告別大碟班底強勁 Hardpack：我哋團火唔會熄!
2013/05/27 08:41:41 網誌分類: 娛樂
| 很喜歡Indie音樂文化，就是那種沒多掣肘的音樂創意，能帶給樂迷無限驚喜，只可惜連玩得出色的Hardpack也宣佈散band，「夾band係好開心，但人大了就要面對現實，見好就要收。」鼓佬KB坦言Hardpack團火仍未熄，只要有機會就一定會繼續再玩，臨別送上最新大碟《NEVERBETHESAME》便碌爆卡搵幫手，大批樂壇猛將背後發功，誓要把最精采的送給樂迷。 主持：黃柏高 統籌：林永匡 協力：彭燕燕、袁東亮 如你有接觸Indie音樂便知道，他們是從不妥協於主流的，Hardpack的新大碟正是其道。 Adam：「新碟籌備兩年，還記得當初大家說得很清楚，一係唔玩，要玩就去盡，找來美國著名混音師BrainMcTernan幫手，大家風格一致，出來效果好滿意，還有班志同道合的朋友一齊玩，每首作品都是最精選的。」 KB：「因為資金有限，所有朋友都係搭膊頭來幫手的，打鼓方面有台灣的SkotSuyama陶山，他是S.H.E的監製，填詞有梁栢堅、陳詠謙、火火和MR樂隊的DASH，個個都仗義出手，講真，樂隊之間好難會有人真心幫你，那些成日話要夾band要團結的，都係得個講字，暗地裏又會勾心鬥角，連幫手放隻MV上網都唔肯，所以要衷心多謝這班朋友。」 基仔：「這次真係好玩，MastaMic幫手rap，盧凱彤彈段solo，個個都好唔話得，唔會有唔同唱片公司的掣肘，想做就去做。」 Joseph：「我覺得要多謝Adam媽咪、教容祖兒唱歌的ChristineSamson，她是樂壇教母，二話不說借出Studio，又教我唱歌運音和舒發情緒。」 靠《爆腎》宣傳 有心搞事無話唔得，Hardpack沒有大公司backup一樣得，自資出碟前先借助網絡世界的威力，搞整蠱節目入屋吸客，順帶把作品植入樂迷腦中。 KB：「當初抱着玩下心態，硬插Hardpack的作品在《玩爆你個腎》片頭片尾，要觀眾樂迷局聽，都係分享的一種，《小喇叭》大家聽到熟，還記得夾這歌時，閂埋門好幾晚不停repeat，玩得好開心，我又好鍾意《加價熱潮吹遍香港》首歌，同梁栢堅打邊爐講開加價問題嚴重，就決定不如整首好似許冠傑的歌咁講下民生，為拍MV跟人上街遊行，亦在那時認識了現役爆腎團隊的阿檸，往後就一齊玩，生活就係要linkup朋友。」 Adam：「因為自己監製，首首歌我都鍾意，新作《唉》有別Hardpack以往風格，Joseph演繹上亦好有驚喜，這首歌改變了他的唱腔；基仔的《鬥地主》曲風好好，我幾乎原用整支旋律，無點執，始終大家有默契，知道要乜。」 四子各有發展 Hardpack唔玩，樂迷大叫可惜，早前的告別騷全場爆滿，有樂迷投訴買票無門，說回來又是那句唔珍惜。 KB：「估唔到會爆滿，台上台下打成一片，當晚玩得好開心，其實講散band都係因為見唔清條路可以點行，Hardpack唔想玩主流，香港玩Band本身條件要得之外，還要有話題性，Rubberband都係得Paco帶住先得，講真，歌手樂隊都只係商品，要簽都揀易搞的，出唱片唔會賺大錢，係拍廣告做代言先叫有錢搵，夾band係好開心，但人大了就要面對現實，見好就要收，以前點玩都得，現在要生活，Joseph要教結他，基仔有個仔要照顧，Adam都係玩音樂為主，大家都好忙，我算係最無顧忌的一個。Hardpack團火仲未熄的，只要有機會就一定會繼續玩，《爆腎》都唔會停，繼續爆落去，心肝脾肺腎全部都要爆，也會拍戲和做主持。」 Adam：「我都係繼續音樂，做多點幕後的，會返內地發展，始終內地音樂空間很大，最近跟中國好聲音的平安錄歌，也會跟周筆暢有合作。」 基仔：「個女剛一歲，想多點時間陪家人，也想在音樂造藝上有點新火花，始終這世界好現實的，彈唔出新嘢就無人用你，希望可玩得再好啲。」 Joseph：「繼續開班教人結他，樂壇需要新血，另一方面也會鑽研音樂，好好進修自己。」 |
 | |
| |
 | |
| |
 | |
| |
 | |
 | |
|
回應 (0)
我要發表
