去年賀歲檔的《最強囍事》確實好強,香港收2千萬,在內地更大收1億7千萬,黃百鳴老闆今年再Encore,玩浪漫愛情的《八星抱喜》繼續以巨星搞笑作賣點。首次合作,勁有新鮮感的陀B陳慧琳及古天樂固然吸引,甄子丹與吳君如化身Band友及過氣女歌手,歌舞連場同樣是No1賣點,「過年最緊要開開心心。」黃老闆說。《八星抱喜》將於1月21日上映,祝願讀者在龍年心想事成,齊齊「抱喜」。 主持:黃柏高 統籌:林永匡 協力:廖思慧、袁東亮
從《家有囍事2009》開始,《八星抱喜》已經是這個成功「喜事系列」的第四部。在全新的愛情喜劇故事下,《八星抱喜》繼續行巨星制,其中2011年人氣爆棚的楊冪跟黃百鳴以父女檔參與賀歲,產後復出又再陀B的陳慧琳取代了去年復出的張栢芝與古天樂首合作齊搞笑,加上子丹同君如以及杜汶澤跟熊黛林,一眾巨星齊在農曆年大放笑彈????觀眾開心。
「劇情講述4個男士幫4位女士去完成4件任務,酬勞就係一個擁抱。我跟楊冪飾演父女,因為電影要顧及內地市場,所以就搵嚟舊年紅爆內地嘅楊冪同我拍檔。而君如就跟子丹,佢哋以往從未碰頭,由於子丹以前嘅角色都比較木訥,究竟點挑開佢條喜劇筋呢,一定要搵一位好嘅演員同佢做對手,好放嘅君如就係一個絕佳人選,佢兩個喺片中仲會大開金口由頭唱到尾,相當精采。而阿澤同Lynn是舊拍檔,今次後者做盲女,故事發展自然爆笑連場,最後有人捐贈眼角膜畀阿Lynn,重見光明自然第一時間要睇吓阿澤係點,搞到阿澤驚到走,好笑又浪漫。至於Kelly同古仔,就由Kelly自己講啦。」
「我好耐無拍戲,但因為《八星抱喜》係賀歲片,開心又輕鬆,所以我好樂意參與,以前好少人搵我拍搞笑片,所以覺得今次好好玩,加上角色有得發揮,又有啲特別演出,而且拍檔係從未合作過嘅古天樂,拍攝期間真係開心到不得了。記得第一日合作,古仔無着衫,第二日佢只着一條肉色短褲仔,劇情講我要用個頭去就位遮住佢條短褲仔,期間又要用相機係咁影佢,有啲尷尬但好搞笑,而且,同古仔首度合作嘅感覺好好,因為佢拍開搞笑戲,經驗好豐富,每日開工,佢都會度好多搞笑對白或動作,但拍之前又唔同我講,一Roll機先做出嚟,畀佢考起之餘又好好玩。」
每年賀歲大戰
農曆年是每年港產片的黄金檔期,今年除咗《八星抱喜》外當然還有曾志偉的《喜上加囍》,對於這位每年一遇的對手,黄老闆坦言良性競爭是好事,最好套套電影也能大收旺場。
「記得80年代,賀歲檔是兵家必爭之期,因為每年能破票房記錄嘅電影都係賀歲片,當年新藝城拍《最佳拍檔》,兩次破記錄都係賀歲期,嗰陣時片商爭崩頭先得到賀歲檔,但好奇怪,近年竟然無人拍賀歲片,香港人過年只可以睇西片,有一年仲係做打打殺殺嘅《霍元甲》,點可以過年無喜劇睇㗎,所以我先拍番《家有囍事2009》,亦好幸運成為當年華語片票房冠軍,之後志偉眼紅,第二年就加入同我搶,但搶有搶嘅好處,因為賀歲檔係我哋中國人嘅,好多老人家一年先入一次戲院,就係新年時期揀一套合家歡嘅電影開心吓,多幾套呢類電影畀觀眾去開心,我覺得係好事。對於今年希望有咩成績?自己同自己比較啦,超過舊年成績,一年好過一年就最好。」 |
順預祝福一年好過一年就更最好 !