張信哲是我最欣賞的華語歌手之一，他不單是情歌王子，是只應天上有的靚聲王，其得天獨厚的一把能透玻璃的靚聲，一聽難忘。為紀念入行20年，阿哲由去年開始便舉行《I Saw我看見張信哲世界巡迴演唱會》，3月29及30日將重踏紅館，為給予自己及歌迷新鮮感，阿哲任命自家舞台劇團的班底製作演唱會，「用我嘅歌做串連，我會用戲劇加舞台加服裝來向觀眾展現充滿故事嘅音樂。」近來香港市民對社會有太多不滿的聲音是時候洗滌一下心靈，阿哲這位天籟之音來得正合時宜。 主持：黃柏高
統籌：林永匡
協力：廖思慧、袁東亮
化妝：CathyLau(ColourCorner)
髮型：JohnnyWu(HairCorner)
過去兩年，阿哲走遍了美加、英國及內地舉行巡迴演唱會，但他不忘香港的歌迷，千辛萬苦騰出空檔再踏紅館，演唱會名叫《我看見》，包含無限感恩，所以阿哲絞盡腦汁，替紀念Show加入無窮新意思。
張信哲：「歌手最幸運嘅地方，就係因為有歌迷鍾意先可以周圍去演出，去睇之前未睇過嘅嘢，我真心感激歌迷，所以今次個Show加咗舞台劇同戲劇嘅形式去表演，個Show好似3D咁，聽完再睇再去感受，所以有《我看見》嘅主題。去年喺台灣成立咗一個「台北故事劇團」去做舞台劇，劇團嘅人好有Talent，啲諗法同做音樂嘅人好唔同，知道同佢哋合作做演唱會應該會有另一番景象，所以由燈光、場景、舞台設計、服裝以及概念都由佢哋去搞。演唱會共分五Part，由我嘅音樂去串連，用我嘅歌去講故事，好似有一Part叫「情逢棋手」，舞台會拼砌成棋盤，舞蹈藝員會扮成棋子，我就係披甲指揮的將軍，用以表達我哋嘅生命同愛情都好似一盤棋，要用自己嘅一生去賭，行錯咗就唔可以返轉頭，我好鍾意呢Part，因為好有意思。至於嘉賓人選，我一直好想搵彭羚，知佢會為Wyman復出，因為我都有份做ConcertYY，希望到時有機會親自邀請阿Cass做我演唱會嘉賓，因為當面問，有誠意好多。」
心血大酬賓
為配合演唱會，阿哲特別為香港歌迷推出一張精裝版《初──專輯》，買一更送一，內藏去年為了舞台劇而推出的一張舞台劇原聲大碟《花季未了》，新歌加經典歌統統有收錄，難怪阿哲亦揚言好抵買。
「《初──專輯》同《花季未了》係兩類完全唔同嘅音樂作品，入行20年嘞，20年係一個階段，希望好似當年做新人咁搵番一啲熱情，記得初入行，咩都唔識，只想做自己想做嘅嘢，無考慮咁多，但喺呢行做咗咁耐，太熟悉嘞，好怕自己會無晒啲火，所以製作《初_專輯》係希望提醒自己，唔好無咗熱情。專輯內我推介一首叫《空位》，由我嘅生活去出發，自己重未搵到身邊嗰個人，但我唔會自怨自艾，唔會抱怨，要不斷提醒自己，要有勇氣去追求，人生係充滿希望嘅。」
向音樂劇邁進
有自己劇團，又演過舞台劇，近月連廣播劇亦有參與，阿哲的人生目標正向音樂劇方向邁進，祝阿哲的心願能早日達成。
「未必係今年，但絕對係未來嘅目標，華語樂壇未有太多音樂劇嘅代表作，來來去去都係得《雪狼湖》，其實音樂劇有好多空間發展，但難處係無咩前作可參考，所以呢樣亦係我成立劇團嘅原因，想訓練自己喺各方參與多啲，隨咗演之外，亦會參與幕後編曲同作曲，慢慢了解一部劇點樣去Run，台前幕後都熟悉運作之後，先可以把握得好啲。」
| 
多謝哂 !