「時運低」
深夜時份,一名年約廿五歲,手執香煙,頭染彩色,載眼罩似的大型墨鏡,一身入時打扮的青年在尖沙咀嘉蘭圍小巷行著。
突然間,有一身材高大健碩,穿T裇牛仔褲的短髮男子緩緩走過,青年一督眼間,見此男身體竟是半透明的,不禁驚呼道:
「嘩鬼呀!嚇死人啦!救命呀!」
「嚇你*味!我路過咋!你估我咁得閒專登嚇你呀?係你自己時運低見到我咋!鬼鬼鬼!叫得咁難聽。我之前咪又係人?嚇?你咁樣衰,我俾你嚇親就真!我叫救命就差唔多!」,男子光火地道。
青年詑意的道:「咩話?你………你話我樣衰?嚇親你?我人黎個喎!用腳行架!會嚇得過你呢隻鬼?」
男子不屑地道:「我之前究係人啦!不過而家死左咁大把!有乜大不了?剩係你先用腳行呀?我究係洛!你估真係做左鬼之後出入就唔駛行飛黎飛去呀?拍戲咩傻仔!況且你係人又點呀?唔嚇得鬼架?你咁樣衰,鬼都俾你嚇親呀!」
接連被辱,時髦青年不禁怒道:「你又話我樣衰?我都唔知幾靚仔呀!你睇我個頭,去幫陳奕迅Set頭個間明星髮廊整既!眼鏡,Dior!鞋,Channel!衫,Gucci!褲,LV呀!單呢個Look出到去已經大殺四方溝死女啦!仲話我樣衰?頂你當自做鬼大哂呀!乜都嗡得出!」
男子囂張地回敬道:「成身名牌掛上身又點呀?咁表示你好型好英好靚仔呀?戇居!你自己無型無款呀,著再多狗屎名牌上身又點呀?咪只係搞到好似你而家咁囉,成件名牌陳列品咁!咁好型呀?食屎啦你!
溝死女?係呀,剩係溝埋哂D貪慕虛榮既『死女』丫嘛!好女仔都唔吼你呢D樣衰臭格既蠱惑仔啦!因住真係惹埋下面D將名牌當寶既『死女』呀!好多架!」
青年更怒,大吼道:「我閘住!你*味我話你知你做鬼還做鬼唔好咁串喎!因住我搵人刮你山墳整爛佢收你皮呀!話你知我真係蠱惑仔黎架!我係XXX既大佬!你邊瓣?」
以為報自己是黑社會的身份對方便會害怕,誰不知人家不獨毫不理會,反更大怒道:「我大你老母呀!XXX既大佬呀?我好驚呀!我係南九龍反黑組陳志強幫辦呀!兩個月前先因為同幾個打刧金舖既『大圈』駁火報到咋!而家阿叔葬左係浩園!點呀?黎整爛我地盤丫笨?我大把兄弟同你算賬呀!」
青年一聽,目定口呆的道:「咩話………你………你就係前個排登左報紙,話因為保護同暸而英勇殉職嗰個陳Sir?」
陳志強幫辦大聲道:「係!而家阿Sir要逗你!企埋牆攞身份証出黎!」
青年頃刻囂狂之態全消,小聲地道:「唔駛咁認真吓嘩阿Sir?你都………去左啦?」
陳志強幫辦一字字道:「攞-出-黎!」
青年無奈,只好死死氣地照辦,道:「係………」
心道:「XYZ!撞鬼已經夠大鑊,仲要撞著個葬浩園既反黑組阿Sir!俾佢串之餘仲要逗!大佬呀!俾『鬼』查身份証呀!唉!真係夠哂『時運低』!下次都係著牛記粒記出街算!唔好著到咁招搖啦………」
二零零七年六月二十七日
凌晨一時二十分
炎澄魂字
(註:因事忙關係,故此文對話全用廣東話寫,待空閒多些,炎當會以白話文方式再補寫一篇,謹此說明。請各讀者見諒。)