成立了7年，但已是香港舉足輕重的娛樂公司，「東亞」為香港娛樂圈孕育無數好電影及音樂，實在多得其老闆林建岳先生（Peter）的付出，在艱難的日子仍願意落重本投資香港的電影及音樂市場，為推動香港娛樂事業出了無數力量。好高興這位半途出家的娛圈奇才抽空接受「名人會」的訪問，加上他還勇於發表其對現今香港娛樂圈的睇法，暢所欲言地談電影說音樂兼論當紅藝人，讀者們萬勿錯過。 主持：黃柏高 統籌：林永匡 協力：彭燕燕、廖思慧、袁東亮 實在很佩服Peter的腦筋及魄力，其一手打造的娛樂王國搞得有聲有色，旗下全是香港最當紅的藝人，所製作的電影仍是影展常客，為港爭光之餘兼替香港娛圈提供無數養份。 林：「香港係一個好特別嘅地方，好多藝人都可以三棲發展，而大中華市場都亦開始行呢一套方法，因為歌手單純只出唱片係搵唔到食，最緊要有演唱會同廣告，後者更係藝人嘅主要收入來源，而藝人入到屋嘅話，廣告價更為值錢，加上廣告歌，樣樣都有關連，呢個係大趨勢，香港藝人一定要多方向發展。」 華星唱片是一種精神 Peter投資唱片公司的資金較國際公司更多，娛樂王國當中便包括「東亞唱片」、「AMusic」、「CMD」及最新的「華星唱片」，其對音樂及廣東歌的支持實在值得鼓掌。 林：「華星係一個好成功亦係香港好重要嘅Label，培育咗好多一線歌手，亦擁有無數經典金曲，係一個寶藏，但Label都要有新歌先可以延續落去，否則十年後，下一代未必知道華星係咩，而收購華星都係好機緣巧合，因為公司好多歌手都係華星出身，每次開演唱會就要問華星攞版權，其實係一件難事，而且華星對香港樂壇好重要，係一個精神，加上睇到佢嘅潛質，覺得Label可以延續落去。」 《單身男女》的啟發 香港電影跟內地影壇已不能分開，合拍片已成大勢所趨，無論電影公司、導演還是演員已北望神州尋求更大的市場，投資了無數大製作合拍片的Peter對此亦有更深一層的見解。 林：「以前會覺得內地唔會接受港式嘅愛情片，但講港式愛情嘅《單身男女》令我有所啟發。因為互聯網嘅發達，資訊傳遞快咗好多，內地同香港嘅文化亦拉近咗，情況等同《志明與春嬌》，估唔到香港禁煙然後引伸啲人去後巷打邊爐（即圍住煙灰缸食煙）嘅題材，內地接受到之餘仲有好大迴響，所以續集《春嬌與志明》就索性搬去北京拍，一個港式古仔但喺北京發生，一部好有趣嘅電影。」 時間浸出來的男明星 可以擔到大旗的香港男明星有好多，但大部分已有一定年紀，年輕又可孭飛的男演員實在有數得計，男主角青黃不接是香港影壇目前遇到的最大問題。 林：「的確係，好似一線嘅華仔同偉仔等，全部都近50歲，再拍愛情片比較難，唔係話50歲唔可以談戀愛，但觀眾已經睇咗好多年，所以好需要培育男演員。因為男演員要時間去浸，唔係話一兩部戲就可以去到好高境界，相反女演員會易好多，好似湯唯咁，一套《色戒》就將佢帶到好遠。李治廷嘅起步算係好成功，因為佢外形好可塑性高又識作曲，加上有很好的音樂修養又係英國讀書番嚟，比較有內涵，起步算係唔錯，但要再往上走都係要花好多時間。」Paco林建岳 黃柏高 |
 | |
| |
 | |
| |
 | |
| |
 | |
 | |
| |
 | |
回應 (0)
我要發表
